<p><span style="color: #000000;"><strong>(ប៉េកាំង)៖</strong> ក្លឹបលេងក្នុងលីគកំពូលរបស់ចិនមួយ ដែលមិនត្រូវបានគេបញ្ចេញឈ្មោះនោះ បានហ៊ានឲ្យតម្លៃខ្លួនកីឡាករ ខ្សែប្រយុទ្ធជួរមុខ Cristiano Ronaldo រហូតដល់ទៅ ២៥០លានផោន ដើម្បីផ្ទេរចេញពីក្លឹបស្តេចស Real Madrid របស់អេស្ប៉ាញ។</span></p>
<p><span style="color: #000000;">ទោះជាច្រើនយ៉ាងនេះក្តី ក៏ភ្នាក់ងារនៃការទិញ-ដូរ Jorge Mendes របស់កីឡាករវ័យ៣១ឆ្នាំ ជនជាតិព័រទុយហ្គាល់ មិនចាប់អារម្មណ៍ឡើយ ខណៈដែលប្រាក់ខែរបស់កីឡាករលំដាប់លេខ២ ពិភពលោកមួយនេះនៅ Real Madrid ទទួលបាន ៨៥លានផោនហើយនោះ នេះបើយោងតាមសារព័ត៌មាន BBC របស់អង់គ្លេសចេញផ្សាយព្រឹកនេះ។</span></p>
<p><span style="color: #000000;">ភ្នាក់ងារ Mendes បានថ្លែងប្រាប់សារព័ត៌មាន Sky Italia របស់អ៊ីតាលីថា<strong> «បច្ចុប្បន្នមានក្លឹបមួយនៅចិន ហ៊ានឲ្យតម្លៃ ខ្លួន Ronaldo រហូតដល់ ២៥៧លានផោន ដោយទទួលបានជាង ១០០លានផោនក្នុង១ឆ្នាំ ដើម្បីបំពេញការផ្ទេរកីឡាករជើងខ្លាំងព័រទុយហ្គាល់មួយនេះ»</strong>។</span></p>
<p><span style="color: #000000;">ប្រភពតាមសារព័ត៌មានខាងលើដដែលបានបន្តថា តាមរយៈការឲ្យតម្លៃខ្លួនដ៏ច្រើនមហាសាលនេះ Ronaldo នឹងទទួល បានប្រាក់ឈ្នួលប្រចាំសប្តាហ៍ ១,៦លានផោន ច្រើនជាងកីឡាករខ្សែបម្រើប្រយុទ្ធ Paul Pogba ផ្ទេរចេញពីក្លឹប Juventus ទៅកាន់ក្លឹបអង់គ្លេស Manchester United ក្នុងតម្លៃខ្លួន ៨៩លានផោនថ្លៃជាងគេនោះ។</span></p>
<p><span style="color: #000000;">តែយ៉ាងណាមិញ ប្រធានក្រុមជម្រើសជាតិព័រទុយហ្គាល់ កម្ពស់ ១,៨៥ម៉ែត្រ Cristiano Ronaldo ក៏ធ្លាប់បានថ្លែងដែរ ថា រូបលោកអាចលេងបានតែរយៈពេល ១០ឆ្នាំទៀតប៉ុណ្ណោះ គ្រាដែលកិច្ចសន្យារបស់គាត់នៅក្នុងក្លឹបអ្នកមាន Real Madrid នឹងផុតកំណត់រហូតដល់ឆ្នាំ២០២១ បន្ទាប់ពីរូបគាត់ទើបតែបានបន្តកិច្ចសន្យាបន្ថែមទៀតកាលពីខែមុន៕</span></p>
<p><span style="color: #000000;"><img src="http://image.freshnewsasia.com/2016/ID-113/fn-2016-12-30-10-59-54-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-113/fn-2016-12-30-10-59-54-1.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>