<p><span style="color: #000000;">ភ្នំពេញ៖ មន្ទីរបរិស្ថានខេត្តកំពង់ឆ្នាំង បានច្រានចោលចំពោះការផ្សព្វផ្សាយព័ត៌មានលើបណ្តាញសង្គមហ្វេសប៊ុកដែលថា មានការធ្វើប័ណ្ណកម្មសិទ្ធិ និងអនុញ្ញាតឲ្យឈូសឆាយដីនៅតំបន់ការពារដែនជម្រកសត្វព្រៃភ្នំឱរាល់ នៅចំណុចស្រុកទឹកផុស ខេត្តកំពង់ឆ្នាំង ដោយបានស្នើឲ្យអាជ្ញាធរខេត្តមានវិធានការផ្លូវច្បាប់ទៅលើអ្នកផ្សាយព័ត៌មានបំផ្លើសពីការពិតនេះ។</span></p>
<p><span style="color: #000000;">កាលពីថ្ងៃអង្គារ គណនេយ្យហ្វេសប៊ុកឈ្មោះ ស្ថានីយព័ត៌មាន វិទ្យុរិទ្ធិសែន បានចុះផ្សាយព័ត៌មានថា «ដីដែនជម្រកសត្វព្រៃភ្នំឱរ៉ាល់រាប់ពាន់ហិកតា ដែលជាដីព្រះរាជក្រិត្យឆ្នាំ១៩៩៣ ត្រូវបានគេធ្វើប័ណ្ណកម្មសិទ្ធិរួចរាល់ និងមានច្បាប់ឈូសឆាយដែលចុះហត្ថលេខាទទួលស្គាល់់ដោយថ្នាក់ដឹកនាំខេត្តទៀត ដែលករណីនេះតើអាចទុកចិត្តបានទេថា ការវាស់វែងដីនៅចំណុចឃុំក្បាលទឹក ស្រុកទឹកផុស ខេត្តកំពង់ឆ្នាំង ដែលជាដីដែនជម្រកសត្វព្រៃភ្នំឱរ៉ាល់គ្មានអំពើពុករលួយ»។</span></p>
<p><span style="color: #000000;"><a class="thickbox" title="" href="/FileManager/Commons/2019/5/11/1-11-05-2019--10-08-12.PNG"><img src="/FileManager/Articles/mce/2019/5/11/1-11-05-2019--10-08-12.PNG" alt="" /></a><br /></span></p>
<p><span style="color: #000000;">ពាក់ព័ន្ធនឹងការចុះផ្សាយនេះ អ្នកនាំពាក្យមន្ទីរបរិស្ថានខេត្តកំពង់ឆ្នាំង បានចេញសេចក្តីបញ្ជាក់កាលពីថ្ងៃពុធថា ដែនជម្រកសត្វព្រៃភ្នំឱរាល់ ត្រូវបានកំណត់ដោយព្រះរាជក្រឹត្យឆ្នាំ១៩៩៣ ជាតំបន់ការពារ ដែលមានផ្ទៃដីសរុប 253750ហិកតា ក្នុងនោះស្ថិតនៅក្នុងខេត្តកំពង់ឆ្នាំង 35772ហិកតា។</span></p>
<p><span style="color: #000000;">ពាក់ព័ន្ធនឹងទីតាំងដែនជម្រកសត្វព្រៃភ្នំឱរាល់ ក្នុងស្រុកទឹកផុស មានប្រជាពលរដ្ឋរស់នៅចំនួន១២ភូមិ ដែលករណីនេះ រាជរដ្ឋាភិបាលបានសម្រេចកាត់ឆ្វៀលដីទំហំ ៣៦៦៩ហិកតា កាលពីឆ្នាំ២០១២-២០១៣ ដើម្បីអនុប្រយោគ និងធ្វើប្រទានកម្មជូនប្រជាពលរដ្ឋទាំង១២ភូមិ ដែលពួកគាត់អាចមានសិទ្ធិឈូសឆាយប្រើប្រាស់ដីនោះដោយស្របច្បាប់។</span></p>
<p><span style="color: #000000;">អ្នកនាំពាក្យបានបន្តថា ដូច្នេះចំពោះការចុះផ្សាយព័ត៌មានរបស់គណនេយ្យឈ្មោះ សារព័ត៌មានវិទ្យុរិទ្ធិសែននេះជាការផ្សាយព័ត៌មានដោយភូតកុហក បំផ្លើសពីការពិត ដែលនាំឲ្យសាធារណជនមានការភ័នច្រឡំ ខណៈដែលក្រសួងបរិស្ថាន ក៏ដូចជាមន្ទីរបរិស្ថានខេត្ត រួមនិងអង្គភាពការពារដែនជម្រកសត្វព្រៃភ្នំឱរាល់ បាននិងកំពុងខិតខំបំពេញភារកិច្ចការពារដែនជម្រកសត្វព្រៃនេះ។</span></p>
<p><span style="color: #000000;">អ្នកនាំពាក្យ បានបញ្ជាក់ថា៖ «មន្ទីរបរិស្ថានខេត្ត សូមបដិសេធទាំងស្រុងនូវខ្លឹមសារនៃការចុះផ្សាយនេះ និងសំណូមពរដល់ឯកឧត្តមអភិបាលខេត្ត និងរដ្ឋបាលខេត្ត មេត្តាចាត់វិធានការស្របតាមនីតិវិធីលើករណីនេះ»។</span></p>
<p><span style="color: #000000;">នាយកស្ថានីយវិទ្យុរិទ្ធិសែន និងជាចាងហ្វាងការផ្សាយគេហទំព័ររិទ្ធិសែន News លោកសុខ ឧត្តម នៅថ្ងៃព្រហស្បត្តិ៍នេះ បានចេញសេចក្តីប្រកាសព័ត៌មានមួយ ដោយស្នើដល់ប្រមុខរាជរដ្ឋាភិបាល និងរដ្ឋមន្ត្រីក្រសួងបរិស្ថាន បញ្ជូនមន្ត្រីអធិការកិច្ចដើម្បីធ្វើការស្រាវជ្រាវ និងស្វែងរកការពិតលើករណីនេះ។</span></p>
<p><span style="color: #000000;">លោកថា៖ «ខ្ញុំសូមស្នើសុំសម្តេចតេជោ ហ៊ុន សែន និងឯកឧត្តមសាយ សំអាល់ រដ្ឋមន្ត្រីក្រសួងបរិស្ថាន បញ្ជូនកម្លាំងអធិការកិច្ចពិសេស ដើម្បីមកធ្វើការស្រាវជ្រាវ និងពិនិត្យមើលជាក់ស្តែង វាយតម្លៃឲ្យមានប្រសិទ្ធិភាព ដើម្បីជៀសវាងការយល់ច្រឡំទៅលើមន្ត្រីបរិស្ថាន និងវាយតម្លៃឲ្យមានប្រសិទ្ធិភាព ដើម្បីជៀសវាងការយល់ច្រឡំទៅលើមន្ត្រីបរិស្ថានខេត្ត និងជៀសវាងការស្រុតចុះពីតម្លៃសារព័ត៌មាននៅកម្ពុជា» ៕</span></p>
<p><span style="color: #000000;"><a class="c_tab" href="https://www.khmertimeskh.com/" target="_blank"><img src="/FileManager/Articles/mce/2019/5/10/khmertime-10-05-2019--15-33-31.png" alt="" /></a><br /></span></p>
<p style="text-align: right;"><span style="color: #000000;">ប្រភព ៖ khmertimes</span></p>