<p><span style="color: #000000;"><strong>បាត់ដំបង៖</strong> កាលពីរសៀលថ្ងៃទី៣ ខែធ្នូ ឆ្នាំ២០១៥ កន្លងទៅ មានប្រជាពលរដ្ឋ ៩នាក់ នៅភូមិក្រឡាពាស ឃុំបាយដំរាំ ស្រុកបាណន់ ខេត្តបាត់ដំបង បានទិញជ្រក់ស្ពៃ យកមកបរិភោគធ្វើឲ្យពុល ក្អួតចង្អុរ រាក ងីងើធ្ងន់ធ្ងរទៅៗ រហូតបញ្ជូនទៅមន្ទីរពេទ្យ ដែលបង្ករអោយមានការ ភ្ញាក់ផ្អើលដល់ប្រជាជន រស់នៅក្នុងស្រុកបាណន់។</span></p>
<p><span style="color: #000000;">លោកវរសេនីយ៍ទោ ប៊ុត សំបូរ អធិការនគរបាលស្រុកបាណន់បានឲ្យដឹងថា នៅភូមិក្រឡាពាស ឃុំបាយដំរាំ ស្រុកបាណន់ មានជនរងគ្រោះដោយសារពុលជ្រក់ស្ពៃចំនួន ៩នាក់ ត្រូវបានបញ្ជូនទៅមន្ទីរពេទ្យខេត្តបាត់ដំបង រួមមាន ១.ឈ្មោះ ទិត្យ តង ភេទប្រុស អាយុ ៦៩ឆ្នាំ ២.ឈ្មោះ ជុន ចៃ ភេទស្រី អាយុ ៦០ឆ្នាំ ៣.ឈ្មោះ ជ ម៉ៅ ភេទប្រុស អាយុ ៣៨ឆ្នាំ ៤.ឈ្មោះ ទិត្យ ជា ភេទស្រី អាយុ ៣០ឆ្នាំ ៥.ឈ្មោះ រឹត សាវណ្ណ ភេទស្រី អាយុ ២៧ឆ្នាំ ៦.ឈ្មោះ ពៅ រតនា ភេទស្រី អាយុ ១២ឆ្នាំ ៧.ឈ្មោះ ពៅ រតន: ភេទប្រុស អាយុ ៩ឆ្នាំ ៨.ឈ្មោះ ម៉ៅ ផាត់សា ភេទស្រី អាយុ ៩ឆ្នាំ ៩.ឈ្មោះ ម៉ៅ ផាន់នី ភេទស្រី អាយុ ៩ឆ្នាំ។</span></p>
<p><span style="color: #000000;">បន្ទាប់ពីទទួលព័ត៌មាន ករណីខាងលើ កម្លាំងសមត្ថកិច្ចនគរបាលស្រុកបាណន់ បានចុះស្រាវជ្រាវ និងបានទទួលពត៌មានថា នៅវេលាម៉ោង១៦ នៅថ្ងៃទី០២ ខែធ្នូ ឆ្នាំ២០១៥ ឈ្មោះ ចាន់ ឡា ភេទស្រី អាយុ ៤១ឆ្នាំ រស់នៅភូមិឆកពោធិ៍ ឃុំឈើទាល ស្រុកបាណន់ បានដើរលក់ជ្រក់ ស្ពៃនៅភូមិក្រឡាពាស ឃុំបាយដំរាំ ស្រុកបាណន់ ហើយត្រូវបានក្រុមគ្រួសារជនរងគ្រោះខាងលើទិញយកទៅបរិភោគ។</span></p>
<p><span style="color: #000000;">សូមបញ្ជាក់ថា លុះដល់ព្រឹកឡើងថ្ងៃទី៣ ខែធ្នូ ឆ្នាំ២០១៥ ស្រាប់តែអ្នកទាំង ៩នាក់ ខាងលើចាប់ផ្តើមមានអាការៈ ក្អួតធ្ងន់ធ្ងរទៅៗ រហូតបញ្ជូនទៅមន្ទីរពេទ្យ។ តាមចំលើយអ្នកដើរលក់ជ្រក់ស្ពៃបាននិយាយាថា ជ្រក់ស្ពៃដែលខ្លួនដើរលក់នោះ គឺលើកពីអ្នកលក់ម្នាក់ទៀតនៅផ្សារបាយដំរាំ ។ បច្ចុប្បន្នសមត្ថកិច្ច កំពុងស្រាវជ្រាវបន្តដើម្បីរកប្រភពនៃការបង្កហេតុ ៕</span></p>
<p><span style="color: #000000;"><a class="thickbox" title="" href="/FileManager/Commons/2015/12/4/12-4-2015-12-14-30-pm-04-12-2015--12-21-48.png"><span style="color: #000000;"><img src="/FileManager/Articles/mce/2015/12/4/12-4-2015-12-14-30-pm-04-12-2015--12-21-48.png" alt="" /></span></a></span></p>