<h2>(<span style="color: #000000; font-size: 12px;" lang="KHM">វ៉ាស៊ីនតោន)៖</span><span style="color: #000000; font-size: 12px;"> </span><span style="color: #000000; font-size: 12px;" lang="KHM">សេតវិមានកំពុងតែព្យាយាម ស្វែងរកយន្តហោះថ្មី ដើម្បីយកមកធ្វើការផ្លាស់ប្តូរ ជំនួសឲ្យយន្តហោះ </span><span style="color: #000000; font-size: 12px;">Air Force One </span><span style="color: #000000; font-size: 12px;" lang="KHM">ដែលពិភពលោកបានស្គាល់ហើយថា វាប្រៀបដូចជាបន្ទាយនៅ លើផ្ទៃអាកាសរបស់ ប្រធានាធិបតីអាមេរិកអ៊ីចឹង ដោយសារតែយន្តហោះ </span><span style="color: #000000; font-size: 12px;">Air Force One </span><span style="color: #000000; font-size: 12px;" lang="KHM">ដែលកំពុងប្រើប្រាស់សព្វថ្ងៃគឺ </span><span style="color: #000000; font-size: 12px;">Boeing 747-200 </span><span style="color: #000000; font-size: 12px;" lang="KHM">ទាំងពីរគ្រឿងមានអាយុកាល ជិតបីទសវត្សរ៍មកហើយ។ នេះបើតាមការចេញផ្សាយ ដោយសារព័ត៌មានរុស្ស៊ី </span><span style="color: #000000; font-size: 12px;">Sputnik </span><span style="color: #000000; font-size: 12px;" lang="KHM">នៅយប់ថ្ងៃព្រហស្បតិ៍ ទី១៧ ខែវិច្ឆិកា ឆ្នាំ២០១៦។</span></h2>
<p> </p>
<p><span style="color: #000000;">លោក Kevin W. Buckley ប្រធានមជ្ឈមណ្ឌលគ្រប់គ្រង វដ្តជីវិតយន្តហោះអាមេរិកបានឲ្យដឹងថា យន្តហោះប្រភេទដឹកអ្នកដំណើរ របស់ក្រុមហ៊ុន Boeing មានអាយុកាលប្រើប្រាស់ ត្រឹមតែ៣០ឆ្នាំប៉ុណ្ណោះ ហើយយន្តហោះ Air Force One ដែលកំពុងប្រើសព្វថ្ងៃនឹងឈាន ដល់រយៈពេលនេះបីទសវត្សរ៍ល្មម នៅឆ្នាំ២០១៧ខាងមុខនេះ ចំពេលដែលលោក ដូណាល់ ត្រាំ ចូលស្បថកាន់តំណែងជាប្រធានាធិបតីទី៤៥ របស់សហរដ្ឋអាមេរិកតែម្តង។</span></p>
<p><span style="color: #000000;">ពាក់ព័ន្ធនឹងបញ្ហានេះអាច សម្រេចទៅតាមតែចិត្តចង់បានភ្លាមៗនោះ លោក Buckley គ្រោងធ្វើការផ្លាស់ប្តូរយន្តហោះ Air Force One ឲ្យបានរួចរាល់យ៉ាងហោចណាស់ ក៏ដល់ឆ្នាំ២០២៤ដែរ ដោយនឹងទិញយន្តហោះធុន Boeing 747-8 ចាប់ពីពីរទៅបីគ្រឿងដែលវាមានទំហំធំជាង ប៉ុន្តែសំចៃសាំងជាងយន្តហោះទាំងពីរគ្រឿង របស់សេតវិមានបច្ចុប្បន្ន។</span></p>
<p><span style="color: #000000;">ដោយឡែកអ្នកវិភាគឯកទេស អាកាសចរណ៍មួយរូបនៅមកពីក្រុមហ៊ុន Teal Group នៃរដ្ឋ Virginia គឺលោក Richard Aboulafia បានលើកឡើងថា «ទម្រាំតែការផ្លាស់ប្តូរសម្រេចទៅបាន យន្តហោះ Air Force One ទាំងពីរគ្រឿងដែលកំពុងប្រើប្រាស់នឹងឈានដល់ជិត៤០ឆ្នាំបាត់ទៅហើយ» ខណៈលោក Buckley បានឲ្យដឹងដែរថា យន្តហោះរបស់ទ័ពអាកាសអាមេរិកជារឿយៗ ត្រូវបានប្រើសម្រាប់ហោះហើរ លើសពីរយៈពេល៣០ឆ្នាំ ប៉ុន្តែរឿងនេះមិនធ្វើទៅរួចជាមួយនឹងយន្តហោះ សម្រាប់ដឹកប្រធានាធិបតី នៃប្រទេសមហាអំណាចពិភពលោកមួយទាំងមូលនោះឡើយ។</span></p>
<p><span style="color: #000000;">គួរបញ្ជាក់ថា យន្តហោះ Boeing 747-8 ក្នុងមួយគ្រឿងមានតម្លៃ ប្រហែល៣៧០លានដុល្លារ ដោយនេះមិនទាន់រាប់បញ្ចូលទាំងការកែច្នៃ ឲ្យក្លាយជាយន្តហោះប្រធានាធិបតីអាមេរិក Air Force One ដែលរួមមានប៉ុស្តិ៍បញ្ជាការអាកាស, បរិក្ខាទំនាក់ទំនងសព្វបែបយ៉ាង, សម្ភារៈការពារដូចជាមីស៊ីលប្រឆាំងយន្តហោះចម្បាំងជាដើម ហើយជាងនេះទៅទៀតនេះយន្តហោះ Air Force One ត្រូវបានគេកែច្នៃឲ្យវាមានសមត្ថភាព ធ្វើប្រតិបត្តិការបានជាធម្មតា សូម្បីតែនៅក្នុងកាលៈទេសៈនៃសង្រ្គាម នុយក្លេអ៊ែរថែមទៀតផង ចំណែកឯកងទ័ពជើងអាកាស អាមេរិកបានអះអាងថា ខ្លួនមានថវិកាប្រមាណ១.៦៥ពាន់លានដុល្លារ សម្រាប់គំរោងផ្លាស់ប្តូរដ៏សំខាន់នេះ៕</span></p>
<p><a class="thickbox" title="" href="/FileManager/Commons/2016/11/18/27a-18-11-2016--10-10-19.jpg"><img src="/FileManager/Articles/mce/2016/11/18/27a-18-11-2016--10-10-19.jpg" alt="" /></a><br /><br /></p>
<p style="text-align: right;"><span style="font-size: 12px; color: #000000;">ផ្តល់សិទ្ធដោយ ៖ ហ្រ្វេសញូវអាស៊ី </span></p>