<p><span style="color: #000000;"><strong>(ភ្នំពេញ)៖</strong> លោក ប៊ូ ជុំសិរី ប្រធានគណៈកម្មការបច្ចេកទេសរៀបចំពិធីបុណ្យេជាតិ នៅមុននេះបន្តិច បានប្រាប់អង្គភាព Fresh News ឲ្យដឹងថា ទូក.ង ដែលទទួលបានចំណាត់ថ្នាក់ «លេខ១ពិសេសលើសគេ» មានឈ្មោះថា «សារាយតេជោសែនជ័យ» ជាទូក.ងមកពីខេត្តកណ្ដាល ចំណែកឯ ទូក.ងដែលទទួលបានផ្នែកសោភ័ណភាពស្អាតជាងគេដែរនោះ មានចំនួន ៣ទូក ផ្សេងទៀត។</span></p>
<p><span style="color: #000000;">លោក ប៊ូ ជុំសិរី បានបញ្ជាក់ថា <strong>«ទូក.ង ដែលបានលេខ១ពិសេស មានឈ្មោះ សារាយតេជោសែនជ័យ របស់ព្រះចៅធិការមួយអង្គ មកពីខេត្តកណ្ដាល ដែលយើងមានការប្រគល់រង្វាន់មួយចំនួន ដូចទៅនឹងឆ្នាំ២០១៤ ដែរ មិនខុសគ្នាប៉ុន្មានទេ»</strong>។</span></p>
<p><span style="color: #000000;">លោកបានបន្តថា ក្រៅពីទូកឈ្មោះ «សារាយតេជោសែនជ័យ» មកពីខេត្តកណ្ដាល មានទូក.ង ដែលទទួលបានជយលាភីផ្នែកសោភ័ណភាពស្អាតផុតគេចំនួន ៣ទូកផ្សេងទៀត រួមមាន៖ ទូកទី១.មានឈ្មោះ «តេជៈសែនជ័យរស្មីមេគង្គ» ជាទូក.ងនៅក្នុងរាជធានីភ្នំពេញ, ទូកទី២.មានឈ្មោះ «គងពិសីមហាសែនតេជៈ» មកពីខេត្តកំពង់ស្ពឺ និងទូកទី៣.មានឈ្មោះ «ព្រះទីនាំងព្រះគោសែនជ័យ» មកពីខេត្តកំពត»។</span></p>
<p><span style="color: #000000;">តាមការសង្កេតមើលឃើញ ក្នុងឱកាសប្រារព្ធព្រះរាជពិធីបុណ្យអុំទូក រយៈពេល ៣ថ្ងៃមកនេះ លោក ប៊ូ ជុំសិរី បានបញ្ជាក់ថា ការប្រព្រឹត្តទៅនៃព្រះរាជពិធីបុណ្យដ៏មានអត្ថន័យនេះ មានភាពអធឹកអធ័ម និងសប្បាយរីករាយ ប្រកបដោយភាពរលូន ឯប្រជាពលរដ្ឋ ភ្ញៀវទេសចរជាតិ-អន្តរជាតិ មានការចូលរួមយ៉ាងច្រើនកុះករ គ្មានករណីបង្កជាភាពចលាចលអ្វីនោះឡើយ ការថែរក្សាសន្តិសុខរបស់កម្លាំងសមត្ថកិច្ច នោះទៀតសោត ក៏មានសកម្មភាពពង្រាយគ្រប់ទីកន្លែង ដែលបានបង្កភាពកក់ក្ដៅគ្រប់ពេលវេលា ជូនប្រជាពលរដ្ឋ និងអ្នកចូលរួមទាំងអស់។</span></p>
<p><span style="color: #000000;">សូមជម្រាបថា ព្រះរាជពិធីបុណ្យអុំទូក បណ្ដែតប្រទីប អកអំបុក សំពះព្រះខែ ត្រូវបានផ្អាកការប្រារព្ធចំនួន៤ដង មកហើយ គឺនៅឆ្នាំ២០១១, ឆ្នាំ២០១២, ឆ្នាំ២០១៣ និងឆ្នាំ២០១៥។ ដោយឡែក ក្នុងឆ្នាំ២០១៦នេះ មានទូក.ងចូលរួមប្រណាំងសរុបចំនួន ២៥៧ទូក ក្នុងនោះមានកីឡាករចំណុះសរុប១៧,៧៣៦នាក់៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2016-11-15-09-56-54-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>