<p>ព័ត៌មានអន្តរជាតិ ៖ ភ្លាមៗមុនពេលហោះ ចេញពីទីក្រុង Amsterdam ប្រទេសហូឡង់ អ្នកបើកបរយន្តហោះម្នាក់ នៃជើងហោះហើរ MH17 របស់ម៉ាឡេស៊ី បានផ្ញើសារទៅកាន់ ប្រពន្ធរបស់គាត់ តាមរយៈប្រព័ន្ធ ទំនាក់ទំនង WhatsApp ថា ខ្លួននឹងទៅដល់ផ្ទះ ក្នុងពេលឆាប់ៗនេះ។</p>
<p>អ្នកបើកបរយន្តហោះនេះមាន ឈ្មោះ Wan Amran Wan Hussin អាយុ ៤៩ឆ្នាំ បានធ្វើការជាអ្នកបើកបរយន្តហោះ ឲ្យក្រុមហ៊ុន Malaysia Airlines អស់រយៈពេល ២៥ឆ្នាំមកហើយ ដោយមុនពេលស្លាប់នៅក្នុងគ្រោះថ្នាក់ យន្តហោះត្រូវបានគេបាញ់ទម្លាក់នេះ បានផ្ញើសារប្រាប់ប្រពន្ធឈ្មោះ Meriam Yusoff ថា គាត់នឹងទៅដល់ផ្ទះវិញ នៅពេលឆាប់ៗ មុនប៉ុន្មាននាទី នៅពេលដែលគាត់ ឡើងទៅលើយន្តហោះ Boeing 777 ។</p>
<p>Wan Amran Wan Hussin មានកូនប្រុសចំនួន ២នាក់ ម្នាក់ឈ្មោះ Yunus អាយុ ១០ឆ្នាំ និងម្នាក់ទៀតឈ្មោះ Irfan អាយុ ៨ឆ្នាំ នេះបើតាមសម្តីអ្នកស្រី Umi ដែលអ្នកមកអាកាសយាន្តដ្ឋាន Kuala Lumpur International Airport ជាមួយនឹងក្រុមគ្រួសារ អ្នកបើកបរយន្តហោះ ជាច្រើននាក់ទៀត បានប្រាប់ភ្នាក់ងារ ព័ត៌មានដូច្នេះ។</p>
<p>«ប្រពន្ធរបស់គាត់ហាក់ដូចជានៅមិនសុខទាល់តែសោះ ម្តងនៅក្រៅ ម្តងនៅខាងក្នុង» នេះបើតាមសម្តីអ្នកស្រី Umi។ គាត់បានបន្ថែមថា «កូនរបស់លោក Wan Amran Wan Hussin ម្នាក់អាយុ១០ បានដឹងរឿងឪពុកស្លាប់ហើយ ដោយគេមិនអីនោះទេ ប៉ុន្តែកូនអាយុ ៨ឆ្នាំ មិនទាន់បានដឹងនៅឡើយទេ»។</p>
<p>អ្នកបើកបរ Wan Amran Wan Hussin មុនពេលស្លាប់ បានរស់នៅជាមួយក្រុមគ្រួសារ នៅក្នុងទីក្រុង Shah Alam រដ្ឋ Selangor ប្រទេសម៉ាឡេស៊ី ជាស្វាមីដ៏ល្អម្នាក់ ដោយចេះទទួលខុសត្រូវគ្រប់បែបយ៉ាង លើក្រុមគ្រួសារ។ <span style="line-height: 1.8;">ស្ថិតនៅលើយន្តហោះ Boeing 777 ជើងហោះហើរ MH17 មានអ្នកបើកបរ យន្តហោះមានចំនួន ២នាក់ និងសហអ្នកបើកបរ យន្តហោះចំនួន ២នាក់ផងដែរ ដោយពួកគេទាំង ៤នាក់ សុទ្ធតែជនជាតិ ម៉ាឡេស៊ី។</span></p>
<p>សូមបញ្ជាក់ថា យន្តហោះ Boeing 777 ជើងហោះហើរ MH17 ត្រូវបានគេបាញ់ទម្លាក់ ដោយគ្រាប់មីស៊ីល កាលពីថ្ងៃព្រហស្បតិ៍ ទី១៧ ខែកក្កដា កន្លងទៅ នៅតំបន់ភាគខាងកើត ប្រទេសអ៊ុយក្រែន ជាតំបន់ដែលត្រូវបាន គ្រប់គ្រងដោយពួក ឧទ្ទាមគាំទ្ររុស៊្សី មនុស្សចំនួន ២៩៨នាក់ជិះលើ យន្តហោះត្រូវស្លាប់ទាំងអស់៕</p>
<p><a class="thickbox" title="" href="/FileManager/Commons/2014/7/19/v0126-19-07-2014--11-27-16.jpg"><img src="/FileManager/Articles/mce/2014/7/19/v0126-19-07-2014--11-27-16.jpg" alt="" /></a></p>
<p><a href="/News/Detail/29187/mh17-plane-crash-ukraine-rebels-limit-investigation" target="_blank"><span style="color: #0000ff;">- អាន ៖ ក្រុមឧទ្ទាម ប្រចាំការ កន្លែងធ្លាក់យន្តហោះ MH17 ដាក់កំហិត ក្នុងការ ស៊ើបអង្កេត ពីក្រុម អ្នកសង្កេតការណ៍</span></a></p>
<p style="text-align: left;"><a href="/News/Detail/67810/malaysia-jet-crashes-in-east-ukraine-conflict-zone" target="_blank"><span style="color: #0000ff;">- អាន ៖ Updated : MH17 យន្តហោះ ម៉ាឡេស៊ី ផ្ទុះធ្លាក់ ឆេះយ៉ាងសន្ធោសន្ធៅ ទំនងមកពីការ បាញ់ទម្លាក់ ដោយម៉ីស៊ីល</span></a></p>
<p><a href="/News/Detail/29310/many-airlines-have-avoided-ukrainian-airspace-for-months" target="_blank"><span style="color: #0000ff;">- អាន ៖ ក្រុមហ៊ុនអាកាសចរណ៍ ល្បីៗលោក ឈប់ហោះហើរ លើដែនអាកាស អ៊ុយក្រែន ១ ខែ មុន MH17 ត្រូវបានបាញ់ទម្លាក់</span></a></p>
<p style="text-align: right;"><a href="http://lookingtoday.com/index.php/entertainment-general-news/32450--mh17--.html" target="_blank">ផ្តល់សិទ្ធដោយ ៖ ដើមអម្ពិល</a></p>