<p><strong>ភ្នំពេញ៖</strong> ជាការវិវត្តន៍មួយជំហានទៀត របស់រាជធានីភ្នំពេញនា ខែកុម្ភះឆ្នាំ២០១៤ខាងមុខនេះ សាលារាជធានីភ្នំពេញ នឹងដំណើរការសាកល្បង លើសេវារថយន្តក្រុងសាធារណៈ ដើម្បីរួម ចំណែក កាត់បន្ថយការកក់ស្ទះ ចរាចរណ៍នៅទីក្រុង។</p>
<p>ការសាកល្បងសេវារថយន្តក្រុងសាធារណៈនេះ ត្រូវបានអ្នកនាំពាក្យសាលារាជធានី ភ្នំពេញ លោកឡុង ឌីម៉ង់ ថ្លែងប្រាប់មជ្ឈមណ្ឌលព័ត៌មានដើមអម្ពិលថា នេះគ្រាន់តែជាគម្រោងសាក ល្បងប៉ុណ្ណោះ ដែលទីភ្នាក់ងារ សហប្រតិបត្តិការអន្តរជាតិជប៉ុន (JICA)ប្រជុំពិភាក្សាជាមួយ គ្នាកាលពីថ្ងៃទី៣ខែធ្នូ ឆ្នាំ២០១៣ ។</p>
<p>លោកឌីម៉ង់ បន្តថាលោកសង្ឃឹមថា គម្រោងសាកល្បងសេវារថយន្តក្រុងសាធារណៈនេះនឹង មានការគាំទ្រពីប្រជាពលរដ្ឋ រស់នៅក្នុងរាជធានីភ្នំពេញ ដោយសារតែស្ថានភាពចរាចរណ៍ក្នុង រាជធានីភ្នំពេញបច្ចុប្បន្នមានការកក់ស្ទះ។</p>
<p>បើតាមអ្នកនាំពាក្យសាលារាជធានីភ្នំពេញ រថយន្តក្រុងនឹងរត់ តាមបណ្ដោយមហាវិថីព្រះមុនីវង្ស ហើយដំណើរការពីម៉ោង ៥ និង៣០ នាទីព្រឹក ដល់ ម៉ោង ៨ និង៣០ នាទីយប់។ ចម្ងាយដំណើរ ការសេវារថយន្តក្រុងសាធារណៈនេះ មានប្រហែល ៧,៥ គីឡូម៉ែត្រ គឺគិតចាប់ពីស្ដាតចាស់ ទៅ កាន់ផ្សារច្បារអំពៅ ហើយបើទទួលបានការគាំទ្រ គម្រោងនេះនឹងត្រូវស្នើទៅរដ្ឋាភិបាល ដើម្បី ដំណើរការជារៀងរហូត។</p>
<p>លោកបន្ថែមថា «បញ្ហាតំលៃយើងកំពុងសិក្សាជាមួយដៃគូពាក់ព័ន្ធ ហើយខ្ញុំក៏សុំអំពាវនាវឲ្យ ប្រជាពលរដ្ឋគាត់សាកល្បងជាមួយយើង ព្រោះស្ថានភាពរាជធានីភ្នំពេញឥឡូវ មានការផ្លាស់ ប្ដូរច្រើនមិនដូចលើកមុននោះទេ»។</p>
<p>ជាការគត់សម្គាល់ការកក់ស្ទះចរាចរណ៍បានក្លាយជា ទម្លាប់មួយទៅហើយសំរាប់រាជធានីភ្នំពេញ ដែរមូលដ្ឋានសេដ្ឋកិច្ច របស់ប្រទេស។</p>
<p>សូមបញ្ជាក់ថា កាលពីឆ្នាំ២០០២ នៅរាជធានីភ្នំពេញ ធ្លាប់បានដាក់សាកល្បងម្ដងរួចហើយ នូវសេវារថយន្តក្រុងសាធារណៈ ប៉ុន្តែត្រូវបានបរាជ័យដោយ មិនមានការគាំទ្រពីប្រជាពលរដ្ឋ៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2013/December/id-100/r_0002.jpg" alt="" width="450" height="251" /></p>
<p style="text-align: right;">ផ្តល់សិទ្ធិដោយ៖ ដើមអំពិល</p>