<p><span style="color: #000000;"><strong>(កង់បេរ៉ា)៖</strong> សមាជិកសភាអូស្ត្រាលីនៅថ្ងៃព្រហស្បតិ៍ នេះបានអំពាវនាវឱ្យទីក្រុងមូស្គូ ចូលរួមចំណែក ក្នុងការស៊ើបអង្កេតជុំវិញការបាញ់ទម្លាក់ យន្ដហោះ MH17 របស់ក្រុមហ៊ុនអាកាសចរណ៍ម៉ាឡេស៊ី បន្ទាប់ពី របាយការណ៍ស៊ើបអង្កេតមួយបង្ហាញថា កងកម្លាំងរុស្ស៊ីគឺជាអ្នកទទួលខុសត្រូវចំពោះការ ប្រើប្រាស់គ្រាប់មីស៊ីលក្នុងការបាញ់ទម្លាក់ យន្ដហោះដឹកអ្នកដំណើរមួយនេះ។ នេះបើតាមការចុះផ្សាយ ដោយទីភ្នាក់ងារសារព័ត៌មានចិន ស៊ិនហួរ នៅព្រឹកថ្ងៃព្រហស្បតិ៍ ទី២៩ ខែកញ្ញា ឆ្នាំ២០១៦។</span></p>
<p><span style="color: #000000;">យោងតាមរបាយការណ៍ស៊ើបអង្កេតរយៈពេលពីរឆ្នាំមកនេះ ដោយមានការចូលរួមពីសំណាក់ អាជ្ញាធរ ហូឡង់ ប៊ែលហ្សិក អ៊ុយក្រែន អូស្រ្តាលី និង ម៉ាឡេស៊ី យន្ដហោះ MH17 ត្រូវបានបាញ់ទម្លាក់ដោយ មីស៊ីលប្រភេទ BUK ផលិតនៅរុស្ស៊ី ដោយក្រុមឧទ្ទាមបំបែករដ្ឋលំអៀងទៅរករុស្ស៊ី នៅក្នុងតំបន់ ភាគខាងកើតនៃប្រទេស អ៊ុយក្រែន។</span></p>
<p><span style="color: #000000;">ទោះបីជាយ៉ាងណាក៏ដោយ ទីក្រុងមូស្គូ បានច្រានចោលរបាយការណ៍នេះ ព្រមទាំងចាត់ទុកថាការស៊ើប អង្កេតគឺធ្វើឡើងមានចរិតលក្ខណៈនយោបាយ។ ទន្ទឹមគ្នានោះដែរ រដ្ឋមន្ត្រីការបរទេសអូស្ត្រាលី លោកស្រី Julie Bishop បានជម្រុញឱ្យភាគីពាក់ព័ន្ធទំាងអស់ ចូលរួម និង បន្តគំាទ្រដល់ការស៊ើបអង្កេត លើបទឧក្រិដ្ឋដ៏សាហាវឃៅនេះ ដែលបានសម្លាប់មនុស្ស២៩៨នាក់ ក្នុងនោះមានអូស្ត្រាលី៣៨នាក់។</span></p>
<p><span style="color: #000000;">គួររំលឹកថា យន្ដហោះMH17 របស់ក្រុមហ៊ុនអាកាសចរណ៍ម៉ាឡេស៊ីអ៊ែរឡាញ មានគោលដៅហោះហើរ ពីទីក្រុងអំាស្ទឺដំា នៃប្រទេសហូឡង់ ឆ្ពោះទៅកាន់ទីក្រុងគូឡាឡាំពួរ ត្រូវបានគេបាញ់ទម្លាក់នៅឯ ភាគខាងកើត ប្រទេសអ៊ុយក្រែនកាលពីខែកក្កដាឆ្នាំ ២០១៤ ដោយបានផ្ដាច់យកជីវិតមនុស្ស ជិះនៅលើយន្ដហោះ ទំាងអស់ ២៩៨នាក់ ក្នុងនោះភាគច្រើនជាជនជាតិហូឡង់៕</span></p>
<p><span style="color: #000000;"><a class="thickbox" title="" href="/FileManager/Commons/2016/9/29/14-29-09-2016--10-40-55.jpg"><span style="color: #000000;"><img src="/FileManager/Articles/mce/2016/9/29/14-29-09-2016--10-40-55.jpg" alt="" /></span></a></span></p>
<p style="text-align: right;"><span style="color: #000000;">ប្រភព ៖ ស៊ិនហួរ</span></p>