<p><strong>ភ្នំពេញ៖</strong> អតីតតារាចម្រៀងធ្លាប់ មានឈ្មោះល្បីក្នុងផលិតកម្ម សាន់ដេ លោក ជុំ លីណូ ខណៈដែលសន្ទុះនៃការគាំទ្រនិង ប្រជាប្រិយភាព កំពុងតែហក់ឡើងខ្ពស់ សម្រាប់ទីផ្សារសិល្បៈ ស្រាប់តែថ្មីៗនេះ បានធ្លាយដំណឹងនៃការចាកចេញ ពីទ្រនំសាន់ដេ ដោយពុំដឹងច្បាស់ ពីមូលហេតុពិតប្រាកដថា មកពីចប់កុងត្រា ឬមួយមកពីមានបញ្ហា ជាមួយក្រុមហ៊ុននោះទេ។</p>
<p>បើតាមប្រភពព័ត៌មាន ក្នុងស្រុកមួយចំនួនបានចុះផ្សាយថា ការរើបង្វេចដើរចេញពីផលិតកម្ម សាន់ដេ របស់តារាចម្រៀង ជុំ លីណូ គឺដោយសារតែខាងផលិតកម្ម បញ្ចប់កុងត្រាមុនកំណត់ ព្រោះតារារូបនេះ មិនគោរពតាមគោលការណ៍ របស់ក្រុមហ៊ុន។ ប៉ុន្ដែ លីណូ បានបដិសេធន៍ ចំពោះរឿងនេះ ហើយបានបញ្ជាក់ថា លោកបានចប់កុងត្រា ជាមួយក្រុមហ៊ុន តាំងពីចុងឆ្នាំ ២០១៣។</p>
<p>ស្របពេលដែលព័ត៌មាននេះ កំពុងតែរីកសាយភាយ នឹងជាការចង់ដឹងពីសំណាក់ មហាជនអ្នកគាំទ្រ ស្រាប់តែមានដំណឹងមកថា តារាចម្រៀង ជុំ លីណូ រកឃើញទ្រនំថ្មី ដើម្បីចូលខ្លួនជ្រកកោនវិញហើយ។ ប៉ុន្តែគេពុំទាន់ដឹងច្បាស់ទេថា តើផលិតកម្មមួយនោះ មានបទចម្រៀង សម្រាប់ ជុំ លីណូ ក្នុងឱកាសបុណ្យចូលឆ្នាំខាងមុខនេះហើយឬនៅ?</p>
<p>ផ្អែកតាមប្រភព ជិតស្និទ្ធតារាប្រុសរូបនេះ បានបង្ហើបថា ដោយសារតែ ជុំ លីណូ គឺជាតារាចម្រៀង ដែលមានទេពកោសល្យ និង សមត្ថភាពខ្ពស់ អាចឆក់ដណ្តើមបាន ទីផ្សារសិល្បៈ រហូតមានការគាំទ្រ ច្រើនពីសំណាក់ទស្សនិកជន ទើបឱកាសនៃការចូលខ្លួនច្រៀង ឱ្យផលិតកម្មក្នុងស្រុក នៅតែមានសម្រាប់រូបលោក បើទោះបីជា សាន់ដេ បានបោះបង់តារារូបនេះ ចោលក៏ពិតមែន។ពេលនេះតារាចម្រៀង ល្បីតាមក្បាច់រាំ លោក ជុំ លីណូ បានឈានជើង ចូលច្រៀងឱ្យ ផលិតកម្មក្នុងស្រុកមួយ តែគេមិនបានបញ្ជាក់ប្រាប់ថា ផលិតកម្មដែល លីណូ ចូលច្រៀង ថ្មីនេះមានឈ្មោះអ្វីនោះឡើយ។</p>
<p>ប្រាប់គេហទំព័រ LookingTODAY តាមសារអេឡិចត្រូនិច នៅរសៀលថ្ងៃទី៨ ខែមិនាឆ្នាំ២០១៤ នេះ លោក ជុំ លីណូ បានឱ្យដឹងថា "ឥឡូវនេះ ខ្ញុំកំពុងនៅក្នុងស្ទូឌីយោ ច្រៀងបទចម្រៀងថ្មី ឱ្យផលិតកម្មថ្មី"។ នៅពេលសួរថាតើលោក ច្រៀងឱ្យផលិតកម្មណា? អាចប្រាប់ឈ្មោះផលិតកម្មថ្មី នេះបានទេ? ត្រូវបានតា រាប្រុស ជុំ លីណូ ឆ្លើយ តប មកវិញថា "សុំលាក់សិនណា...! តែនឹងចេញចុងខែនេះ..!"។</p>
<p>តារាចម្រៀងកំពុង ពេញនិយមគ្រប់វ័យលោក ជុំ លីណូ បានបញ្ជាក់ថា លោកពុំបានស្តាយស្រណោះ ចំពោះការចាកចេញពីផលិតកម្ម សាន់ដេ នោះឡើយ។ រីឯមូលហេតុ ដែលនាំឱ្យលោកសម្រេចចិត្តចាកចេញពីផលិតកម្ម សាន់ដេ មិនត្រូវបានតារាចម្រៀង លីណូ បញ្ជាប់ប្រាប់ឱ្យបានច្បាស់នោះទេ គ្រាន់តែពោលពាក្យ យ៉ាងខ្លីថា គេមានគ្នាគេហើយ មិនដូចមុនទេ។ ជាមួយគ្នានេះតារាចម្រៀង ប្រុសពូកែខាងរាំរែក តាមតារាចម្រៀងប៉ុបពិភពលោក ម៉ៃឃើលជែកសុន លោក ជុំ លីណូ បានព្រលយពាក្យមកថា បទចម្រៀងក្រោយនេះ ពិតជាពីរោះ។</p>
<p>ទោះបីជាយ៉ាងណាក្តី ទស្សនិកជន នឹងរង់ចាំមើលថា តើអតីតតារាចម្រៀងធ្លាប់ លេចឈ្មោះល្បី នៅផលិតកម្ម លោក ជុំ លីណូ អាចរក្សាបាននូវ ប្រជាប្រិយភាព និងការគាំទ្រច្រើន ដូចមុនឬយ៉ាងណា? ខណៈដែលពេលនេះ លោកកំពុងឈរជើង ក្នុងផលិតកម្មថ្មី។ តាមរយៈទេពកោសល្យ និងការលេងស្ទីលរាំ បែបក្រម៉ិចក្រមើម លោក ជុំ លីណូ មួយរយៈចុងក្រោយនេះ ហាក់កំពុងតែ មានសន្ទុះកេរ្តិ៍ឈ្មោះ ល្បីល្បាញខ្លាំងឡើងៗ ពីមួយថ្ងៃទៅមួយថ្ងៃ ស្របពេលតារាចម្រៀងប្រុសខ្មែរឯទៀត ពុំសូវឃើញលេចវត្តមានច្រើន ដូចតារារូបនេះឡើយ៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-102/sokrith-338.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-102/sokrith-339.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-102/sokrith-340.jpg" alt="" width="600" /></p>
<p style="text-align: right;"><a href="http://www.lookingtoday.com/index.php/entertainment-general-news/28375-2014-03-09-04-36-06.html" target="_blank">ផ្តល់សិទ្ធដោយ ៖ ដើមអម្ពិល</a></p>