<p><span style="color: #000000;"><strong>(ក្រុងឡុងដ៏)៖</strong> ដំណើរការនៃប្រកួតប្រជែងដើម្បីដណ្តើមដំណែង ជាមេដឹកនាំបក្សអភិរក្សនិយម និងដើម្បីធ្វើជានាយករដ្ឋមន្ត្រីថ្មី របស់ចក្រភពអង់គ្លេស បន្តពីលោក David Cameron កំពុងចាប់ដំណើរការហើយ។</span></p>
<p><span style="color: #000000;">ខណៈនេះ មានបេក្ខជនប្រាំរូបហើយ ដែលបានប្រកាសជាផ្លូវការពីឆន្ទៈ របស់ខ្លួនក្នុងការឈរឈ្មោះបោះឆ្នោត។ ជាមួយគ្នានេះដែរ បុគ្គលមួយរូប គឺលោក Boris Johnson ដែលកំពុងមានភាពល្បីល្បាញដោយសារលោកជាមេដឹកនាំការឃោសនាជម្រុញឲ្យអង់គ្លេសចាកចេញពី EU និងត្រូវបានគេរំពឹងថាច្បាស់ជាឈរឈ្មោះបោះឆ្នោតនោះ បានទាញការចាប់អារម្មណ៍ជាខ្លាំង បន្ទាប់ពីលោក ប្រកាសថាមិនមានបំណងឈរឈ្មោះទៅវិញ។</span></p>
<p><span style="color: #000000;">សេចក្តីប្រកាសស្តីពីការមិនឈរឈ្មោះនេះ ត្រូវបានធ្វើឡើងក្នុងរយៈពេលពីរម៉ោង បន្ទាប់ពី លោក Michael Gove ដែលជាដៃគូរបស់លោក និងជារដ្ឋមន្ត្រីយុត្តិធម៌ បានប្រកាសពីចេតនាក្នុងការឈរឈ្មោះ។</span></p>
<p><span style="color: #000000;">តើមានបេក្ខជនប៉ុន្មានរូប ដែលនឹងចូលប្រកួតប្រជែង ធ្វើជាមេដឹកនាំបក្សអភិរក្សនិយម?</span><br /><span style="color: #000000;">1. លោកស្រី Theresa May អាយុ៥៩ឆ្នាំ</span><br /><span style="color: #000000;">2. លោក Michael Gove អាយុ៤៨ឆ្នាំ (ដៃគូរបស់លោក Borish Johnson ដែលបានធ្វើការរួមគ្នាក្នុងកិច្ចការជម្រុញឲ្យអង់គ្លេសចាកចេញពីEU)</span><br /><span style="color: #000000;">3. លោក Stephen Crabb អាយុ៤៣ឆ្នាំ(រដ្ឋមន្ត្រីការងារ និងសោធន)</span><br /><span style="color: #000000;">4. លោក Liam Fox អាយុ៥៤ឆ្នាំ(អតីតរដ្ឋមន្ត្រីការពារជាតិ)</span><br /><span style="color: #000000;">5. លោកស្រី Adrea Leadsom អាយុ៥៣ឆ្នាំ (រដ្ឋមន្ត្រីថាមពល)</span></p>
<p><span style="color: #000000;">យោងតាមគេហទំព័រ bookmaker William Hill បានឲ្យដឹងថា លោកស្រី Theresa May ទំនងជាទទួលបានការគាំទ្រខ្ពស់ជាងគេ ក្នុងការក្លាយជាមេដឹកនាំបក្សអភិរក្សនិយម។ ដោយឡែកលោក Michael Gove ស្ថិតក្នុងលំដាប់ទីពីរ ខណៈដែលរដ្ឋមន្ត្រីថាមពលលោកស្រី Andrea Leadsom ស្ថិតក្នុងលំដាប់ទីបី។</span></p>
<p><span style="color: #000000;">តើអង់គ្លេសនឹងធ្វើការជ្រើសរើសអ្នកឈ្នះដោយរបៀបណា?</span></p>
<p><span style="color: #000000;">ក្នុងចំណោមបេក្ខជនទាំងប្រាំរូប មានបេក្ខជនពីររូបចុងក្រោយនឹងត្រូវបានជ្រើសរើសយក ដោយការបោះឆ្នោតលើកទីមួយនេះ នឹងត្រូវបានធ្វើឡើងនៅថ្ងៃអង្គារ៍សប្តាហ៍ក្រោយនេះ។ សម្រាប់អ្នកឈ្នះចុងក្រោយមួយរូប នឹងត្រូវបានជ្រើសរើសជាមេដឹកនាំបក្សអភិរក្សនិយម និងជានាយករដ្ឋមន្ត្រីថ្មីរបស់អង់គ្លេស។</span></p>
<p><span style="color: #000000;">សូមជម្រាបថា អតីតចៅហ្វាយទីក្រុង ឡុងដ៍ លោក Boris Johnson បានបង្កភាពភ្ញាក់ផ្អើលជាខ្លាំងនៅក្នុងឆាកនយោបាយ និងប្រភពសារព័ត៌មាន បន្ទាប់សេចក្តីប្រកាសស្តីពី ការដកខ្លួនពីដំណើរការនៃការបោះឆ្នោត នៅព្រឹកថ្ងៃសុក្រនេះ។ បុរសវ័យ៥២ឆ្នាំរូបនេះ ត្រូវបានគេរំពឹងថា អាចនឹងមានសង្ឃឹមទទួល បានការគាំទ្រច្រើន ប្រសិនបើលោកឈរឈ្មោះបោះឆ្នោត៕</span></p>
<p><a class="thickbox" title="" href="/FileManager/Commons/2016/7/2/11a-02-07-2016--10-14-01.jpg"><img src="/FileManager/Articles/mce/2016/7/2/11a-02-07-2016--10-14-01.jpg" alt="" /></a><br /><br /></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>