<div class="article-content">
<p><strong>តាកែវ៖</strong> លោក ស៊ិន ពៅ មេប៉ុស្តិ៍នគរបាលឃុំគិរីចុងកោះ ស្ថិតក្នុងស្រុកគិរីវង់ ខេត្តតាកែវ បានទាញកាំភ្លើងអាកា បាញ់សម្លាប់កំណានចិត្តរបស់ខ្លួន ជានារីខារ៉ាអូខេ ព្រោះប្រច័ណ្ឌនឹងកំណានចិត្តរបស់ខ្លួនត្រូវកៀកកើយជាមួយ បុរសៗតាមក្លឹបខារ៉ាអូខេស្ទើររាល់រាត្រី។</p>
<p>នាយការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តតាកែវ លោក សែម សុជាតិ បាន ថ្លែងប្រាប់មជ្ឈមណ្ឌលព័ត៌មានដើមអម្ពិលនាព្រឹកថ្ងៃសៅរ៍ ទី២២ ខែមីនា ឆ្នាំ២០១៤នេះថា ហេតុការណ៍បាញ់ ប្រហារកើតចេញពីជម្លោះព្រោះភ្លើងប្រច័ណ្ឌនេះ បានកើតឡើងកាលពីវេលាម៉ោង ៨ និង៥០នាទីយប់ថ្ងៃទី២១ ខែ មីនា ឆ្នាំ២០១៤ នៅក្នុងបន្ទប់ផ្ទះជួលរបស់នារីរងគ្រោះ ស្ថិតក្នុងភូមិត្រពាំងអង្គ សង្កាត់រកាក្រៅ ក្រុងដូនកែវ ខេត្តតាកែវ។</p>
<p>បើតាមលោក សែម សុជាតិ នារីរងគ្រោះ មានឈ្មោះ សន យិន អាយុ ២៨ឆ្នាំ រស់នៅក្នុងបន្ទប់ជួលកន្លែងកើត ហេតុខាងលើ ប្រកបរបរជានារីខារ៉ាអូខេ ដើម្បីជីវិតខ្លួនឯង និងកូនប្រុសម្នាក់ទៀត មានអាយុ ៩ឆ្នាំ។ រីឯលោកម៉េ ប៉ុស្តិ៍ជាជនដៃដល់នោះ មានឈ្មោះ ស៊ិន ពៅ អាយុ ៤៦ឆ្នាំ។ លោកមេប៉ុស្តិ៍ ស៊ិន ពៅ មានប្រពន្ធ និងកូនរួចទៅ ហើយផងដែរ។</p>
<p>បើតាមប្រភពពីប្រជាពលរដ្ឋខ្មែរខាង បានប្រាប់ឲ្យដឹងថា លោកមេប៉ុស្តិ៍ ស៊ិន ពៅ ទោះបីមានប្រពន្ធ និងកូនរួច ទៅហើយក្តី តែរូបលោកបានទាក់នារីរងគ្រោះ សន យិន ធ្វើជានារីកំណានចិត្តជាច្រើនខែមកហើយ ហើយពួកគេ តែងចេញចូលជួបគ្នាជាញឹកញាប់នៅក្នុងបន្ទប់ផ្ទះជួលខាងលើ។</p>
<p>លុះនៅយប់ថ្ងៃកើតហេតុព្រោះតែរឿងប្រច័ណ្ឌនឹងនារីកំណាន ដែលមានមុខរបរជានារីខារ៉ាអូខេ តែងដើរច្រៀង តាមក្លឹបរាត្រីនានា ជាពិសេសត្រូវកៀកកើយជាមួយបុរសដទៃស្ទើររាល់យប់នោះ បានធ្វើឲ្យលោកមេប៉ុស្តិ៍ ស៊ិន ពៅ ផ្ទុះកំហឹងឈ្លោះប្រកែកគ្នា រុញទ្រូងចុះឡើង។ លុះមួយសន្ទុះក្រោយមកលោកមេប៉ុស្តិ៍ទប់កំហឹងលែងបាន ក៏ទាញកាំភ្លើងបាញ់ទៅលើនារីរងគ្រោះ បណ្តាលឲ្យស្លាប់ភ្លាមៗនៅក្នុងបន្ទប់ជួល។</p>
<p>បន្ទាប់ពីបាញ់ប្រហារហើយ លោកមេប៉ុស្តិ៍បានទាញម៉ូតូជិះគេចខ្លួនបាត់ស្រមោល។</p>
<p>នាយនគរបាលព្រហ្មទណ្ឌកម្រិតធ្ងន់ លោក សែម សុជាតិ បានបញ្ជាក់ថា នារីរងគ្រោះត្រូវលោកមេប៉ុស្តិ៍ជាបុរស កំណានចិត្តបាញ់ត្រូវក្រោមក្លៀកខាងស្តាំមួយគ្រាប់។</p>
<p>លោក សែម សុជាតិ បានបញ្ជាក់ទៀតថា កម្លាំងនគរបាលខេត្តតាកែវ កំពុងតាមស្វែងរកចាប់ខ្លួនលោកមេប៉ុស្តិ៍ ដៃដល់មកផ្តន្ទាទោសតាមច្បាប់។ ដោយឡែកសពនារីរងគ្រោះត្រូវបានប្រគល់ជូនក្រុមគ្រួសារយកទៅធ្វើបុណ្យ តាមប្រពៃណី៕</p>
<p style="text-align: center;"><img src="http://111.92.240.170:81//dap-news/dap-images/2014/January/id-009/saray-011.jpg" alt="Photo by DAP-NEWS" width="550" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>