<p><span style="color: #000000;"><strong>(បេកាំង)៖</strong> នាយទាហានចិនម្នាក់ដែលមិនអាចទប់ចំណង់បាន ក្នុងការបង្អួតក៏ដូចជាបង្ហាញអំពីលទ្ធផលដ៏គួរស្ញប់ស្ញែង នៃការធ្វើលំហាត់ប្រាណជាប្រចាំរបស់ខ្លួន បានបង្ហោះទិន្នន័យ ពីកម្មវិធីតាមដានសុខភាពរាងកាយទៅលើបណ្តាញទំនាក់ទំនងសង្គម ដែលទង្វើនេះបានធ្វើឲ្យលេចធ្លាយ ចេញនូវទីតាំងនៃមូលដ្ឋានទ័ពរបស់ពលទាហានរូបនោះ ដោយអចេតនា។ នេះបើតាមការដកស្រង់ចេញពីសារព័ត៌មានរុស្ស៉ី Sputnik នៅមុននេះបន្តិចនាព្រឹកថ្ងៃព្រហស្បតិ៍ ទី២៩ ខែធ្នូ ឆ្នាំ២០១៦។</span></p>
<p><span style="color: #000000;">ហេតុការណ៍នេះបានកើតឡើងនៅក្នុងខេត្ត Fujian ដែលស្ថិតនៅតាមបណ្តាយឆ្នេរនៃប្រទេសចិន ខណៈពេលគ្រូបង្ហាត់ម្នាក់នៅឯមូលដ្ឋានយោធា ដែលបែកធ្លាយទីតាំង បានប្រទះឃើញពលទាហានមួយរូបបង្ហោះកំណត់ត្រា នៃការហ្វឹកហ្វឺនប្រចាំថ្ងៃរបស់ខ្លួន ទៅលើបណ្តាញសង្គមឈ្មោះថា «WeChat» តាមរយៈកម្មវិធីពិនិត្យតាមដានភាពរឹងមាំនៃកាយសម្បទា ដែលចង្អុលបង្ហាញពីទីតាំង និងតំបន់ស្ថិតនៅជុំវិញអ្នកប្រើប្រាស់ ហើយលោកគ្រូបង្ហាត់ក៏បានស្នើឲ្យពលទាហានរូបនោះ លុបព័ត៌មានទាំងអស់ចោលភ្លាមៗ ដោយសារវាបានបង្ហាញយ៉ាងច្បាស់ពីកន្លែង ដែលមូលដ្ឋានទ័ពរបស់ពួកគេតាំងនៅ ក៏ដូចជាអគារដទៃទៀតដែលនៅក្បែរទីនោះ។</span></p>
<p><span style="color: #000000;">ចាប់តាំងពីពេលមានរឿងហេតុនោះមក មូលដ្ឋានទ័ពខាងលើបានដាក់បំរាម មិនឲ្យមានការប្រើប្រាស់ប្រព័ន្ធជីភីអេស (GPS System) នៅលើកម្មវិធីទូរស័ព្ទដៃ និងឧបករណ៍អេឡិចត្រូនិកផ្សេងៗ ដែលអាចពាក់ជាប់នឹងខ្លួនបានទៀតនោះឡើយ។</span></p>
<p><span style="color: #000000;">គួរបញ្ជាក់ដែរថា បើយោងតាមរបាយការណ៍ពីនាយកដ្ឋានសន្តិសុខ នៃមូលដ្ឋានទ័ពកើតហេតុ ចំនួនពលទាហានប្រមាណជា ៤៣ភាគរយដែលឈរជើងនៅទីនោះ ធ្លាប់បានប្រើប្រាស់កម្មវិធីតាមដានពិនិត្យភាពរឹងមាំនៃកាយសម្បទា ហើយកងទ័ពចិននៅទូទាំងប្រទេសវិញ ត្រូវបានព្រមានអំពីហានិភ័យនៃការបែកធ្លាយការសម្ងាត់យោធា ដោយសារតែការប្រើប្រាស់កម្មវិធីទាំងអស់នោះ និងការបង្ហោះលទ្ធផល នៃការធ្វើលំហាត់ប្រាណរបស់ពួកគេ នៅលើបណ្តាញទំនាក់ទំនងសង្គម៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-29-10-21-08-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>