<p><span style="color: #000000;"><strong>(ភ្នំពេញ)៖</strong> មន្ត្រីយោធាម្នាក់បានចូលហាងផឹកស៊ីស្រវឹង ស្រាប់តែយកដៃទៅលូកស្ទាបប្រដាប់ភេទនារីគិតលុយ បង្កឲ្យមានការភ្ញាក់ផ្អើលនៅយប់ថ្ងៃទី៥ ខែធ្នូ ឆ្នាំ២០១៦ ក្នុងហាង «មនោរម្យត្រជាក់ចិត្ត» លក់គ្រឿងក្លែមគ្រប់មុខ ស្ថិតតាមបណ្ដោយផ្លូវC7 ស្ថិតក្នុងភូមិដំណាក់ សង្កាត់ភ្នំពេញថ្មី ខណ្ឌសែនសុខ។</span></p>
<p><span style="color: #000000;">មន្រ្តីនគរបាលមូលដ្ឋាន បានឲ្យដឹងថា នារីរងគ្រោះឈ្មោះ រាន សុវណ្ណារី អាយុ១៨ឆ្នាំ មុខរបរអ្នកគិតលុយស្នាក់នៅ សង្កាត់កាកាប ខណ្ឌពោធិ៍សែនជ័យ។</span></p>
<p><span style="color: #000000;">នារីឈ្មោះ គាំង ចិន្ដា អាយុ២១ឆ្នាំ មុខរបររត់តុស្នាក់នៅសង្កាត់ទឹកថ្លា ខណ្ឌសែនសុខ បានឲ្យដឹងថា មុនពេលកើតហេតុ ជនបង្កបានចូលទៅហាងខាងលើ ដើម្បីផឹកស៊ី តែម្នាក់ឯងនោះទេ ហើយរហូតគាត់ផឹកស្រាបៀរអស់២កញ្ច្រែងសរុប១២កំប៉ុង ក៏មានមិត្តភក្ដិរបស់គាត់ពីរនាក់ប្ដី-ប្រពន្ធបានមកផឹកស៊ីជាមួយទៀត។</span></p>
<p><span style="color: #000000;">ក្រោយពេលផឹកស៊ីរួចហើយ ជនបង្កបានដើរទៅយកម៉ូតូ ដែលដាក់នៅនិងចំហៀងហាង តែរូបគាត់មិនទាន់គិតលុយនៅឡើយនោះទេ ទើបនារីរងគ្រោះ និងសាក្សីម្នាក់ទៀតដែលធ្វើការជាមួយគ្នា បានដើរទៅប្រាប់ជនបង្កថា គាត់ពុំទាន់គិតលុយនៅឡើយទេ ហើយពេលជនរងគ្រោះទៅប្រាប់ចំនួនទឹកប្រាក់ ដែលគាត់ពុំទាន់គិតនោះ គឺមានចំនួន១១២០០០រៀល ដែលត្រូវចំណាយ។ ពេលនោះជនបង្កបានឆ្លើយថាមិនអីទេ។</span></p>
<p><span style="color: #000000;">ស្រាប់តែបន្តិចក្រោយមក ជនបង្កបានរត់ទៅយកដៃបុកប្រដាប់ភេទនារីរងគ្រោះខាងលើ តែនារីរងគ្រោះ បានព្យាយាមគេចដែរ តែជនបង្កបានរត់ទៅម្ដងទៀត ថែមទាំងចាប់ដៃនារីរងគ្រោះហើយ បានយកដៃទៅបុកប្រដាប់ភេទរបស់នាង រហូតទៅដល់ចំនួនពីរដងទៀត ទើបនារីខាងលើ រត់ទៅប្រាប់ម្ចាស់ ហាងឲ្យទាក់ទងទៅកាន់សមត្ថកិច្ចមូលដ្ឋាន ចុះមកជួយអន្តរាគមន៍ និងឃាត់បុរសយកទៅសាកសួរបន្ថែម នៅប៉ុស្ដិ៍នគរបាលរដ្ឋាបាលភ្នំពេញថ្មី។</span></p>
<p><span style="color: #000000;">បើតាមមន្រ្តីនគរបាល ជនបង្កខាងលើមានឈ្មោះ ហេង សម្បត្តិ អាយុ៤២ឆ្នាំ មុខរបរ មន្រ្តីយោធា ផ្នែកផ្ដល់ព័ត៌មាននៃការិយាល័យទី២ ស្នាក់នៅផ្ទះលេខ២ ផ្លូវលំ ភូមិព្រៃមូលសង្កាត់ក្រាំងធ្នង់ ខណ្ឌសែនសុខ។</span></p>
<p><span style="color: #000000;">បច្ចុប្បន្នជនបង្កខាងលើ ត្រូវបានសមត្ថកិច្ចកំពុងតែកសាងសំណុំរឿង បញ្ជូនយកទៅអធិការដ្ឋាននគរបាលខណ្ឌសែនសុខ រង់ចាំការចាត់ការទៅតាមនីតិវីធី៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-05-15-26-26-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>