<p><span style="color: #000000;"><strong>(ភ្នំពេញ)៖</strong> ប្រជាពលរដ្ឋខ្មែរ ដែលរងគ្រោះដោយទម្ងន់គ្រាប់បែកអាមេរិកក្នុងសម័យសង្រ្គាម នៅតែឌិតដាមដោយក្តីឈឺចាប់ពេលនឹកដល់ព្រឹត្តិការណ៍ ទម្លាក់គ្រាប់បែក របស់អាមេរិក បើទោះបីរឿងរ៉ាវទុក្ខវេទនានោះកន្លងផុតជាង ៤ទសវត្សរ៍ទៅហើយក្តី។ ពលរដ្ឋរងគ្រោះដោយទម្ងន់គ្រាប់បែកអាមេរិក ក៏ចង់ឃើញសហរដ្ឋអាមេរិក ដែលជាប្រទេសមហាអំណាចលើលោកមានតម្លៃជាមនុស្សទូទាត់សំណងលើភាពខូចខាត និងខ្ទេចខ្ទាំដោយទម្ងន់គ្រាប់បែក និងជួសជុលក្តីឈឺចាប់របស់ពលរដ្ឋខ្មែរដោយទម្ងន់គ្រាប់បែកទាំងនោះផងដែរ។</span></p>
<p><span style="color: #000000;">រយៈពេលប្រមាណ១២ឆ្នាំ ចាប់ពីឆ្នាំ១៩៦៣ ដល់ឆ្នាំ១៩៧៥ អាមេរិក បានទម្លាក់គ្រាប់បែកដូចជាគ្រាប់បែកចង្កោម គ្រាប់បែកបេ៥២ និងគ្រាប់បែកគីមីនៅលើទីតាំងប្រមាណ ១១ម៉ឺនទីតាំង។ ទម្ងន់គ្រាប់បែកទាំងនោះមានជិត ៣លានតោន ហើយបានបណ្តាលឲ្យពលរដ្ឋខ្មែរ ប្រមាណកន្លះលាននាក់ បានស្លាប់បាត់បង់ជីវិត និងពលរដ្ឋជាច្រើនម៉ឺននាក់ទៀត បានស្លាប់ដោយសារការភៀសខ្លួន ការអត់ឃ្លៀន និងដោយជំងឺតម្កាត់ផ្សេងៗ។</span></p>
<p><span style="color: #000000;">សោកនាដកម្មទាំងអស់នេះ បើទោះបីជាបានកន្លងផុតទៅរយៈពេលជាង ៤០ឆ្នាំទៅហើយក្តី តែស្លាកស្នាមនៃទុក្ខវេទនា និងការឈឺចាប់ទាំងអស់មិនបាន រលត់ទៅតាមពេលវេលានោះឡើយ ហើយវានៅតែឌិតដាមជាប់ជានិច្ចក្នុងបេះដូងពលរដ្ឋខ្មែរ។ លោក ហួង ធៀមទៀង ពលរដ្ឋខ្មែរមួយរូបរស់នៅក្នុង សង្កាត់អាចារ្យលក្ខណ៍ ក្រុងស្ទឹងសែន ខេត្តកំពង់ធំ បានរៀបរាប់ប្រាប់អង្គភាពព័ត៌មាន Fresh News ថា ខេត្តកំពង់ធំមិនខុសពីបណ្តាខេត្តដទៃក្នុង ប្រទេសកម្ពុជានោះឡើយ ក្នុងអំឡុងពីឆ្នាំ១៩៦៣ ដល់ឆ្នាំ១៩៦៥ គឺបានរងគ្រោះយ៉ាងធ្ងន់ធ្ងរ ដោយទម្ងន់គ្រាប់បែករបស់អាមេរិក។</span></p>
<p><span style="color: #000000;">លោកតា ហួង ធៀមទៀង មានអាយុប្រមាណ៦៥ឆ្នាំ បានឲ្យដឹងថា អំឡុងពេលអាមេរិកទម្លាក់គ្រាប់បែកនោះ គឺមហាសែនវេទនា ពោលការរស់នៅប្រចាំថ្ងៃ ត្រូវរត់ចូលរណ្តៅត្រង់សេ ដើម្បីគេចពីគ្រាប់បែកអាមេរិកស្ទើររាល់ថ្ងៃ។ ពេលខ្លះទៀត ពេលរត់ចូលក្នុងរណ្តៅត្រង់សេត្រូវជួបសត្វពស់ក៏មាន។</span></p>
<p><span style="color: #000000;">បើតាមលោកតា ហួង ធៀមទៀង ការទម្លាក់គ្រាប់បែកអាមេរិកមិនរើសថា ជាទីតាំងរបស់ប្រជាពលរដ្ឋ ឬទីតាំងរបស់ទាហានគូបដិបក្ខរបស់ពួកគេនោះទេ គឺទម្លាក់គ្រប់ទីតាំងទាំងអស់។ លោក ហួង ធៀមទៀង បានបញ្ជាក់ថា ប្រជាពលរដ្ឋខ្មែរនៅពេលនោះមិនហ៊ានដាំ បាយឲ្យមានផ្សែង ឬ អុជភ្លើងបំភ្លឺក្នុងផ្ទះនោះទេ សូម្បីតែពេលហូបបាយ ក៏មិនហ៊ានអុជភ្លើងបំភ្លឺដែរ ព្រោះខ្លាចយន្តហោះរបស់អាមេរិក។</span></p>
<p><span style="color: #000000;">ពលរដ្ឋខ្មែរ ដែលក្នុងអំឡុងពេលអាមេរិកទម្លាក់គ្រាប់បែកមានអាយុប្រមាណ១៨ឆ្នាំរូបនេះ បានបញ្ជាក់ថា យន្តហោះចម្បាំងរបស់អាមេរិកឲ្យតែឃើញភ្លើងភ្លឺ ឬ ផ្សែង អាមេរិកប្រាកដជាទម្លាក់គ្រាប់បែក ព្រោះតែហេតុនេះហើយទើបប្រជាពលរដ្ឋមិនសូវអុជភ្លើងនៅយប់នោះឡើយ។</span></p>
<p><span style="color: #000000;">លោកតា ហួង ធៀមទៀង ថា ភាពភ័យខ្លាច និងតក់ស្លុត ដោយសារទម្ងន់គ្រាប់បែកអាមេរិកនៅតែដាក់ជាប់ក្នុងអារម្មណ៍របស់ពួកគាត់មកដល់បច្ចុប្បន្ន ពោលឲ្យតែឮសំឡេងយន្តហោះតែងនឹកភ្នកទៅដល់យន្តហោះទម្លាក់គ្រាប់បែករបស់អាមេរិកជានិច្ច។ លោកតា ហួង ធៀមទៀង ចង់ឃើញអាមេរិកទូទាត់សំណង សម្រាប់ថ្លៃខូចខាតលើប្រព័ន្ធហេដ្ឋារចនាសម្ព័ន្ធនានារបស់កម្ពុជា ហើយត្រូវចូលរួមដោះយកគ្រាប់បែក របស់ខ្លួនចេញពីផ្ទៃដីកម្ពុជា ហើយក៏តែផ្តល់ជំនួយ អភិវឌ្ឍន៍កម្ពុជាឲ្យបានច្រើន ដើម្បីផ្សះផ្សាការឈឺចាប់របស់ ពលរដ្ឋខ្មែរផងដែរ។</span></p>
<p><span style="color: #000000;">លោក ហួង ធៀមទៀង បានសង្កត់ធ្ងន់ថា ប្រសិនបើអាមេរិក មិនព្រមសងថ្លៃខូចខាត ក៏ដូចជាជួសជុលការឈឺចាប់របស់ប្រជាពលរដ្ឋទេ ពលរដ្ឋកម្ពុជានៅតែ បន្តចងកំហឹងជាមួយសហរដ្ឋអាមេរិក។ កំហឹងទាំងនេះមិនរលត់ឡើយ បើទោះបីពួកគេស្លាប់បាត់បង់ជីវិតក៏ដោយនោះ៕</span></p>
<p><span style="color: #000000;"><strong>សូមស្តាប់កិច្ចសម្ភាសន៍ជាមួយលោកតា ហួង ធៀមទៀង និយាយអំពីការទម្លាក់គ្រាប់បែករបស់អាមេរិក៖</strong></span></p>
<p><span style="color: #000000;"><strong><br /><a class="thickbox" title="" href="/FileManager/Commons/2017/2/10/1-10-02-2017--09-41-47.png"><span style="color: #000000;"><img src="/FileManager/Articles/mce/2017/2/10/1-10-02-2017--09-41-47.png" alt="" /></span></a><br /></strong></span></p>
<p><span style="color: #000000;"><iframe src="https://www.facebook.com/plugins/video.php?href=https%3A%2F%2Fwww.facebook.com%2Ffreshnewsasia%2Fvideos%2F686184301553364%2F&show_text=0&width=730" frameborder="0" width="500" height="410"></iframe></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>