<p><span style="color: #000000;"><strong>(ហាណូយ)៖</strong> វៀតណាមបានបញ្ជាក់ នូវករណីកម្របំផុតមួយនៃកូនភ្លោះដែលមានឪពុកពីរនាក់ (កូនភ្លោះមានឪពុកផ្សេងគ្នា) នេះបើតាមសាស្ត្រាចារ្យ នៅមន្ទីរពិសោធន៍ DNA នាទីក្រុង Hanoi ចេញផ្សាយដោយសារព័ត៌មានស៊ិនហួ នៅយប់ថ្ងៃទី៨ ខែមីនា ឆ្នាំ២០១៦នេះ។</span></p>
<p> </p>
<p><span style="color: #000000;">កូនភ្លោះមួយគូ បានកើតមកក្នុងគ្រួសារប្តីប្រពន្ធជនជាតិវៀតណាមមួយ ដែលមិនត្រូវបានបញ្ចេញឈ្មោះ ថ្មីៗនេះត្រូវបានបញ្ជូនទៅធ្វើការពិសោធន៍ ដោយសារតែ រូបភាពរបស់ទារកភ្លោះកើតមក មានរូបរាងខុសពីគ្នាដាច់ស្រឡះ។ <strong>«មជ្ឈមណ្ឌលរបស់យើង បានធ្វើពិសោធន៍ និងរកឃើញកូនភ្លោះ មានឪពុកផ្សេងពីគ្នា»</strong> នេះបើតាមសម្តីលោក Le Dinh Luong ប្រធានសមាគមពូជវៀតណាម បានឲ្យដឹងយ៉ាងដូច្នេះ។</span></p>
<p><span style="color: #000000;">លោកវេជ្ជបណ្ឌិត បានបន្តថា វាមិនត្រឹមតែជាករណីកម្រ សម្រាប់វៀតណាមនោះទេ ប៉ុន្តែសម្រាប់ពិភពលោកទាំងមូល ជាមួយនឹងកូនភ្លោះមានឪពុកផ្សេងពីគ្នា ប៉ុន្តែមានម្តាយតែមួយ។ វាអាចកើតមានករណីនេះឡើង ប្រសិនបើស៊ុតចំនួន២ មកពីម្តាយម្នាក់ បានជួបជាមួយនឹងទឹកកាម មកពីបុរសចំនួន២នាក់ នៅអំឡុងពេលរួមភេទដាច់ដោយឡែកពីគ្នា តែក្នុងអំឡុងពេលបញ្ចេញអូវុលដូចគ្នា។</span></p>
<p><span style="color: #000000;">ប្តីជនជាតិវៀតណាម ត្រូវជាឪពុកកូនភ្លោះនេះ បានស្នើឲ្យមានការពិសោធន៍ នៅមន្ទីរពិសោធន៍ Hanoi ដើម្បីកំណត់ថា តើជាឪពុកពិតមែន នៃទារកភ្លោះនេះ ឬយ៉ាងណា។ លទ្ធផលបានបង្ហាញថា បុរសនោះមានការជាប់ពាក់ព័ន្ធនឹងទារកតែម្នាក់ប៉ុណ្ណោះ ក្នុងចំណោមទារកភ្លោះ២នាក់នោះ។</span></p>
<p><span style="color: #000000;">ស្រ្តីជាម្តាយត្រូវបានពិសោធន៍ឃើញថា ជាម្តាយពិតប្រាកដនៃកូនភ្លោះទាំងពីរ។ កូនភ្លោះទាំងពីរមានភេទដូចគ្នា បានកើតមកក្នុងថ្ងៃតែមួយ គ្រាន់តែក្រោយគ្នាប៉ុន្មានម៉ោងប៉ុណ្ណោះ ប៉ុន្តែមានរូបរាងខុសគ្នាទាំងស្រុង។ តាមរបាយការណ៍មួយបានឲ្យដឹងថា មកដល់ពេលនេះកូនភ្លោះទាំងពីរ មានអាយុ២ឆ្នាំហើយ ដោយម្នាក់មានមាឌធាត់ សក់រួញ និងម្នាក់ទៀតស្គម សក់ត្រង់។</span></p>
<p><span style="color: #000000;">សូមជំរាបថា មានករណីកម្រមួយទៀត នៃកូនភ្លោះឪពុកផ្សេងគ្នានេះ ត្រូវបានគេរាយការណ៍ថា បានកើតឡើងនៅសហរដ្ឋអាម៉េរិក នៅពេលដែល តុលាការបានសម្រេចថា បុរសម្នាក់ត្រូវបានតម្រូវឲ្យទទួលខុសត្រូវលើកុមារីម្នាក់ប៉ុណ្ណោះ ក្នុងចំណោមកូនភ្លោះ២នាក់ បន្ទាប់ពីការពិសោធន៍ DNA បានបង្ហាញថា បុរសនោះមិនមែនជាឪពុក នៃកូនភ្លោះទាំង២នោះទេ៕</span></p>
<p> </p>
<p><a class="thickbox" title="" href="/FileManager/Commons/2016/3/9/176-09-03-2016--14-26-29.jpg"><img src="/FileManager/Articles/mce/2016/3/9/176-09-03-2016--14-26-29.jpg" alt="" /></a></p>
<p> <span style="color: #000000;">* បញ្ជាក់ ៖ រូបភាពឯកសារ</span></p>
<p style="text-align: right;"><span style="color: #000000;">ប្រភព ៖ ស៊ិនហួរ</span></p>
<div id="aside" class="span3">
<div class="moduletable">
<div class="custom">
<p style="text-align: right;"><span style="color: #000000;"> <span class="a2a_kit a2a_kit_size_32 addtoany_list" style="line-height: 32px;" data-a2a-url="http://www.freshnewsasia.com/index.php/en/19431-2016-03-06-02-00-11.html" data-a2a-title="ឃាតកម្មសាហាវមួយទៀតហើយនៅសៀមរាប យុវជនល្មោភកាមរំលោភហើយសម្លាប់ កុមារីអាយុ១១ឆ្នាំម្នាក់">ផ្តល់សិទ្ធដោយ ៖ ហ្វ្រេសញូវអាស៊ី </span></span></p>
</div>
</div>
</div>
<p> </p>