<p><span style="color: #000000;"><strong>(ភ្នំពេញ)៖</strong> ស្របពេលដែលការរិះគន់ អំពីក្រមសីលធម៌របស់អ្នកសារព័ត៌មាន ពិធីករ ពិធីការិនី មានការកើនឡើងនៅក្នុងសង្គមកម្ពុជា លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា (ស.ស.ស.ក) បានអំពាវនាវឱ្យអ្នកសារព័ត៌មាន និងអ្នកលេង Facebook ទាំងអស់ប្រកាន់ខ្ជាប់នូវ «កុំ ៦យ៉ាង និង ធ្វើ១»។</span></p>
<p><span style="color: #000000;">លោក ហ៊ុយ វណ្ណៈ បានលើកឡើងនៅថ្ងៃទី២៦ ខែមករា ឆ្នាំ២០១៧នេះថា «ឥរិយាបទ សីលធម៌ និងការទទួលខុសត្រូវ របស់អ្នកសារព័ត៌មាន និងអ្នកលេង Facebook ដែលត្រូវប្រកាន់ខ្ជាប់គឺ៖ "៦កុំ ១ធ្វើ"»។</span></p>
<p><span style="color: #000000;">លោកបានបន្ថែមទៀតថា <strong>«៦កុំ គឺ៖ កុំជោរ - កុំជេរ - កុំលោត - កុំលើកជើង - កុំសួរជំរិត និង កុំបំពុល។ រីឯ១ធ្វើគឺ៖ ផ្សាយតែព័ត៌មានការពិត លឿន និង មានតម្លៃ។ បើខុសគឺត្រូវហ៊ានសុំទោសកែតម្រូវ! ហើយបើត្រូវ កុំខ្លាចគេប្តឹង — សេចក្តីថ្លៃថ្នូររបស់សង្គមយើង គឺត្រូវការការចូលរួមពីទាំងអស់គ្នា គ្រប់គ្នា រួមទាំងពីបណ្តាញផ្សព្វផ្សាយ អ្នកសារព័ត៌មាន និងអ្នកសម្តែងតាម Facebook!»</strong>។</span></p>
<p><span style="color: #000000;">ក្រមសីលធម៌ និងតម្លៃសារព័ត៌មាន ពិធីករ ពិធីការិនីខ្មែរ ត្រូវបានសាធារណជនរិះគន់យ៉ាងខ្លាំង នៅមួយរយៈចុងក្រោយនេះ ជាពិសេសបន្ទាប់ពីទង្វើអសីលធម៌ ដែលកើតចេញពីកម្មវិធី ABC 3 Spring នៅលើកញ្ចក់ទូរទស្សន៍ប៉ុស្តិ៍លេខ៣ កាលពីសប្តាហ៍មុន។ សាធារណជនបានរិះគន់ ពិធីការិនី នៅក្នុងកម្មវិធីនេះ ដែលបានលោតផ្លោះពីលើតុវេទិកាគ្រាដែលកំពុង Live (ផ្សាយផ្ទាល់) ជូនទស្សនិកជន និងបានសម្តែងការប្រតិកម្មខ្លាំងៗទៅកាន់មហាជនវិញ ដោយអកប្បកិរិយាមិនសមរម្យ។</span></p>
<p><span style="color: #000000;">ទោះជាយ៉ាងណា កាលពីថ្ងៃទី២៤ ខែមករា ឆ្នាំ២០១៧ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានចេញលិខិតមួយ ដោយបង្គាប់ឱ្យទូរទស្សន៍ប៉ុស្តិ៍លេខ៣ ឈប់ជួលម៉ោងឱ្យវិទ្យុ ABC។ នេះបើយោងតាមលិខិតរបស់ក្រសួងព័ត៌មានដែលអង្គភាពព័ត៌មាន Fresh News ទទួលបាន។</span></p>
<p><span style="color: #000000;">លោក ខៀវ កាញារីទ្ធ បានបញ្ជាក់ថា កម្មវិធីនេះ ធ្វើឱ្យមហាជនជាច្រើនរិះគន់ទៅលើពិធីករ ពិធីការិនី ដែលបានប្រព្រឹត្តិនូវអំពើពុំគួរគប្បី ដោយសម្តែងកាយវិការមិនសមរម្យ ការប្រើពាក្យសម្តីខ្វះសីលធម៌ វិជ្ជាជីវៈ ជាអ្នកសារព័ត៌មាន និងបានប្រមាថមើលងាយអ្នកស្តាប់៕</span></p>
<p><span style="color: #000000;"><img src="http://image.freshnewsasia.com/2017/011/fn-2017-01-24-19-21-31-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>