<p><span style="color: #000000;"><strong>(ព្រះសីហនុ)៖</strong> កុមារី ង៉ែត មាសមុន្នីរ័ត្ន មានឈ្មោះហៅក្រៅ Nataly ជាទារិកាដំបូងគេបំផុត ដែលកើតចេញពីបច្ចេកវិទ្យា បង្កកំណើតកូនក្នុងកែវដំបូងគេបំផុតរបស់កម្ពុជា ក្នុងចំណោមក្មេងរាប់រយនាក់ផ្សេងទៀត ដែលកើតពីបច្ចេកវិទ្យានេះ។</span></p>
<p><span style="color: #000000;">ថ្លែងប្រាប់អ្នកយកព័ត៌មាន Fresh News លោកវេជ្ជបណ្ឌិត ញ៉ុក ម៉េត និង អ្នកស្រី បេង ចាន់រី ជាឪពុកម្តាយបង្កើតរបស់ កុមារី Nataly បានឲ្យដឹងថា កូនស្រីរបស់គាត់ ឆ្លាតវៃ និងមានសុខភាពល្អណាស់ មិនដែលឈឺនោះទេ។</span></p>
<p><span style="color: #000000;">លោក ញ៉ុក ម៉េត មន្ត្រីនៃមន្ទីរសុខាភិបាលខេត្ត ព្រះសីហនុ បានឲ្យដឹងថា នៅពេលនេះ Nataly ចេះនិយាយតិចៗហើយ ពាក្យពីរ២ម៉ាត់ ដំបូងដែលនាងចេះគឺ ហៅប៉ាប៉ា និង ម៉ម៉ (សត្វគោ)។</span></p>
<p><span style="color: #000000;">គូស្វាមីភរិយាដែលរៀបការជាច្រើនឆ្នាំ ហើយទើបបានទទួលកូនស្រីដូចបំណងនេះ បានបញ្ជាក់ថា <strong>«Nataly ពិតជាផ្តល់សេចក្តីសុខ និងក្តីសង្ឃឹមដល់ពួកយើង ដែលជាអារម្មណ៍មួយ ពិបាកនឹងពណ៌នាណាស់»</strong>។</span></p>
<p><span style="color: #000000;">កុមារីមួយនេះ បានកើតកាលពីថ្ងៃទី០៧ ខែមិថុនា ឆ្នាំ២០១៥ ហើយនៅខែក្រោយនេះ ឪពុកម្តាយរបស់នាងគ្រោងនឹងរៀបចំខួបកំណើត មួយឆ្នាំឲ្យនាងផងដែរ។</span></p>
<p><span style="color: #000000;">បន្ទាប់ពីទទួលបានកូនស្រីម្នាក់ហើយនោះ លោកវេជ្ជបណ្ឌិត ញ៉ុក ម៉េត អាយុ៤៧ឆ្នាំ និងអ្នកស្រី បេង ចាន់វី អាយុ៣៤ឆ្នាំ ចង់បានកូនប្រុសម្នាក់ទៀត ហើយលើកនឹងប្រើប្រាស់ បច្ចេកវិទ្យាបង្កកំណើតកូនក្នុងកែវដដែល ប៉ុន្តែលើកនេះ ពិសេសជាងលើកមុន ដោយលោកនឹងជ្រើសរើសភេទកូន យកកូនប្រុស។</span></p>
<p><span style="color: #000000;">សូមជម្រាបថា លោក ញ៉ុក ម៉េត និងភរិយា បានរៀបការជាមួយគ្នារយៈពេល៦ឆ្នាំ អត់មានកូនដូចបំណងនោះទេ ទើបលើកសម្រេចចិត្តនាំភរិយា ទៅព្យាបាលនៅប្រទេសវៀតណាម ៥ដងតែមិនបានជោគជ័យ ហើយទើបមកទទួលបានជោគជ័យ នៅប្រទេសកំណើតខ្លួន នៅមន្ទីរសម្រាកព្យាបាលកម្ពុជា ដែលមានឡាបូបង្កកំណើតកូនក្រៅស្បូន ដំបូងគេបំផុតនៅកម្ពុជា ក្នុងឆ្នាំ២០១៣។</span></p>
<p><span style="color: #000000;">លោក ហោ សំណាង ស្ថាបនិក និងជានាយកគ្រប់គ្រងមន្ទីរព្យបាលកម្ពុជា បានឲ្យដឹងថា Nataly ជាកុមារីដំបូងបង្អស់របស់កម្ពុជា ដែលកើតចេញពីបច្ចេកវិទ្យាបង្កកំណើតក្នុងកែវនៅកម្ពុជា ក្នុងចំណោមកុមារកម្ពុជា ១០២នាក់ ដែលកើតចេញពីបច្ចេកវិទ្យាដូចគ្នានេះ។</span></p>
<p><span style="color: #000000;">គួរំលឹកដែរថា ទារកដែលកើតពិបច្ចេកវិទ្យាបង្កកំណើតដំបូងគេរបស់ពីភពលោក ឈ្មោះ Louise Joy Brown, កើតនៅថ្ងៃទី ២៥ កក្កដា ១៩៧៨ នៅក្រុង Oldham, ប្រទេសអង់គ្លេស។</span></p>
<p><span style="color: #000000;">លោកក៏បានគូសបញ្ជាក់ថា ចាប់តាំងពីបង្កើតបន្ទប់ពិគ្រោះ សុខ ទៀង ដល់ពង្រីកខ្លួន ជាម្ទីរសំរាកព្យាបាលកម្ពុជា មានអ្នកលំបាកមានកូនគ្រប់កំរិតចំនួន១០៤០នាក់ ដែលបានទទួលជោគជ័យ ហើយក្នុនោះ៨៤០នាក់ បានសំរាលហើយ។</span></p>
<p><span style="color: #000000;">លោកបានបន្តថា នេះជាការចូលរួម របស់ក្រសួងសុខាភិបាល និងរាជរដ្ឋាភិបាល ដើម្បីដោះស្រាយវិបត្តិ ដែលកើតចេញពីការលំបាកមានកូននៅកម្ពុជា ហើយក៏ជាកិត្តិយស មុខមាត់កម្ពុជាដែលឈានសំរេចបាននូវឡាបូ ដែលមានសមត្ថភាព និងគុណភាពស្មើប្រទេស ជឿនលឿន នៅប៉េងអ៊ឺរ៉ុប និងអាមេរិក៕</span></p>
<p><span style="color: #000000;"><img src="https://scontent-kul1-1.xx.fbcdn.net/t31.0-8/13268179_1603088593338839_7926792404706226872_o.jpg" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/t31.0-8/13198491_1603088590005506_562379376345478158_o.jpg" alt="" width="730" /></span></p>
<p><span style="color: #000000;"><img src="https://fbcdn-sphotos-e-a.akamaihd.net/hphotos-ak-xaf1/t31.0-8/13220712_1603088596672172_4006087311341509602_o.jpg" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/v/t1.0-9/13256104_1603089553338743_1300157775818010468_n.jpg?oh=b74cc9da8d5a3a5bf0f8bc6d447437a7&oe=579C3FC8" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>