<p><span style="color: #000000;">មិនគួរឲ្យជឿ ៖ ស្រ្តីជនជាតិចិនម្នាក់ មកពីទីក្រុង Zhoushan នោះ បានសម្រេចចិត្ត ជួលរថយន្ត តាក់ស៊ី ដល់ទៅ ៩០០គ្រឿង ក្នុងតម្លៃច្រើនជាង ១០,០០០យ័ន ស្មើនឹង ២០០០ដុល្លារសឹង្ហបុរី ក្នុងគោលបំណង តែមួយគត់នោះគឺ សុំមិត្តប្រុសរៀបការតែម្តង ។ សេចក្តីរាយការណ៍ ពីទំព័រសារព័ត៌មានចិនអោយដឹងថា ស្រ្តីជនជាតិចិនរូបនោះ ពុំត្រូវបានបញ្ជាក់ឈ្មោះឲ្យបានស្គាល់នោះទេ ខណៈករណីសុំរៀបការមិត្តប្រុស ដ៏កម្ររបស់នាង តាមរយៈការជួលរថយន្តតាក់ស៊ី ដល់ទៅ ៩០០គ្រឿងនោះ ត្រូវបានធ្វើឡើងនៅថ្ងៃទី ១៧មីនា កន្លងទៅនេះ នៅចន្លោះម៉ោង ៥-៧ ល្ងាច ។ </span></p>
<p><br /><a class="thickbox" title="" href="/FileManager/Commons/2017/3/23/27-23-03-2017--09-36-49.jpg"><img src="/FileManager/Articles/mce/2017/3/23/27-23-03-2017--09-36-49.jpg" alt="" /></a></p>
<p><span style="color: #000000;">ប្រិយមិត្ត ប្រាកដជាឆ្ងល់ថាតើ នាងធ្វើបានយ៉ាងដូចម្តេច ក្នុងការជួលតាក់ស៊ីដល់ទៅ ៩០០ គ្រឿងដើម្បី សុំរៀបការមិត្តប្រុស?? ការពិតនោះគឺថា រថយន្តតាក់ស៊ីទាំង ៩០០គ្រឿងដែលនាងបានជួលនោះ ក្នុង រយៈពេល ២ម៉ោងពេញចន្លោះពី ម៉ោង ៥ ទៅ ម៉ោង ៧ល្ងាច នឹងបើកជុំវិញទីក្រុង ខណៈនឹងមានរត់សារអេឡិចត្រូនិច LED នៅពីលើរថយន្តតាក់ស៊ីទាំងនោះ ព្រមៗគ្នាថា "បងសម្លាញ់ <span>Zhang Jianfeng អូនចង់រៀបការជាមួយបង</span>" ។ </span></p>
<div class="innity-ad"><span style="color: #000000;">បន្ទាប់មកទៀត គូស្នេហ៍ទាំង ២ បានបង្ហាញវត្តមាននៅទីតាំងសំចតរថយន្តមួយកន្លែង ខណៈមានការ ដុតទៀនបំភ្លឺថែមទៀតផង ស្របពេលដែលមានក្រុមមិត្តភក្កិ និងសាច់ញ្ញាត្តិចូលរួមយ៉ាងច្រើនកុះករ ។ ជាលទ្ធផល បុរសជាមិត្តប្រុស គឺលោក Zhang ក៏ទទួលសំណើសុំរៀបការពីសំណាក់មិត្តស្រីរបស់ខ្លួន។ </span></div>
<div class="innity-ad"></div>
<div class="innity-ad"><br /><a class="thickbox" title="" href="/FileManager/Commons/2017/3/23/27a-23-03-2017--09-37-02.jpg"><img src="/FileManager/Articles/mce/2017/3/23/27a-23-03-2017--09-37-02.jpg" alt="" /></a></div>
<div class="innity-ad"><span style="color: #000000;">របាយការណ៍បញ្ជាក់ឲ្យដឹងថា លោក Zhang បានជួបមិត្តស្រីរបស់លោក នៅក្នុងទីក្រុង Zhuhai ខណៈ បច្ចុប្បន្នភាពអ្នកទាំង ២ បម្រើការងារនៅទីក្រុង ២ផ្សេងពីគ្នា ពោល នារីជាមិត្តស្រីបម្រើការនៅទីក្រុង Ningbo ខណៈលោក Zhang ធ្វើការនៅទីក្រុង Zhoushan ។ ទីក្រុង Ningbo និងទីក្រុង Zhoushan គឺជា ទីក្រុងនៅក្នុងខេត្ត Zhejiang ភាគខាងកើត ប្រទេសចិន ប៉ុន្តែតម្រូវឲ្យធ្វើដំណើររយៈពេល ១ម៉ោង និង ៤០នាទី ទើបមកដល់។ </span></div>
<div class="innity-ad"><span style="color: #000000;"><br />គួររំឮកថា ករណីសុំសេចក្តីស្រឡាញ់ ឬសុំរៀបការ តាមរយៈរថយន្តតាក់ស៊ីនោះពុំមានជារឿងថ្មីនោះទេ នៅក្នុងទីក្រុង Zhoushan តួយ៉ាង កាលពីឆ្នាំមុន អំឡុងខែ មិថុនា បុរសម្នាក់ បានសុំមិត្តស្រីរៀបការ ដោយមានជាសារ រត់នៅលើរថយន្តតាក់ស៊ី ឲ្យដឹងថា "រាល់ពេលដែលមេឃភ្លៀង បងតែងបារម្ភពីអូន ម្ចាស់ចិត្តបង Fang Xiaojie យើងនៅជាមួយគ្នាណា" សារដ៏ផ្អែមល្ហែមមួយនេះហើយ បានរត់ជាសារ អេឡិចត្រូនិច LED រយៈពេលដល់ទៅ ១០ថ្ងៃ នៅលើរថយន្តតាក់ស៊ី ៕</span></div>
<div class="innity-ad"><span style="color: #000000;"><br /><br /></span></div>
<div class="innity-ad"></div>
<div class="innity-ad" style="text-align: right;"><span style="font-size: 12px; color: #000000;">ប្រែសម្រួល ៖ កុសល</span></div>
<div class="innity-ad" style="text-align: right;"><span style="font-size: 12px; color: #000000;">ប្រភព ៖ អាស៊ីវ័ន </span></div>