<p><span style="color: #000000;"><strong>(លីប៊ី)៖</strong> រយៈពេល០៥ឆ្នាំ បន្ទាប់ពីការសា្លប់របស់មេដឹកនាំលីប៊ី លោក ហ្គាដាហ្វី បងប្អូនជីដូនមួយរបស់លោក គឺលោក Ahmed Kadhafi ad-Dam បានចេញមុខធ្វើការពន្យល់ពី មូលហេតុមួយចំនួន ដែលលោកផ្ទាល់អះអាងថា អាចជាកត្តាទាក់ទាញបណ្ដាប្រទេសលោកខាងលិច ឲ្យរៀបចំគំរោងធ្វើរដ្ឋប្រហារទម្លាក់ លោក ហ្គាដាហ្វី ពីអំណាចកាលពីឆ្នាំ២០១១។ នេះបើយោងតាមការចុះផ្សាយ ដោយសារព័ត៌មានរុស្ស៊ី Sputnik នៅរសៀលថ្ងៃចន្ទ ទី២៤ ខែតុលា ឆ្នាំ២០១៦។</span></p>
<p><span style="color: #000000;">ថ្លែងនៅក្នុងបទសម្ភាសន៍ ជាមួយសារព័ត៌មាន RT លោក Ahmed Kadhafi ad-Dam បានគូសបញ្ជាក់ថា គំរោងបង្កើតសហភាពអាហ្រ្វិក និងរដ្ឋាភិបាល អាហ្រ្វិករួមមួយ គឺជាមូលហេតុដ៏សំខាន់ នៃការធ្វើអន្តរាគមន៍យោធានៅលីប៊ី រួមទំាងការធ្វើឃាតអតីតមេដឹកនាំលីប៊ី លោក ម៉ូអាម៉ា ហ្គាដាហ្វី។ លោក Ahmed Kadhafi បានលើកឡើងដូច្នេះថា «បណ្ដាប្រទេសលោកខាងលិច បានមើលឃើញពីការគំរាមកំហែង ដល់ផលប្រយោជន៍របស់ពួកគេ ដែលកើតចេញពីការ ដឹកនំាការតស៊ូរបស់លោក ហ្គាដាហ្វី ដើម្បីសេរីភាព ទ្វីបអាហ្រ្វិក និងបណ្ដេញពួកប្រទេសអាណានិគម ចេញពីអាហ្រ្វិក»។</span></p>
<p><span style="color: #000000;">បងប្អូនជីដូនរបស់លោក ហ្គាដាហ្វី រូបនេះបានឲ្យដឹងទៀតថា នៅឆ្នាំ១៩៩៩ លោក Mouammar Kadhafi បានដាក់ចេញនូវការជជែកដេញដោល មួយស្ដីពីការបង្កើតសហភាពអាហ្រ្វិក និងរដ្ឋាភិបាលអាហ្រ្វិករួបរួមមួយ ក្នុងគោលបំណងប្រមូលផ្ដុំសមត្ថភាព ទ្វីបអាហ្រ្វិកទំាងមូល ហើយដែលនយោបាយនេះឯង គឺប្រឆំាងនឹង ផលប្រយោជន៍ នៃបណ្ដាប្រទេសលោកខាងលិចមួយចំនួន ដូច្នេះទើបលោក ហ្គាដាហ្វី ត្រូវបានទម្លាក់ពីអំណាច និងត្រូវគេធ្វើឃាត។</span></p>
<p><span style="color: #000000;">ជាមួយគ្នានោះដែរ លោក Ahmed Kadhafi បានជម្រុញឲ្យអង្គការសហប្រជាជាតិ និងអគ្គលេខាធិការថ្មី ត្រូវតែបើកការស៊ើបអង្កេតជុំវិញ ព្រឹត្តិការណ៍កាលពីឆ្នាំ២០១១ ត្បិតក្នុងរយៈពេលជាង ០៥ឆ្នាំមកនេះ ក្រុមប្រឹក្សាសន្តិសុខ មិនបានបើកការស៊ើបអង្កេត ណាមួយនោះទេ។</span></p>
<p><span style="color: #000000;">គួររំឭកថា កាលពីខែមីនា ឆ្នាំ២០១១ ក្រុមប្រឹក្សាសន្តិសុខអង្គការសហប្រជាជាតិ បានសម្រេចអនុញ្ញាតឲ្យ មានការធ្វើអន្តរាគមន៍យោធា ក្រោមការដឹកនំារបស់ សហរដ្ឋអាមេរិក បារំាង និង អង់គ្លេស នៅលីប៊ី ដើម្បីការពារជនស៊ីវិលពីកងកម្លំាងលោក ហ្គាដាហ្វី។ ក៏ប៉ុន្តែ០៥ឆ្នំាបន្ទាប់ពីរបបដឹនំា ហ្គាដាហ្វី រលំរលាយទៅ លីប៊ីនៅតែបន្តស្ថិតនៅក្នុងភាពវឹកវរ ខណៈសេដ្ឋកិច្ចនិងការរស់នៅ របស់ប្រជាជនលីប៊ី កំពុងធ្លាក់ចុះដុនដាប យ៉ាងខ្លំាងបើធៀបទៅនឹងកាលពីលោក ហ្គាដាហ្វី នៅមានជីវិត ប្រជាពលរដ្ឋលីប៊ី មានការសោកស្តាយចំពោះបញ្ហានេះ។</span></p>
<p><span style="color: #000000;">ក្នុងនោះប្រជាពលរដ្ឋអ៉ីរ៉ាក់ក៏មានការ សោកស្តាយផងដែរ ចំពោះការសម្លាប់លោក សាដាម ហ៊ូនសេន។ ម្យ៉ាងវិញទៀតសូម្បីតែអតីតនាយករដ្ឋមន្ត្រី អង់គ្លេសលោក Tony Blair ក៏បានសារភាពដែរថា ប្រសិនបើលោក Kadhafi និងលោក Saddam Hussein នៅមានជីវិត ក្រុម ISIS ក៏ទំនងជាមិនកើតមាន ឡើងដែរ៕</span></p>
<p><br /><span style="color: #000000;"><a class="thickbox" title="" href="/FileManager/Commons/2016/10/24/02d-24-10-2016--15-21-12.jpg"><span style="color: #000000;"><img src="/FileManager/Articles/mce/2016/10/24/02d-24-10-2016--15-21-12.jpg" alt="" /></span></a></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span><a class="thickbox" title="" href="/FileManager/Commons/2016/10/24/02d-24-10-2016--15-21-12.jpg"></a></p>