<p><span style="color: #000000;"><strong>ភ្នំពេញ ៖</strong> នគរបាលប៉ុស្ដិ៍ទឹកថ្លា ខណ្ឌសែន សុខ បានចុះទៅឃាត់ខ្លួនជន ទំនើងពីរនាក់ ក្រោយពីប្រជាពលរដ្ឋ បាន រាយការណ៍ថា ពួកគេបានកាន់កាំបិតប៉័ងតោ គំរាមម្ដាយនិងសាច់ញាតិរបស់ខ្លួន ដោយមិនឱ្យចូលផ្ទះ និងស្រែកឡូឡា នៅចំណុចមុខផ្ទះលេខ៤៩៧ ផ្លូវស្ពានឈើ ភូមិត្រញំងឈូក សង្កាត់ទឹកថ្លា ខណ្ឌសែនសុខ ។</span></p>
<p><span style="color: #000000;">មន្ដ្រីនគរបាលមូលដ្ឋានបានឱ្យដឹងថា ជនទំនើងទី១ ឈ្មោះមាស ប៊ុនចន អាយុ៤៣ឆ្នាំ មុខរបរនៅផ្ទះ ស្នាក់នៅចំណុច កើតហេតុ ទី២ ឈ្មោះមាស ភិរុណ អាយុ ២៨ឆ្នាំ ស្នាក់នៅចំណុចកើតហេតុ ។ រីឯជន រងគ្រោះជាម្ដាយ ឈ្មោះប៉ែន ចាន់ថារី អាយុ៧១ឆ្នាំ មុខរបរនៅផ្ទះ ។</span></p>
<p><span style="color: #000000;">តាមមន្ដ្រីនគរបាលប៉ុស្ដិ៍ទឹកថ្លា បានឱ្យដឹងថា កូនទំនើងទាំងពីរនាក់នេះ កាន់កាំបិតប៉័ងតោ រារាំងមិនឱ្យក្រុមគ្រួសារ ជនរងគ្រោះចូលផ្ទះ និងស្រែកឡូឡារំខាន អ្នកជិតខាង ព្រមទាំងបំផ្លិចបំផ្លាញ ទ្រព្យសម្បត្ដិក្នុងផ្ទះ និងប្រើអំពើហិង្សាជាច្រើនលើកច្រើនសានា ពេលកន្លងទៅ ។ ដោយទ្រាំមិនបានពីសកម្មភាពបែបនេះ ទើបស្ដ្រីជាម្ដាយនិងក្រុមគ្រួសារបានរាយការណ៍មកសមត្ថកិច្ចចុះទៅចាប់ខ្លួននិងដកហូត យកកាំបិតប៉័ងតោ ដែលកាន់នៅក្នុងដៃ ។</span></p>
<p><span style="color: #000000;">បច្ចុប្បន្នជនទំនើងទាំងពីរនាក់ ត្រូវបានឃុំខ្លួននៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅកាន់តុលាការចាត់ការបន្ដតាមនីតិវិធី ។</span></p>
<p><span style="color: #000000;"><a class="thickbox" title="" href="/FileManager/Commons/2015/3/3/3-3-2015-4-53-49-pm-03-03-2015--16-59-52.png"><span style="color: #000000;"><img src="/FileManager/Articles/mce/2015/3/3/3-3-2015-4-53-49-pm-03-03-2015--16-59-52.png" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>