<p><span style="color: #000000;"><strong>(ភ្នំពេញ)៖</strong> កីឡាការិនីតេក្វាន់ដូឆ្នើមកម្ពុជា ស៊ន សៀវម៉ី នឹងត្រូវប្រជែងទល់នឹងកីឡាការិនី Reshimie Oogink មកពីប្រទេសហូឡង់ ក្នុងជុំទី១ ប្រភេទទម្ងន់លើស ៦៧គីឡូក្រាម (+67Kg) ក្នុងព្រឹត្តិការណ៍កីឡាអូឡាំពិក រដូវក្តៅ នៅទីក្រុង Rio de Janeiro 2016 នៃប្រទេសប្រេស៊ីល។</span></p>
<p><span style="color: #000000;">យោងតាម Facebook Page ផ្លូវការរបស់គណៈកម្មាធិការជាតិអូឡាំពិកកម្ពុជា (NOCC) បានឲ្យដឹងថា នេះជា១ប្រកួតរបស់ម្ចាស់មេដាយមាសប្រចាំទ្វីបអាស៊ី ដែលត្រូវប្រជែងទល់នឹងកីឡាការិនីហូឡង់ Oogink ក្នុងវគ្គ១៦នាក់ ប្រភេទកីឡាតេក្វាន់ដូ ទម្ងន់ធ្ងន់ វិញ្ញាសា +៦៧គីឡូក្រាម ក្នុងការប្រជែងយកមេដាយឡើងទៅវគ្គ៨នាក់ចុងក្រោយ និងស្វែងរកមេដាយនៅក្នុងកីឡាអូឡាំពិក លើកទី៣១ នេះ។</span></p>
<p><span style="color: #000000;">ពួកគេទាំងពីរ នឹងត្រូវប្រកួតគ្នានៅថ្ងៃទី២០ ខែសីហា ឆ្នាំ២០១៦ គ្រាដែលម្ចាស់មេដាយមាស នៃវគ្គជម្រុះកីឡាអូឡាំពិក ប្រចាំទ្វីបអាស៊ី ស៊ន សៀវម៉ី វ័យ២០ឆ្នាំ កម្ពស់ ១.៨៣ម៉ែត្រ ប៉ះកីឡាការិនីហូឡង់ ដែលមានវ័យ២៧ឆ្នាំ កម្ពស់ ១.៧៩ម៉ែត្រ ដែលជាជើងខ្លាំងមួយរូបផងដែរ។</span></p>
<p><span style="color: #000000;">សូមរំលឹកផងដែរថា សម្រាប់ការចូលរួមព្រឹត្តិការណ៍ដែលមានរយៈពេល ៤ឆ្នាំម្តង ឆ្នាំ២០១៦នេះ កម្ពុជា បានបញ្ជូន ៤ប្រភេទកីឡាចូលរួមនឹងគេដែរ រួមមានកីឡាតេក្វាន់ ១រូប កីឡាហែល ២រូប កីឡាចំបាប់ ១រូប និងកីឡាអត្តពលកម្ម ២រូប ក្រោមការដឹកនាំរបស់លោក វ៉ាត់ ចំរើន អគ្គលេខាធិការ NOCC ដែលបានចេញដំណើរទៅប្រទេសប្រេស៊ីល តាំង ពីរាត្រីថ្ងៃព្រហស្បតិ៍ ទី២៨ ខែកក្កដា ឆ្នាំ២០១៦ ស្របពេលដែលក្រុមបាល់ទាត់ជម្រើសជាតិកម្ពុជា បានកែប្រែប្រវត្តិសាស្រ្តថ្មី យកឈ្នះក្រុមសិង្ហបុរី ដោយលទ្ធផល ២-១ ក្នុងមិត្តភាពអន្តរជាតិនៅពហុកីឡដ្ឋានជាតិអូឡាំពិក៕</span></p>
<p><span style="color: #000000;"><img src="https://scontent-kul1-1.xx.fbcdn.net/t31.0-8/13920046_1052939131460114_1845193254726195093_o.jpg" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/v/t1.0-9/13912740_1759605847612266_8016199683335030969_n.jpg?oh=954f9d446196903275d80dfd2a48ad1a&oe=581A2BB4" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/t31.0-8/13641252_1052939058126788_7186864151582286624_o.jpg" alt="" width="730" /></span></p>
<p><span style="color: #000000;"><img src="https://fbcdn-sphotos-e-a.akamaihd.net/hphotos-ak-xpa1/t31.0-8/13908830_1052939258126768_5854987902791998574_o.jpg" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/t31.0-8/13909346_1052939324793428_9019450462012689572_o.jpg" alt="" width="730" /></span></p>
<p><span style="color: #000000;"><img src="https://fbcdn-sphotos-a-a.akamaihd.net/hphotos-ak-xtp1/t31.0-8/13661963_1052939418126752_4541419466672278091_o.jpg" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/t31.0-8/13653450_1052939494793411_7287290936889990975_o.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>