<div class="article-content">
<p><strong>កំពង់ស្ពឺ៖</strong> កងទ័ពកម្ពុជាជាង ៥០០នាក់ នៅព្រឹកថ្ងៃទី២៩ ខែសីហា ឆ្នាំ២០១៤នេះ បានធ្វើសមយុទ្ធបាញ់គ្រាប់ ពិត ប្រភេទកាំភ្លើងធំ និង រថពាសដែក បង្ហាញសមត្ថភាពរបស់ខ្លួន បន្ទាប់ពីពួកគេបានបញ្ចប់វគ្គហ្វឹកហ្វឺនអស់ជា ច្រើនខែ ដោយជោគជ័យ។</p>
<p>ការបង្ហាញសមត្ថភាពបាញ់គ្រាប់ពិតរបស់កងទ័ពអង់អាចក្លាហានរបស់កម្ពុជា បានធ្វើឡើងនៅភូមិសាស្រ្តភ្នំធំ ឃុំ ក្រាំងអំពិល ស្រុកសំរោងទង ខេត្តកំពង់ស្ពឺ ដោយមានការអញ្ជើញជាអធិបតីដោយឧបនាយករដ្ឋមន្រ្តី រដ្ឋមន្រ្តី ក្រសួងការពារជាតិ នាយឧត្តមសេនីយ៍ ទៀ បាញ់, អគ្គមេបញ្ជាការកងយោធពលខេមរភូមិន្ទ នាយឧត្តមសេនីយ៍ ប៉ុល សារឿន, មេបញ្ជាការកងទ័ពជើងគោក នាយឧត្តមសេនីយ៍ មាស សុភា, មេបញ្ជាការកងពលតូចលេខ៧០ ឧត្ដមសេនីយ៍ ម៉ៅ សុផាន់ ព្រមនិងមន្រ្តីជាន់ខ្ពស់នៃក្រសួងការពារជាតិ និងកងយោធពោលខេមរភូមិន្ទជាច្រើនរូប ផ្សេងទៀត។</p>
<p>គ្រាប់កាំភ្លើងពិត ដែលកងទ័ពកម្ពុជាធ្វើការបាញ់សមយុទ្ធនាព្រឹកនេះរួមមានកាំភ្លើងធំប្រភេទ ៦០មិល្លីម៉ែត្រ, ៨២ មិល្លីម៉ែត្រ និង១០០មិល្លីម៉ែត្រ រួមនឹងសមយុទ្ធដោយប្រើរថពាសដែក BMP1ផងដែរ។</p>
<p>កងទ័ព ដែលឆ្លងកាត់ការហ្វឹកហ្វឺនជំនាញពង្រឹងសមត្ថភាពលើទីលានប្រយុទ្ធ ដើម្បីការពារដែនដីកម្ពុជា ចូលមក បង្ហាញសមត្ថភាពនាព្រឹកនេះ មកពី៥អង្គភាព រួមមាន៖ កងពលថ្មើរជើងលេខ ៧០ និង កងទ័ពមកពីភូមិភាគ លេខ ២, ៣,៤ និងលេខ ៥។ </p>
<p>មេបញ្ជាការរងកងទ័ពជើងគោក ឧត្តមសេនីយ៍ទោ ហ៊ុន ម៉ាណែត បានថ្លែងកោតសរសើរដល់កងកម្លាំងប្រដាប់ អាវុធទាំងអស់ ដែលបានខិតខំបញ្ចេញអស់នូវកម្លាំងកាយចិត្ត យកចិត្តទុកដាក់ខ្ពស់ ក្នុងការហ្វឺកហ្វឺនបង្កើន សមត្ថភាព និងត្រៀមលក្ខណ: ដើម្បីការពារសុខសន្តិភាព ស្ថេរភាពជូនប្រជាជន និងការពារបូរណភាពទឹកដី របស់យើងគ្រប់ពេលវេលា។</p>
<p>លោកឧត្តមសេនីយ៍ទោ បានជូនជាប្រយោគតាស់តឿនមួយឃ្លា ដល់កងកម្លាំងហ្វឹកហ្វឺនទាំងអស់នោះថា « ស៊ូ បង្ហូរញើសនៅលើទីលានហ្វឹកហ្វឺន ប្រសើរជាជាងបង្ហូរឈាមនៅលើទីលានប្រយុទ្ធ»៕</p>
<p style="text-align: center;"><img src="http://image.dap-news.com:81/dap-news/dap-images/2014/July/id-009/S-227.jpg" alt="" width="550" /></p>
</div>
<p style="text-align: right;"><a href="http://www.dap-news.com/2011-06-14-02-39-55/93948-2014-08-29-01-44-36.html" target="_blank">ផ្តល់សិទ្ធដោយ ៖ ដើមអម្ពិល</a></p>