<div class="item-page">
<p><span style="color: #000000;"><strong>(ភ្នំពេញ)៖</strong> តារាបាល់ទាត់លំដាប់ពិភពលោក Keisuke Honda ខ្សែប្រយុទ្ធដ៏ឆ្នើមនៃក្រុមសាំម៉ូរ៉ៃជប៉ុន និងបច្ចុប្បន្នលេងឲ្យក្លឹប AC Milan របស់ប្រទេសអីុតាលីនោះ បានមកជាន់ទឹកដីកម្ពុជា ជាលើកទី២ហើយនៅពេលនេះ។</span></p>
<p><span style="color: #000000;">លោក ខៀវ សាម៉េត អនុប្រធានសហព័ន្ធបាល់ទាត់ បានប្រាប់អង្គភាព Fresh News ថា Keisuke Honda បានធ្វើដំណើរមកដល់ប្រទេសកម្ពុជា នៅថ្ងៃរសៀលម្សិលមិញ ហើយនៅយប់ថ្ងៃនេះលោក បាននិងកំពុងជួបពិភាក្សាជាមួយនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់ នៅហាង សាំបាលើការជំរុញអភិវឌ្ឍន៍វិស័យកីឡាបាល់ទាត់ នៅកម្ពុជាកាន់តែរីកចំរើនខ្លាំងឡើង ដោយសារតែកីឡាករលំដាប់ពិភពលោកម្នាក់នេះបានប្តេជ្ញាមកបណ្តុះបណ្តាលដល់កូនខ្មែរជំនាន់ក្រោយ។</span></p>
<p><span style="color: #000000;">បើតាមលោក ខៀវ សាម៉េត នៅវេលាម៉ោង៩ ព្រឹកថ្ងៃទី២៦ ខែធ្នូ ឆ្នាំ២០១៦នេះ លោក Keisuke Honda ត្រូវបានសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា អនុញ្ញាតឲ្យចូលជួបពិភាក្សាការងារផងដែរ។</span></p>
<p><span style="color: #000000;">មន្រ្តីសហព័ន្ធបាល់ទាត់ ធ្លាប់បានបញ្ជាក់ថា តារាបាល់ទាត់លំដាប់ពិភពលោក Keisuke Honda រូបនេះ គ្រោងនឹងមកធ្វើកម្មវិធី Soccer Camp នៅទីក្រុងភ្នំពេញ ដើម្បីចែករំលែកបទពិសោធន៍បាល់ទាត់ដល់កុមារកម្ពុជា ដែលកម្មវិធីនោះមានឈ្មោះថា «Keisuke Honda’s SOLTILO GLOBAL SOCCER CAMP»។</span></p>
<p><span style="color: #000000;">គួរបញ្ជាក់ថា នេះគឺជាលើកទី២ហើយ ដែលខ្សែបម្រើប្រយុទ្ធកំពុងប្រកបអាជីពនៅលីគកំពូលអ៊ីតាលីជាមួយក្លឹប AC Milan លោក Keisuke Honda មកទស្សនកិច្ចផ្លូវការនៅកម្ពុជា គ្រាដែលលើកទី១ គឺមកសិក្សាពីគម្រោងបង្កើតសាលាបាល់ទាត់នៅកម្ពុជា ហើយបច្ចុប្បន្នសាលានោះ បានបើកដំណើរជាផ្លូវការហើយដែរ ដែលមានឈ្មោះថា «SOLTILO FAMILIA Soccer School» មានទីតាំងនៅទីលាន RooY7 និងទីលាន 3G។</span></p>
<p><span style="color: #000000;">លោក ខៀវ សាម៉េត បានបញ្ជាក់ថា លោក Keisuke Honda នឹងត្រឡប់ទៅវិញ នៅយប់ថ្ងៃស្អែក។</span></p>
<p><span style="color: #000000;"><img src="http://image.freshnewsasia.com/2016/fn-2016-12-25-22-28-21-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/fn-2016-12-25-22-09-30-0.jpg" alt="" width="730" /></span></p>
</div>
<div id="system-message-container">
<div id="system-message"></div>
</div>
<div class="span9" style="text-align: right;"><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></div>