<div class="article-content">
<p><strong>ភ្នំពេញៈ</strong> នាយនគរបាលស្តីទីប៉ុស្តិ៍ចាក់អង្រែលើ ខណ្ឌមានជ័យ ត្រូវបានគេរាយការណ៍ថា ត្រូវប្រពន្ធចុងរបស់ខ្លួន ចាក់ជាច្រើនកាំបិតចំពោះ បណ្តាលឲ្យរងរបួសយ៉ាងធ្ងន់ធ្ងរ ហើយត្រូវ បានគេដឹកយកទៅកាន់ មន្ទីរពេទ្យភ្លាមៗ កាលពីវេលាម៉ោង៨ និង២០នាទី យប់ថ្ងៃទី១៩ ខែសីហា ឆ្នាំ២០១៤នេះ ក្រោយពីជនរងគ្រោះនិងស្ត្រីម្នាក់ ដែលជាប្រពន្ធ ចុងនោះមានទំនាស់ពាក្យសំដីជាមួយគ្នា ។</p>
<p>សេចក្តីរាយការណ៍ពីមន្ត្រីនគរបាលមូលដ្ឋានបានឲ្យដឹងថា លោកបូរិន ដែលជានាយនគរបាលស្តីទី ប៉ុស្តិ៍ចាក់អង្រែលើ ត្រូវបានស្ត្រីម្នាក់ ដែលជាស្រីស្នេហ៍ ឬ ជាប្រពន្ធចុងរបស់ខ្លួន បានទាញកាំបិតចាក់ ចំពោះជាច្រើនកាំបិត ក្រោយពីឈ្លោះជាមួយជនរងគ្រោះបណ្តាលឲ្យធ្លាយពោះវៀន បង្កឲ្យមានការភ្ញាក់ផ្អើល ហើយត្រូវបានគេដឹកបញ្ជូនយកទៅ សង្គ្រោះភ្លាមៗនៅមន្ទីរពេទ្យ ដោយឡែក ជនដៃដល់ដែលជាប្រពន្ធចុង ក្រោយពីបានធ្វើសកម្មភាពរួច បានរត់គេចខ្លួនបាត់។</p>
<p>បច្ចុប្បន្ន ស្នងការនគរបាលរាជធានីភ្នំពេញ និងស្នងការរងលោក ឧត្តមសេនីយ៍ ជួន ណារិន្ទ បានបញ្ជាឲ្យ តាមចាប់ជនដៃដល់ ជាស្ត្រីរូបនេះយកមកផ្តន្ទាទោសតាមច្បាប់។ យ៉ាងណាក៏ដោយគេនៅមិនទាន់ដឹកពីមូលហេតុដែលបង្កឲ្យមានអំពើហិង្សានេះ នៅឡើយទេ៕</p>
<p style="text-align: center;"><img src="http://image.dap-news.com:81/dap-news/dap-images/2014/August/id-067/CH-00992.jpg" alt="" width="550" /></p>
</div>
<p style="text-align: right;"><a href="http://www.dap-news.com/2011-06-14-02-39-55/93191-2014-08-19-14-26-38.html" target="_blank">ផ្តល់សិទ្ធដោយ ៖ ដើមអម្ពិល</a></p>