<p><span style="color: #000000;"><strong>(ម៉ានីល)៖</strong> អតីតមន្ត្រីយោធាហ្វីលីពីនម្នាក់ បានផ្ដល់សក្ខីកម្ម នៅចំពោះមុខព្រឹទ្ធសភាហ្វីលីពីនថា ប្រធានាធិបតីហ្វីលីពីនបច្ចុប្បន្ន លោក Rodrigo Duterte កាលពីជំនាន់លោកកាន់តំណែងជាអភិបាល ក្រុង Davao លោកធ្លាប់បានបញ្ជាឲ្យ មន្ត្រីក្រោមឱវាទរូបនេះ និងគូកនមួយចំនួនផ្សេងទៀតធ្វើការ សម្លាប់ក្រុមឧក្រិដ្ឋជនជាង ១,០០០ នាក់ឯណោះ។ នេះបើតាមការចុះផ្សាយ របស់សារព័ត៌មាន Washington Top នៅព្រឹកថ្ងៃព្រហស្បតិ៍ ទី១៥ ខែកញ្ញា ឆ្នាំ២០១៦។</span></p>
<p><span style="color: #000000;">លោក Edgar Matobato អាយុ៥៧ឆ្នាំ ជាអតីតមន្ត្រីយោធាខាងលើនេះ បានប្រាប់ព្រឹទ្ធសភាហ្វីលីពីនថា លោកធ្លាប់ស្ដាប់ឮលោក Duterte បញ្ជាឱ្យសម្លាប់ក្រុមឧក្រិដ្ឋជន តែលោកក៏បាន ទទួលស្គាល់ខ្លួនឯងដែរថា លោកបានចាប់ពង្រត់ និងសម្លាប់មនុស្ស ក្នុងនោះរួមមានទំាងបុរសម្នាក់ ដែលត្រូវបានគេយកទៅបោះឲ្យសត្វក្រពើស៊ី នៅភាគខាងត្បូងទីក្រុង Davao កាលពីឆ្នាំ២០០៧ ថែមទៀតផង។</span></p>
<p><span style="color: #000000;">ទោះបីជាយ៉ាងណា គេពុំទាន់ឃើញមានប្រតិកម្មពី លោក Duterte ដែលធ្លាប់បដិសេធថា លោកមិនដែលបានជាប់ ពាក់ព័ន្ធនឹងការសម្លាប់ក្រុមឧក្រិដ្ឋជន ក្រៅប្រព័ន្ធតុលាការនោះនៅឡើយទេ កាលពីជំនាន់លោកកាន់តំណែង ជាអភិបាលក្រុង Davao និងបន្ទាប់ពីការស្បថចូលកាន់តំណែង ជាប្រធានាធិបតីហ្វីលីពីន កាលពីខែមិថុនា កន្លងទៅនេះ៕</span></p>
<p><span style="color: #000000;"><img src="http://www.thenational.ae/storyimage/AB/20160701/ARTICLE/160709964/AR/0/&NCS_modified=20160701174312&MaxW=640&imageVersion=default&AR-160709964.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ខ្មែរថកឃីង</span></p>