<p><span style="color: #000000;"><strong>(ភ្នំពេញ)៖</strong> ឆ្លើយតបនឹងការរីករាលដាលវិរុស Zika នៅប្រទេសសឹង្ហបុរី, ភ្លាមៗលោក ថោង ខុន រដ្ឋមន្រ្តីក្រសួងទេសចរណ៍ បានអំពាវនាវឲ្យប្រជាពលរដ្ឋខ្មែរ ធ្វើដំណើរទៅប្រទេសសិង្ហបុរី មានការប្រុងប្រយ័ត្នខ្ពស់ចំពោះ វីរុស Zika។</span></p>
<p><span style="color: #000000;">ការអំពាវនាវរបស់ លោក ថោង ខុន បានធ្វើឡើងស្របពេលដែល ក្រសួងសុខាភិបាលកម្ពុជា បានចេញសេចក្តីប្រកាសព័ត៌មានអំពាវនាវ ឲ្យប្រជាពលរដ្ឋមានការប្រុងប្រយ័ត្នចំពោះ វីរុស Zika បន្ទាប់ពីជំងឺដ៏កាចសហាវមួយនេះកំពុងរីករាលដាល នៅតំបន់អាស៊ី ដូចជា ប្រទេសសឹង្ហបុរី មានករណីនេះកើនដល់ចំនួន១៥១, ប្រទេសឡាវ២ករណី, ប្រទេសវៀតណាម២ករណី, ថៃ៩៧ករណី និង ម៉ាឡេស៊ី១ ករណី។</span></p>
<p><span style="color: #000000;">ជាមួយនេះផងដែរ ទាក់ទងនឹងករណី វីរុស Zikaនេះ កាលពីពេលថ្មីៗនេះ ក្រសួងទេសចរណ៍ សហការជាមួយ ក្រសួងសុខាភិបាល និងអង្គការសុខភាពពិភពលោក ក៏បានត្រួតពិនិត្យលើកីឡាករកម្ពុជា ដែលបានត្រឡប់ពីការប្រកួតកីឡាអូឡាំពិក នៅប្រទេសប្រេស៊ីលផងដែរ។ ការត្រួតពិនិត្យ ដើម្បីបញ្ជាក់ឲ្យកាន់តែច្បាស់ថា កីឡាករកម្ពុជា មានសុខភាពល្អធម្មតា និងមិនមានការឆ្លងនូវវីរុសណាមួយប៉ះពាល់ដល់អាយុជីវិតរបស់ពួកគាត់ឡើយ។</span></p>
<p><span style="color: #000000;">សូមជំរាបថា ត្រឹមតែរយៈពេលមួយថ្ងៃប៉ុណ្ណោះ ពោលគឺនៅថ្ងៃព្រហស្បតិ៍ អ្នកឆ្លងវីរុស Zika ៣១ករណីទៀតត្រូវបាន ក្រុមគ្រូពេទ្យរកឃើញ ដែលជាហេតុនាំឲ្យចំនួនអ្នកឆ្លងវីរុស ដែលមានដើមកំណើតមកពីសត្វមូស បានកើនឡើងដល់ ១៥១នាក់ហើយនៅប្រទេសសិង្ហបុរី ក្នុងចំណោម នោះក៏មានជនជាតិចិន និងឥណ្ឌា ជាច្រើននាក់ផងដែរ។</span></p>
<p><span style="color: #000000;">ការរីករាលដាលនៃវីរុស Zika នេះ កំពុងតែបង្កការព្រួយបារម្ភដល់ពិភពលោក ជាពិសេសប្រទេសដែលកំពុងក្លាយជាមុខសញ្ញា ដែលអាចនឹងឆ្លងរីករាលដាលដល់។ យ៉ាងណាក៏ដោយ ថ្នាក់ដឹកនាំបណ្តាប្រទេសមួយចំនួនកំពុងតែអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ ចំពោះវីរុស Zika ដែលអាចបង្កគ្រោះថ្នាក់ដល់ អាយុជីវិតរបស់ប្រជាពលរដ្ឋដោយនឹកស្មានមិនដល់៕</span></p>
<p><span style="color: #000000;"><img src="http://awdnews.com/images/1460461457ddb9cb03-77d9-4586-8c09-024eef9c57a4-large16x9_zikavirus.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>