<p><span style="color: #000000;"><strong>(អាមេរិក)៖</strong> នាយកប្រតិបត្តិក្រុមហ៊ុនបច្ចេកវិទ្យាផ្នែកអវកាស SpaceX លោក Elon Musk នៅថ្ងៃចន្ទសប្តាហ៍នេះ (ពេលវេលានៅសហរដ្ឋអាមេរិក) បានលាតត្រដាងអំពីគំរោងមហិច្ឆតាមួយ សំដៅនាំយកភ្ញៀវទេសចរអវកាសឯកជនចំនួនពីរនាក់ ទៅធ្វើដំណើរកម្សាន្តជុំវិញព្រះចន្ទ នៅឆ្នាំ២០១៨ខាងមុខនេះ។ ព្រមពេលជាមួយគ្នាការបោះជំហាននេះ ទទួលបានការកោតសរសើរ ពីទីភ្នាក់ងារអវកាស NASA រួមជាមួយការក្រើនរំលឹក យ៉ាងច្បាស់មួយផងដែរថា NASA រំពឹងថា SpaceX នឹងបំពេញកាតព្វកិច្ចដទៃផ្សេងទៀតរបស់ខ្លួន ខណៈពេលដែលកំពុងខិតខំប្រឹងប្រែងរឿងព្រះច័ន្ទ។ នេះបើតាមការចេញផ្សាយ ដោយគេហទំព័រវិទ្យាសាស្រ្ត Space.com នៅមុននេះបន្តិច នារសៀលថ្ងៃពុធ ទី០១ ខែកុម្ភៈ ឆ្នាំ២០១៧។</span></p>
<p><span style="color: #000000;">នៅក្នុងសន្និសីទកាសែតមួយ ជាមួយក្រុមអ្នកសារព័ត៌មានលោក Elon Musk បាននិយាយថាក្រុមហ៊ុន SpaceX នឹងនាំយកមនុស្សចំនួនពីរនាក់ ដែលបានបង់ថ្លៃធ្វើដំណើរ ទៅធ្វើការទស្សនាកម្សាន្តជុំវិញព្រះច័ន្ទ ដោយប្រើប្រាស់យានដឹកជញ្ជូន Dragon និងគ្រាប់រ៉ុក្កែតដ៏ធំសម្បើម Falcon Heavy ហើយឧបករណ៍ទាំងពីរនេះ នឹងឆ្លងកាត់ការបង្ហោះសាកល្បង នៅចុងឆ្នាំ២០១៧នេះ។</span></p>
<p><span style="color: #000000;">បន្ទាប់ពីលឺដំណឹងនេះអង្គការ NASA បានចេញសេចក្តីថ្លែងការណ៍មួយដូច្នេះថា <strong>«ទីភ្នាក់ងារអវកាស NASA សូមធ្វើការកោតសរសើរចំពោះ ដៃគូឧស្សាហកម្មរបស់ខ្លួន សម្រាប់ការវិវឌ្ឍឈានទៅមុខ យ៉ាងរីកចម្រើនបែបនេះ ហើយយើងនឹងចូលរួមសហការ កាន់តែជិតស្និទ្ធបន្ថែមទៀតជាមួយ SpaceX ដើម្បីធានាថា ក្រុមហ៊ុននេះនឹងបំពេញកាតព្វកិច្ចនៃកិច្ចសន្យា ក្នុងការត្រឡប់ទៅធ្វើការបញ្ជូន និងនាំយកអវកាសយានិក និងនៅតែបន្តដឹកជញ្ជូនគ្រឿងបរិក្ខាផ្គត់ផ្គង់ ដោយជោគជ័យទៅកាន់ ស្ថានីយ៍អវកាសអន្តរជាតិ ISS ដូចដើមដដែល»</strong>។</span></p>
<p><span style="color: #000000;">ដោយឡែកនៅក្នុងគំរោងរបស់ក្រុមហ៊ុន SpaceX អ្នកដំណើរនឹងធ្វើទេសចរណ៍ លើយានអវកាស Dragon ទៅវិញទៅមកនៅជុំវិញព្រះច័ន្ទ ដោយហោះឆ្វែលពីលើផ្ទៃដីរបស់វា នៅរយៈចម្ងាយដ៏កកៀកបំផុតមួយ និងហោះចាកចេញពីចម្ងាយដល់ប្រមាណជា ៦៥០,០០០គីឡូម៉ែត្រ ពីភពផែនដី នៅរយៈចម្ងាយដ៏ឆ្ងាយបំផុត ហើយដំណើរកម្សាន្តទាំងមូល គួរតែចំណាយពេលវេលាចំនួនប្រាំថ្ងៃ។</span></p>
<p><span style="color: #000000;">ក្រុមហ៊ុនឯកជន SpaceX មានជាប់កិច្ចសន្យាមួយតម្លៃ ២.៦ពាន់លានដុល្លារ ជាមួយទីភ្នាក់ងារអវកាស NASA ស្តីពីការដឹកជញ្ជូនអ្នកអវកាសទៅ និងមក ពីស្ថានីយ៍អវកាសអន្តរជាតិ ISS តាមរយៈការប្រើប្រាស់យានអវកាស Dragon និងគ្រាប់រ៉ុក្កែត Falcon 9 ដែលមានទំហំតូចជាងគ្រាប់រ៉ុក្កែត Falcon Heavy ដែលគ្រោងនឹងបង្ហោះទៅកាន់ព្រះច័ន្ទ។ ការហោះហើរទាំងនោះ ត្រូវបានឧបត្ថម្ភដោយកម្មវិធី របស់អង្គការ NASA ហើយត្រូវបានរំពឹងថា ចាប់ផ្តើមនៅឆ្នាំ២០១៨ ក៏ប៉ុន្តែសេចក្តីរាយការណ៍មួយនាពេលថ្មីៗនេះ មកពីការិយាល័យគណនេយ្យ នៃរដ្ឋាភិបាលអាមេរិក បានឲ្យដឹងថា ការបញ្ជូនអវកាសយានិករបស់ NASA តាមយាន Dragon របស់ SpaceX ទំនងជានឹងត្រូវបានពន្យាពេល រហូតដល់ឆ្នាំ២០១៩។</span></p>
<p><span style="color: #000000;">ម៉្យាងវិញទៀតក្រុមហ៊ុន SpaceX ក៏តែងតែបានធ្វើការដឹកជញ្ជូន គ្រឿងបរិក្ខាផ្គត់ផ្គង់ ទៅកាន់ស្ថានីយ៍អវកាសអន្តរជាតិ ISS ចាប់តាំងពីឆ្នាំ២០១២ មកផងដែរនៅក្រោមកិច្ចសន្យា ដាច់ដោយឡែកមួយផ្សេងទៀត ជាមួយទីភ្នាក់ងារអវកាស NASA។ គួរបញ្ជាក់ថាលោក Elon Musk ដែលជា CEO របស់ SpaceX មិនបានបង្ហើបឲ្យដឹងថា អ្នកណាដែលបានទិញសំបុត្រ ដើម្បីទៅកម្សាន្តជុំវិញព្រះច័ន្ទ នៅលើយាន Dragon ឬមួយក៏តម្លៃ នៃការធ្វើដំណើរទេសចរណ៍នេះ ក្នុងម្នាក់នោះឡើយ៕</span></p>
<p><span style="color: #000000;"><img src="http://image.freshnewsasia.com/2017/113/fn-2017-03-01-15-35-34-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>