<div>
<p><span style="color: #000000;"><strong>(ម៉ាឌ្រីដ)៖</strong> ជំនួបក្នុង Champions League រឹតតែតានតឹងខ្លាំងឡើងរាត្រីនេះ ខណៈដែលក្រុមម្ចាស់ផ្ទះ Atletico Madrid របស់អេស្ប៉ាញ ត្រូវការឈ្នះក្រុមភ្ញៀវមកពីហូឡង់ PSV Eindhoven ដើម្បីយកកៅអីមួយឡើងទៅវគ្គ៨ក្រុម ចុងក្រោយ គ្រាដែលម្ចាស់ផ្ទះ Manchester City មិនជាភ័យព្រួយប៉ុន្មានទេ ក្រោយយកឈ្នះ Dynamo Kyiv (Dynamo Kiev) របស់អ៊ុយក្រែន ៣-១ ហើយនោះកាលពីជើងទី១ ។</span></p>
<p><span style="color: #000000;">រាត្រីនេះជាការបញ្ចប់ជើង២ រវាងក្រុមទាំង៤ខាងលើនេះ ដើម្បីស្វែងរកអ្នកឈ្នះ និងអ្នកចាញ់ពិតប្រាកដ ស្របពេលដែលមាន៤ក្រុមហើយ បានឡើងទៅ ឈរចាំមុន Real Madrid, Wolfsburg, Paris Saint Germain និង Benfica ក្រោយបញ្ចប់ជើងទី២កាលពីសប្តាហ៍មុន ។</span></p>
<p><span style="color: #000000;">ក្រុមរងជើងឯក Champions League ឆ្នាំ២០១៤ Atletico Madrid ត្រូវបានគេព្យាករណ៍ទុកថា នឹងឈ្នះកៅអីមួយ ឡើងទៅវគ្គ៨ក្រុម ព្រោះជើងទី១ ទប់បានស្មើ ០-០ នៅក្នុងផ្ទះរបស់ PSV ដែលបង្កឲ្យមិនសូវជាយ៉ាប់ខ្លាំងនោះទេ សម្រាប់ជើងទី២ នាម៉ោង ២៖៤៥នាទីរំលងអាធ្រាត្រយប់នេះ (ម៉ោងនៅកម្ពុជា) ដោយត្រូវការឈ្នះតែ ១-០ ប៉ុណ្ណោះ ក្នុងខណៈដែល PSV ក៏ជាក្រុមខ្លាំង មួយដែលធ្លាប់លេងឈ្នះ Manchester United ២-១ កាលប្រកួតសន្សំពិន្ទុក្នុងពូល ។</span></p>
<p><span style="color: #000000;">ងាកមកមើល Manchester City វិញ គឺទប់តែស្មើក៏បានដែរ អាចប្រលែងឲ្យស៊ី ១-០ និង ២-០ ក៏បានដែរ ព្រោះមាន ៣គ្រាប់ក្នុងដៃហើយនោះ និងរបូតវិញតែ១គ្រាប់ប៉ុណ្ណោះ ទោះលេងបានស្មើ ០-០ Norwich City នៅ Premier League កាលពីចុងសប្តាហ៍មុន ៕</span></p>
<p style="text-align: center;"><span style="color: #000000;"><a class="thickbox" title="" href="/FileManager/Commons/2016/3/15/11a-15-03-2016--09-20-09.jpg"><img src="/FileManager/Articles/mce/2016/3/15/11a-15-03-2016--09-20-09.jpg" alt="" /></a><br /></span></p>
<p style="text-align: center;"><span style="color: #000000;">រូបភាពកាលពីជួបគ្នាក្នុងជើងទី១ លទ្ធផល ០-០ នៃវគ្គ១៦ក្រុម</span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>