<p><span style="color: #000000;"><strong>(ភ្នំពេញ)៖</strong> អ្នកនាំពាក្យនិយ័តករទូរគមនាគមន៍កម្ពុជា លោក អ៊ឹម វុត្ថា បានថ្លែងប្រាប់អង្គភាព Fresh News នៅរសៀលថ្ងៃទី៧ ខែតុលានេះថា និយ័តករទូរគមនាគមន៍ នឹងបិទស៊ីមកាត (លេខទូរស័ព្ទ) ដែលមិនបានចុះបញ្ជីត្រឹមត្រូវ ចាប់ពីថ្ងៃទី០១ ខែវិច្ឆិកា ឆ្នាំ២០១៦ខាងមុខនេះតទៅ។</span></p>
<p><span style="color: #000000;">បើតាមអ្នកនាំពាក្យរូបនេះ បានបញ្ជាក់ថា ស៊ីមកាតដែលកំពុងប្រើប្រាស់ នៅប្រទេសកម្ពុជាបច្ចុប្បន្នមានចំនួន១៩.៣លានស៊ីម ហើយក្នុងនោះមានស៊ីមពី១.៣លាន ទៅ១.៥លានស៊ីម (ស្មើនឹង៧-៨ភាគរយ) មិនទាន់មានឯកសារច្បាស់លាស់ ដែលនិយ័តករ ទូរគមនាគមន៍នឹងចាត់វិធានការ។</span></p>
<p><span style="color: #000000;">លោកបញ្ជាក់ទៀតថា យុទ្ធនាការលុបបំបាត់ស៊ីមកាតទូរស័ព្ទចល័ត ដែលគ្មានឯកសារសំគាល់អត្តសញ្ញាណនេះ មិនមែននិយ័តករ ទូរគមនាគមន៍ ទើបតែធ្វើនៅពេលនេះនោះទេ ពោលគឺធ្វើរយៈពេល១ឆ្នាំមកហើយ។</span></p>
<p><span style="color: #000000;">លោកបន្តថា វិធានការបន្តចំពោះមុខ ស៊ីមកាតគ្មានឯកកសារច្បាស់លាស់ទាំងនោះ និយ័តករនឹងសហការជាមួយ ក្រុមហ៊ុនទូរស័ព្ទទាំង៦ ដោយចាប់ពីថ្ងៃទី០១ ខែវិច្ឆិកា ឆ្នាំ២០១៦តទៅនឹងត្រូវបិទមិនឲ្យមានការហៅចូល ហើយក្រុមហ៊ុនទូរស័ព្ទ នឹងផ្ញើសារទៅកាន់អ្នកប្រើប្រាស់ ចំនួន៧លើក ដើម្បីរំឮកពួកគេ ឲ្យមកបំពេញសំណុំឯកសារឲ្យបានត្រឹមត្រូវ។ ប្រសិនបើរយៈពេល៣ខែ អ្នកប្រើប្រាស់ទាំងនោះ នៅតែមិនមកបំពេញសំណុំឯកសារ ស៊ីមកាតទាំងនោះនឹងត្រូវបិទដំណើរការតែម្តង។</span></p>
<p><span style="color: #000000;">លោក អ៊ឹម វុត្ថា បានបញ្ជាក់ទៀតថា បន្ទាប់ពីថ្ងៃទី០១ ខែវិច្ឆិកា ឆ្នាំ២០១៦ មន្ត្រីនិយ័តករទូរគមនាគមន៍ នឹងសហការជាមួយអគ្គស្នងការ នគរបាលជាតិ និងក្រសួងប្រៃសណីយ៍ និងទូរគមនាគមន៍ ចុះទៅពិនិត្យផ្ទាល់ នៅតាមក្រុមហ៊ុនទូរស័ព្ទចល័តទាំង៦ ដើម្បីធ្វើការងារ លុបបំបាត់ស៊ីមកាត គ្មានឯកសារច្បាស់លាស់ទាំងនោះ ឲ្យកាន់តែមានប្រសិទ្ធភាពថែមទៀត។</span></p>
<p><span style="color: #000000;">សូមជម្រាបថា នៅប្រទេសកម្ពុជា មានក្រុមហ៊ុនទូរស័ព្ទចល័ត ចំនួន៦ រួមមាន ក្រុមហ៊ុន Mobitel (Cellcard) ក្រុមហ៊ុន Viettel (Metfone) ក្រុមហ៊ុន Smart ក្រុមហ៊ុន Cooltel ក្រុមហ៊ុន qb ក្រុមហ៊ុន Seatel៕</span></p>
<p><span style="color: #000000;"><a class="thickbox" title="" href="/FileManager/Commons/2016/10/7/15e-07-10-2016--15-23-50.jpg"><img src="/FileManager/Articles/mce/2016/10/7/15e-07-10-2016--15-23-50.jpg" alt="" /></a><br /><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>