<p><span style="color: #000000;"><strong>(បន្ទាយមានជ័យ)៖</strong> បុរសវ័យ៤០ឆ្នាំម្នាក់ កំពុងដង្ហោយរកយុត្តិធម៌ ពីអាជ្ញាធរមានសមត្ថកិច្ច ឲ្យជួយដោះស្រាយលើករណី សាច់ថ្លៃខាងប្រពន្ធ បានចាប់រំលោភកូនស្រីរបស់ខ្លួន ដែលមានអាយុទើបតែ៤ឆ្នាំ អស់រយៈពេលជិត៤ខែមកហើយ តែមិនទាន់ទទួលបានយុត្តិធម៌នៅឡើយ ព្រោះកម្លាំងសមត្ថកិច្ចមូលដ្ឋាន ហាក់ធ្វើព្រងើយកន្តើយ ឯជនបង្ករស់នៅធម្មតា ដូចគ្មានរឿងអ្វីកើតឡើង។</span></p>
<p><span style="color: #000000;">ថ្លែងប្រាប់ភ្នាក់ងារ Fresh News ទាំងទឹកមុខក្រៀមក្រំ នាព្រឹកថ្ងៃទី១៦ ខែវិច្ឆិកានេះ លោក លាប លីតេង បានឲ្យដឹងថា កូនស្រីរបស់លោកមានឈ្មោះ ត.ស.គ អាយុទើបតែ៤ឆ្នាំប៉ុណ្ណោះ ត្រូវបងប្អូនសាច់ថ្លៃឈ្មោះ ពៅ អាយុជាង២០ឆ្នាំ បានចាប់រំលោភនាង តាំងពីថ្ងៃទី២២ ខែសីហា ឆ្នាំ២០១៥ កន្លងទៅ តែត្រូវបានបែកការណ៍ នៅថ្ងៃទី២៧ ខែសីហា ឆ្នាំ២០១៦ ខណៈរូបលោកបាននាំកូនស្រី មកពីលេងផ្ទះម្តាយបង្កើតវិញ។</span></p>
<p><span style="color: #000000;">លោក លាប លីតេង បានបន្តថា នៅពេលល្ងាច កូនស្រីរបស់លោកមកពីរៀនវិញ រូបលោកក៏នាំនាងទៅងូតទឹក ហើយនាងបានប្រាប់លោកថា «ខ្ញុំឈឺណាស់» លោកក៏យកថ្នាំទៅលាបលើភ្លៅរបស់នាង ស្រាប់តែនាងប្រាប់លោកវិញថា <strong>«ពូពៅ បានចាប់រំលោភខ្ញុំ»</strong>។</span></p>
<p><span style="color: #000000;">លោកបន្ថែមថា ក្រោយដឹងហេតុការណ៍ទាំងនោះហើយ លោកក៏បានទៅរកឈ្មោះ ពៅ ជាសន្តិសុខនៅក្នុងភោជនីយ៍ដ្ឋាន «នាគទិព្វ១» ដើម្បីសួរនាំរឿងទាំងអស់ បែរជាឈ្មោះ ពៅ នោះបានវាយទៅលើរូបលោក បណ្ដាលឲ្យជាំភ្នែកខាងឆ្វេង ពេលនោះម្ចាស់ភោជនីដ្ឋាន «នាគទិព្វ១» បានចេញទៅឃាត់ និងចរចានិយាយគ្នា។</span></p>
<p><span style="color: #000000;">លោកបន្ថែមទៀតថា ក្រោយមកទៀត លោកបាននាំកូនស្រីទៅមន្ទីរពេទ្យ ដើម្បីពិនិត្យមើលអាការៈ ហើយគ្រូពេទ្យបានប្រាប់លោកថា នាងពិតជាត្រូវបានគេរំលោភ ព្រោះមានដាច់រលាត់ប្រដាប់ភេទ។ លោកក៏នាំកូនស្រីទៅដាក់ពាក្យបណ្តឹង នៅប៉ុស្តិ៍នគរបាលសង្កាត់ប៉ោយប៉ែត ដើម្បីជួយអន្តរាគមន៍ តែកម្លាំងសមត្ថកិច្ច មិនរវល់នឹងរឿងនេះឡើយ។ លោកមិនអស់ចិត្ត ក៏បន្តទៅដាក់ពាក្យបណ្ដឹង នៅអធិការនគរបាល ក្រុងប៉ោយប៉ែតទៀត ដើម្បីស្នើជួយអន្តរាគមន៍ តែរហូតដល់ពេលនេះ នៅតែមិនទាន់មានចំណាត់ការ ណាមួយនៅឡើយ។</span></p>
<p><span style="color: #000000;">ជុំវិញបញ្ហានេះ លោកប្រធានមន្ទីរពេទ្យបង្អែកក្រុងប៉ោយប៉ែត បានប្រាប់ភ្នាក់ងារ Fresh News តាមទូរស័ព្ទថា ការងារចេញក្រដាសធ្វើកោសលក្យវិច្ច័យ បញ្ហារំលោភក្មេងស្រីខាងលើ គឺមិនអាចឲ្យអាណាព្យាបាលបានទេ មានតែខាងប្រព័ន្ធតុលាការ និងសមត្ថកិច្ចពាក់ព័ន្ធតែប៉ុណ្ណោះ។ ចំណែកការរំលោភ មិនរំលោភនោះ លោកមិនអាចប្រាប់បានទេ ព្រោះជាការសម្ងាត់ ហើយរឿងកោសល្យវិច្ច័យនោះ ត្រូវបានក្រុមការងាររបស់លោក បញ្ជូនទៅកាន់មន្ទីរសុខាភិបាល ខេត្តបន្ទាយមានជ័យហើយ។</span></p>
<p><span style="color: #000000;">ជាមួយគ្នានេះ លោក ធិន ស៊ិនដេត អធិការក្រុងប៉ោយប៉ែត បានប្រាប់ថា<strong> «ខាងយើងកំពុងរង់ចាំ ក្រដាសកោសល្យវិច័យសិន ពេលមកដល់ហើយ យើងនឹងពិនិត្យមើល បើឃើញថា មានករណីរំលោភលើកុមារីរងគ្រោះមែន កម្លាំងយើងនឹងចុះឃាត់ខ្លួនជនបង្កតែម្តង ដើម្បីចាត់ការតាមផ្លូវច្បាប់»</strong>៕</span></p>
<p><span style="color: #000000;"><iframe src="https://www.facebook.com/plugins/video.php?href=https%3A%2F%2Fwww.facebook.com%2F1440633546251012%2Fvideos%2F1690515351262829%2F&show_text=0&width=730" frameborder="0" width="500" height="410"></iframe></span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-16-15-38-13-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>