<p><strong>ភ្នំពេញ៖</strong> តារាសម្តែងភេទទីបី បានវះកាត់ កែកុនចង្កឹះលេខបានសម្រេច ក្លាយជាមនុស្សស្រី ពេញលក្ខណៈ និងជាពិធីការិនី មានទម្រង់មុខ ស្រស់ស្អាត កញ្ញា ប៉ុបពី មុននេះ មហាជនបាន ដឹងស្ទើរគ្រប់គ្នា ជុំវិញការប្រកាស បើកបេះដូង រង់ចាំទទួលយកស្នេហ៍ថ្មី ពីបុរសដែលមាន ទឹកចិត្តស្មោះត្រង់ ហើយអាចរួមរស់ស្នេហ៍ពិត ជាមួយគ្នា អស់មួយជីវិត។ ខណៈការប្រកាសនេះ បានប្រហែលទើប៦ខែ ស្រាប់តែធ្លាយដំណឹង ដ៏គួរឲ្យភ្ញាក់ផ្អើលថា ពេលនេះគូស្នេហ៍ចាស់ បានចេញមុខមក ពាំងឃាំងបេះដូង ប៉ុបពី ជាថ្មីឡើងវិញ។</p>
<p>យោងតាមប្រភព ពីអ្នករស់នៅក្បែរខាងតារារូបនេះ បាននិយាយប្រាប់ឲ្យដឹងថា តារាសម្តែងជាប់ លំដាប់ថ្នាក់ កញ្ញា ប៉ុបពី ឥឡូវនេះ កំពុងតែត្រូវរ៉ូវគ្នា និងផ្សះផ្សាស្នេហ៍ ជាថ្មីឡើងវិញ ជាមួយ បុរសគូស្នេហ៍ចាស់ ដែលធ្លាប់បោះបង់ចោល ទុកបេះដូងនាងឲ្យនៅកំព្រារងាឯកា អស់មួយ រយៈពេលធំ។</p>
<p>ប្រភពខាងលើ បានបញ្ចេញមកថា បច្ចុប្បន្នអ្នកទាំងពីរ ហាក់មានភាពស្និទ្ធស្នាល ជាមួយគ្នាដូច ដើមឡើងវិញ ក្រោយពេលបុរសម្នាក់នេះ បានរត់មករកសុំក្តីមេត្តា ស្នេហាជាថ្មី ពី កញ្ញា ប៉ុបពី រហូតនាងបាក់ចិត្ត ទន់អារម្មណ៍ យល់ព្រមលើកលែង ទោសកំហុសទាំងឡាយ និងផ្តល់ឱកាសឲ្យ បុរសជាគូស្នេហ៍ចាស់។ ជាមួយគ្នានេះ គេតែងសង្កតឃើញអ្នកទាំងពីរ ឧស្សាហ៍បណ្តើរគ្នា ចេញចូល ទៅញ៉ាំបាយ នៅគេហដ្ឋានខាងស្រី ជាញឹកញាប់។</p>
<p>ផ្តល់សម្ភាសន៍ឲ្យ គេហទំព័រ LookingTODAY នៅព្រឹកថ្ងៃទី១៣ ខែកុម្ភៈ ឆ្នាំ២០១៤នេះ តារាសម្តែង និងពិធីការិនី កញ្ញា ប៉ុប ពី បានប្រាប់ឲ្យដឹងថា "ចាស…បង! ជាការពិតណាស់ ឥឡូវភ្លើងស្នេហ៍ ចាស់រវាងខ្ញុំ និងគាត់បានចាប់ផ្តើម ឡើងវិញជាថ្មីម្តងទៀត ព្រោះបុរសគូស្នេហ៍ចាស់ បានវិល ត្រឡប់ មករកខ្ញុំ ដើម្បីផ្សះផ្សាគ្នា..(សើច).. ខ្ញុំ និងគាត់ទើបតែ ត្រូវគ្នាបានប្រហែលជា កន្លះខែ នេះទេ..."។</p>
<p>កញ្ញា ប៉ុប ពី បានបន្តថា "បើនិយាយពីការបែកគ្នា ខ្ញុំនិងគាត់ (អតីតសង្សារ) គឺបានផ្តាច់ទំនាក់ទំនង ជាង៣ឆ្នាំមកហើយ តែមិនដឹងថា ហេតុអ្វី ទើបពេលនេះ គាត់វិញមករកខ្ញុំវិញ។ ប៉ុន្តែខ្ញុំអត់ប្រកាន់ នឹងគាត់ទេ ព្រោះគិតថា ប្រហែលជាគាត់ មើលឃើញអំពើល្អ ដែលធ្លាប់ សាងអនុស្សាវរីយ៍ ពីមុន មកហើយមើលទៅ..!។ បើតាមខ្ញុំសង្កេតមើល ទៅពេលនេះ គាត់ហាក់ដូចជាគិត និងបារម្ភពីខ្ញុំ ច្រើន ខុសប្លែកជាងពេលមុន..!"។</p>
<p>យ៉ាងក្តី កញ្ញា ប៉ុប ពី បានបញ្ជាក់បន្ថែមថា នាងបានផ្តល់ឱកាសជាថ្មី សម្រាប់បុរសជាគូស្នេហ៍ ចាស់ ក្នុង ការមើលថែ ក្តីស្រឡាញ់នេះឡើងវិញ តែនៅត្រង់ថា ទៅថ្ងៃខាងមុខទៀត ក្លាយទៅ ជាយ៉ាងណានោះ គឺ អាស្រ័យទៅតាម ពេលវេលាជាអ្នកកំណត់។ ចំណែកឯក្តីស្រឡាញ់ ដែល នាងប្រគល់ ទៅលើបុរសគូស្នេហ៍ ចាស់ពេលនេះ គឺទើបតែ៥០ភាគរយតែប៉ុណ្ណោះ។</p>
<p>គួររំឭកថា កាលពីពេលកន្លងទៅ កញ្ញា ប៉ុបពី បានចេញមុខប្រកាស ជាសាធារណៈឲ្យមហាជន ដឹងថា នាងនឹងចាប់ផ្តើម សាងជីវិតស្នេហាជាថ្មី ខណៈដែលមានបុរសៗ ជាច្រើន បានតាមចោម រោម ទាក់ទងសុំសេចក្តីស្រឡាញ់ពីនាង។ ការប្រកាសនេះ បានធ្វើឡើង ក្រោយពេលដែល ប៉ុប ពី បានបែកបាក់ស្នេហ៍ ជាមួយបុរស ជាគូស្នេហ៍ម្នាក់នេះ ដោយសារតែការ មិនចុះសម្រុងនឹងគ្នា ។ ប៉ុន្តែការប្រកាសនេះ មិនទាន់បានយូរប៉ុន្មាន បុរសជាគូស្នេហ៍ បានរើបង្វេចរត់ មករកនាងវិញ គួរឲ្យភ្ញាក់ផ្អើល៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-099/v_0324.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-099/v_0325.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-099/v_0326.jpg" alt="" width="600" /></p>
<p style="text-align: right;">ផ្តល់សិទ្ធិដោយ៖ <a href="http://www.lookingtoday.com/index.php/entertainment-general-news/27619-2014-02-14-03-19-38.html"><span style="color: #0000ff;">ដើមអំពិល</span></a></p>