<p><span style="color: #000000;"><strong>(ប្រេស៊ីល)៖</strong> ក្រុមអ្នកវិទ្យាសាស្រ្ត របស់ប្រទេសប្រេស៊ីល បានធ្វើសេចក្តីប្រកាស នៅថ្ងៃព្រហស្បតិ៍នេះ អំពីរបកគំហើញនៃហ្វូស៊ីល របស់សត្វដាយណូស័រ ដែលធំជាងគេបង្អស់លើលោក និងមិនដែលធ្លាប់ ត្រូវបានរកឃើញនៅក្នុងតំបន់ អាមេរិកឡាទីននេះ ពីមុនមកឡើយ។ នេះបើតាមការការផ្សាយ នៅមុននេះបន្តិច ដោយទីភ្នាក់ងារព័ត៌មានចិន ស៊ិនហួរ នាព្រឹកថ្ងៃព្រហស្បតិ៍ ទី០៦ ខែតុលា ឆ្នាំ២០១៦។</span></p>
<p><span style="color: #000000;">យោងតាមអ្នកវិទ្យាសាស្រ្ត ដែលមកពីសារមន្ទីរវិទ្យាសាស្រ្តពិភពលោក ក្នុងទីក្រុង Rio de Janeiro នៃប្រទេសប្រស៊ីល គ្រោងឆ្អឹងដាយណូស័រ ដែលមានប្រវែងដល់ទៅ ២៥ម៉ែត្រនេះ មានឈ្មោះថា «Austroposeidon Magnificus» ហើយស្ថិតនៅក្នុងអំបូរដាយណូស័រយក្ស Titanosaurs ដែលស៊ីរុក្ខជាតិជាអាហារ និងមានកវែង ឆ្អឹងក្បាលតូច ប៉ុន្តែមានរាងកាយដ៏មាំមួន។</span></p>
<p><span style="color: #000000;">ពពួកសត្វដាយណូស័រខាងលើ ត្រូវគេជឿថាបានរស់នៅក្នុងអំឡុងយុគសម័យ Cretaceous Period ដែលមានរយៈពេលពី១៤៥ ដល់៦៦លានឆ្នាំមុន នៅតាមតំបន់ដែលជាផ្នែក នៃទ្វីបអាមេរិកខាងត្បូង ទ្វីបអាហ្វ្រិក ទ្វីបអង់តាក់ទិក និងទ្វីបអូសេអានី (អូស្ត្រាលី) សព្វថ្ងៃនេះ។</span></p>
<p><span style="color: #000000;">គួរបញ្ជាក់ដែរថា ហ្វូស៊ីលនៃសត្វដាយណូស័រ Austroposeidon Magnificus ត្រូវបានរកឃើញនៅក្នុង ឆ្នាំ១៩៥០ ដោយបាសាណិភូតវិទូ (អ្នកសិក្សាស្រាវជ្រាវពីសំណល់ហ្វូស៊ីល) សញ្ជាតិប្រស៊ីលលោក Llewellyn Ivor Price ដែលបានទទួលមរណភាពកាលពីឆ្នាំ១៩៨០ ដោយគ្មានការទទួលស្គាល់សម្រាប់ របកគំហើញរបស់លោកនេះឡើយ ហើយចាប់តាំងពីពេលនោះមក ហ្វូស៊ីលសត្វដាយណូស័រយក្សនេះ ត្រូវបានគេបន្តសិក្សាស្រាវជ្រាវរហូតមក ទាល់តែរបកគំហើញនេះ ត្រូវបានប្រកាសជាសារធារណៈ នៅថ្ងៃព្រហស្បតិ៍នេះ ថាជាគ្រោងឆ្អឹងសត្វដ៏ធំបំផុតលើផែនដី៕</span></p>
<p><span style="color: #000000;"><img src="http://d.ibtimes.co.uk/en/full/1481249/titanosaur.jpg?w=735" alt="" width="730" /></span></p>
<p><span style="color: #000000;"><img src="http://ichef.bbci.co.uk/news/660/media/images/74905000/jpg/_74905247_9l0a5919.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ខ្មែរថកឃីង</span></p>