<p><span style="font-size: 12px; color: #000000;">យោងតាមក្បួនមហាសង្ក្រាន្ត ឆ្នាំ រកា នព្វស័ក ព.ស. ២៥៦១ ដែលរៀបរៀងដោយ លោក អ៊ឺម បុរិន្ទ នាយកនៃគណកម្មការស្រាវជ្រាវវិជ្ជាហោរាស្ត្រ និងប្រពៃណីទំនៀមទម្លាប់ខ្មែរ បានបញ្ជាក់ថា «មហាសង្ក្រាន្តឆ្នាំ ច សំរឹទ្ធិស័ក ព.ស ២៥៦២ នឹងចូលមកដល់នៅវេលាម៉ោង ៩៖១២នាទីព្រឹក ថ្ងៃសៅរ៍ ១៤រោច ខែចែត្រ ត្រូវនឹងទី ១៤ ខែមេសា ឆ្នាំ ២០១៨»។</span></p>
<p><span style="color: #000000;">ដោយឡែក ចំពោះទេពធីតា ដែលនឹងយាងចុះមកបន្តវេនរក្សាមនុស្សលោកឆ្នាំនេះ គឺ «ព្រះនាងមហោធរៈទេវី» បុត្រីទី៧ នៃកបិលមហាព្រហ្ម ទ្រង់អម្ពរពណ៌ខៀវ មានផ្កាត្រកៀត សៀតនៅព្រះកាណ៌ សោយសាច់ទ្រាយ (ជាសត្វព្រៃពពួកឈ្លូស តែតូចជាងឈ្លូស) ជាភក្សាហារ ព្រះហស្តស្តាំកាន់កងចក្រ ព្រះហស្តឆ្វេងកាន់ត្រីសូល៍ គង់លើមយូរ៉ា ឬស្ដេចក្ងោក ជាពាហនៈ។</span></p>
<p><span style="color: #000000;"><a class="thickbox" title="" href="/FileManager/Commons/2018/4/10/1-10-04-2018--09-11-04.png"><img src="/FileManager/Articles/mce/2018/4/10/1-10-04-2018--09-11-04.png" alt="" /></a><br /></span></p>
<p><span style="color: #000000;">–ថ្ងៃចូលឆ្នាំ ថ្ងៃទី១ គឺ «ថ្ងៃវារៈមហាសង្ក្រាន្ត» ត្រូវនឹងថ្ងៃសៅរ៍១៤ រោច ខែចេត្រ ត្រូវនឹងថ្ងៃ១៤ ខែមេសា គ.ស ២០១៨ វេលាម៉ោង ៩ និង១២ នាទីព្រឹក ជាថ្ងៃចូលឆ្នាំច សំរឹទ្ធិស័ក។</span></p>
<p><span style="color: #000000;">–ថ្ងៃទី ២ គឺថ្ងៃ «វារៈវ័នបត» ត្រូវនឹងថ្ងៃអាទិត្យ ១ កើត ខែពិសាខ ត្រូវនឹងថ្ងៃទី១៥ ខែមេសា គ.ស ២០១៨។</span></p>
<p><span style="color: #000000;">–ថ្ងៃទី៣ គឺថ្ងៃ «វារៈឡើងស័ក» ត្រូវនឹងថ្ងៃចន្ទ ២ កើត ខែពិសាខ ត្រូវនឹងថ្ងៃទី១៦ ខែមេសា គ.ស ២០១៨ វេលាម៉ោង ១២ និង ៥៩ នាទី និង២៤ វិនាទី គម្រប់ជាសង្ក្រាន្ត៣ថ្ងៃ។</span></p>
<p><span style="color: #000000;"><a class="thickbox" title="" href="/FileManager/Commons/2018/4/10/2-10-04-2018--09-11-16.png"><img src="/FileManager/Articles/mce/2018/4/10/2-10-04-2018--09-11-16.png" alt="" /></a><br /></span></p>
<p><span style="color: #000000;">ចំពោះរណ្ដាប់ទទួលទេវតា តាមទំនៀមពីបុរាណរៀងមក គឺត្រូវរៀបរានទេវតាក្រាលសំពត់ពណ៌ស នៅខាងមុខផ្ទះមួយ សម្រាប់តាំងគ្រឿងពលិការផ្សេងៗ។ ត្រូវរៀបក្រាលសំពត់ពណ៌ស ហើយរៀបចំនូវគ្រឿងសក្ការៈបូជា ទេវតាមានជាអាទិ៍ បាយសី៩ថ្នាក់មួយគូ បាយសី៧ថ្នាក់មួយគូ បាយសី៥ថ្នាក់មួយគូ បាយសី៣ថ្នាក់មួយគូ បាយសីប៉ាឆាមួយគូ ស្លាធម៌មួយគូ ទឹកអប់មួយគូ ទៀន៥ធូប៥ លាច៥ផ្កា៥ ដាក់លើជើងពាន១គូ ចេកនួន ចេកណាំវ៉ា ដាក់លើជើងពាន១គូ ផ្លែឈើ១១មុខ រៀបដាក់ជើងពាន១១គូ ដូងឡៅមួយគូ ទឹកស្អាត២កែវ។</span></p>
<p><span style="color: #000000;">ដោយឡែក សម្រាប់ប្រជារាស្ត្រធម្មតា គួររៀបចំត្រឹមបាយសី៥ថ្នាក់ចុះមក ឬរៀបត្រឹមគ្រឿងសក្ការបូជា ដែលមានទៀនប្រាំ ធូបប្រាំ ស្លាធម៌កូនចេកមួយគូ ក៏សមល្មមដែរ។ ចំពោះផ្លែឈើគួររៀបឲ្យបានត្រឹម ៣ឬ៥មុខ ក៏ជាការប្រសើរ ឬរៀបទៅតាមធនធានរបស់ខ្លួន។ នៅគ្រប់ដង្វាយទាំងអស់ត្រូវដាក់ផ្កាម្លិះភួង ពីលើគ្រប់ដង្វាយ នៅលើជើងពាន និងលើបាយសីត្រូវដោតទៀន ហើយដុតបំភ្លឺ។</span></p>
<p><span style="color: #000000;"><a class="thickbox" title="" href="/FileManager/Commons/2018/4/10/3-10-04-2018--09-11-27.png"><img src="/FileManager/Articles/mce/2018/4/10/3-10-04-2018--09-11-27.png" alt="" /></a><br /></span></p>
<p><span style="color: #000000;">បើរៀបចំស្រេចហើយ នៅវេលាម៉ោងដែលទេវតាចុះមកត្រូវជួបប្រជុំ ក្រុមគ្រួសារដើម្បីថ្វាយបង្គំ ព្រះរតនៈត្រ័យសមាទានសីល ហើយតាំងចិត្តឲ្យបានស្អាតបរិសុទ្ធ ជ្រះស្រឡះនូវមន្ទិលទាំងពួងតម្កល់ ចិត្តរំពឹង គិតទៅលើព្រះពុទ្ធ ព្រះធម៌ ព្រះសង្ឃជាទីពឹងទីរឭក លុះចប់ពិធីទទួលទេវតា។</span></p>
<p><span style="color: #000000;"><a class="thickbox" title="" href="/FileManager/Commons/2018/4/10/4-10-04-2018--09-11-37.png"><img src="/FileManager/Articles/mce/2018/4/10/4-10-04-2018--09-11-37.png" alt="" /></a><br /></span></p>
<p><span style="color: #000000;">នៅក្នុងឱកាសសង្ក្រាន្ត ទាំងបីថ្ងៃ សូមបងប្អូនប្រជាពលរដ្ឋប្រុសស្រីផងទាំងឡាយ រៀបចំពលិការ គ្រឿងសក្ការបូជា អុចប្រទីបជ្វាលា ថ្វាយព្រះរតនត្រ័យ និងទទួលស្វាគមន៍ទេវធីតាឆ្នាំថ្មី ហើយខំលះបង់ចិត្តអាក្រក់អន្យតិរ្ថីយ ជាចិត្តអប្រីយ៍ជាប់ដោយគំនុំគុំគួន ព្យាបាទ ឈ្នានីសដែលកើតមានក្នុងឆ្នាំចាស់ ឲ្យជ្រះស្រឡះតាំងចិត្តប្រព្រឹត្តល្អប្រកបដោយ មេត្តា ករុណា មុទិតា ឧបេក្ខា និងបញ្ញា ធ្វើបុណ្យសុន្ទរ៍ទាន តាមប្រពៃណី រក្សាសីលប្រាំឲ្យបានជាប់ជានិច្ច សុភមង្គល វិបុលសុខគ្រប់ប្រការ តាំងពីឆ្នាំថ្មីនេះតរៀងទៅ ៕</span></p>
<p><span style="color: #000000;"><a class="c_tab" href="http://mekongnet.com.kh/pages/SpecialOfferCamnews.aspx" target="_blank"><img src="/FileManager/Articles/mce/2018/4/10/mkn-10-04-2018--09-11-54.png" alt="" /></a></span></p>
<p style="text-align: right;"><span style="color: #000000; font-size: 12px; text-align: right;">ប្រភព៖ Khmer Talking</span></p>
<p style="text-align: right;"><span style="color: #000000;">រូបភាព ៖ សប្បាយ</span></p>