<p><span style="color: #000000;"><strong>(ភ្នំពេញ)៖</strong> ក្រុមនិស្សិតប្រមាណ១០០នាក់ មកពីសាកលវិទ្យាល័យនានា គ្រោងនឹងលើកគ្នាទៅតវ៉ានៅក្នុងវេទិកាសាធាណៈ របស់គណបក្សសង្រ្គោះជាតិ នៅខេត្តព្រះសីហនុ នាព្រឹកស្អែកនេះ ដើម្បីទាមទារឱ្យ លោក កឹម សុខា ចេញមុខបកស្រាយអំពីសម្លេងខ្សែអាត់ ដែលនាំឱ្យផ្ទុះរឿងអាស្រូវស្នេហាជុំវិញខ្លួនលោក។</span></p>
<p><span style="color: #000000;">លោក ប៉េង ភិរេន តំណាងឱ្យក្រុមនិស្សិតទាំងនោះ បានអះអាងប្រាប់ Fresh News ថា <strong>ក្រុមយុវនិស្សិតនឹងជំរុញឱ្យ លោក កឹម សុខា បកស្រាយថា «ពិត ឬមិនពិត» ជុំវិញសម្លេងខ្សែអាត់នោះ ហើយលោកនឹងជាអ្នកសួរសំណួរទៅកាន់លោក កឹម សុខា ដោយផ្ទាល់</strong>។</span></p>
<p><span style="color: #000000;">លោក ភិរេន ថា <strong>«ខ្ញុំនឹងទៅសួរគាត់នៅក្នុងវេទិកានោះតែម្តង ហើយយើងនឹងកាន់ក្បាលមេក្រូនិយាយម្នាក់មួយ ...យើងមិនខ្លាចការប៉ះទង្គិចទេ ហើយយើងមិនទៅប្រព្រឹត្តហិង្សា អត់ទៅជេរ អត់មានកាន់ដំបងទេ គឺទៅដោយដៃទទេទាំងអស់ កាន់តែក្រដាសទេ គឺសុំឱ្យគាត់ឆ្លើយ»</strong>។</span></p>
<p><span style="color: #000000;">រយៈពេលជិត១សប្តាហ៍កន្លងទៅនេះ រឿងអាស្រូវរបស់លោក កឹម សុខា បានផ្ទុះឡើងជាថ្មី នៅលើបណ្តាញសង្គម Facebook និងសារព័ត៌មាន បន្ទាប់ពីមានការបែកធ្លាយសម្លេងសាងសងស្នេហាមួយ រវាងបុរសម្នាក់ដែលគេជឿថា ជាសម្លេងរបស់លោក កឹម សុខា ជាមួយនារីវ័យក្មេងឈ្មោះ «ស្រីមុំ»។ តាមសម្លេងខ្សែអាត់នោះបង្ហាញថា ភាគីខាង បានណាត់នារីវ័យក្មេងម្នាក់ ដែលគេទៅដើរលេងនៅក្រៅប្រទេស និយាយអំពីរឿងលើគ្រែ ព្រមទាំងមានការផ្តល់លុយជូនស្រីកំណាន់ផងដែរ ។</span></p>
<p><span style="color: #000000;">កាលពីម្សិលមិញ ក្រោយកិច្ចប្រជុំថ្នាក់ដឹកនាំគណបក្សសង្គ្រោះជាតិ ទាំង២៥ រាជធានី-ខេត្ត នៅស្នាក់ការគណបក្សសង្រ្គោះជាតិ លោក កឹម សុខា និងមន្រ្តីគណបក្សសង្រ្គោះជាតិ បានព្យាយាមមិនបកស្រាយ ជុំវិញការផ្ទុះរឿងអាស្រូវស្នេហាតាមរយៈខ្សែអាត់សម្លេង ដែលគេបង្ហោះនៅលើទំព័រ Facebook ។ លោក កឹម សុខា ប្រធានស្តីទីគណបក្សសង្រ្គោះជាតិ បានបដិសេធមិននិយាយអ្វីសោះ នៅចំពោះមុខអ្នកសារព័ត៌មាន ដែលរង់ចាំសម្ភាសន៍រូបលោក ខណៈដែល លោក យ៉ែម បុញ្ញឫទ្ធិ អ្នកនាំពាក្យគណបក្សសង្រ្គោះជាតិ បានប្រាប់ក្រុមអ្នកសារព័ត៌មានថា លោកមិនជជែកវែកញែកជុំវិញរឿងខ្សែអាត់សម្លេងនេះនោះទេ ហើយចាត់ទុកថា ការលេចចេញនូវខ្សែអាត់សម្លេងនោះ គឺជារឿងខុសនឹងមូលដ្ឋានច្បាប់។</span></p>
<p><span style="color: #000000;">ទោះជាយ៉ាងនេះក្តី លោក ប៉េង ភិរេន តំណាងឱ្យក្រុមនិស្សិត បានលើកឡើងថា សម្លេងដែលគេសង្ស័យថា ជាលោកកឹម សុខានោះ មានលក្ខណៈប៉ះពាល់ដល់ផ្លូវច្បាប់ និងសីលធម៌សង្គម ដូចជាការនិយាយឱ្យភាគីស្រ្តីនោះការពារ នៅពេលដែលនាងនិយាយថាចង់ចាញ់ (កូន) ការលួចមានទំនាក់ទំនងផ្លូវភេទជាមួយនារីដទៃជាដើម។</span></p>
<p><span style="color: #000000;">ទោះជាយ៉ាងនេះក្តី ចំពោះរឿងនេះ Fresh News មិនទាន់អាចទំនាក់ទំនងតាមទូរស័ព្ទ និងអ៉ីម៉ែល សុំការឆ្លើយតបពីលោក កឹម សុខា ប្រធានស្តីទីគណបក្សសង្រ្គោះជាតិ បាននៅឡើយទេ៕</span></p>
<p><span style="color: #000000;"><a class="thickbox" title="" href="/FileManager/Commons/2016/3/4/17bn-04-03-2016--14-07-59.jpg"><img src="/FileManager/Articles/mce/2016/3/4/17bn-04-03-2016--14-07-59.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>