<div class="body">
<div class="container">
<div class="row-fluid">
<div id="content" class="span9">
<div class="item-page">
<p><span style="color: #000000;"><strong>(សៀមរាប)៖</strong> ដើមគ្រញូងចំណាស់មួយដើម ដែលមានអង្កត់ផ្ចិត ៨៣០សង់ទីម៉ែត្រ (៨.៣តឹក) ប្រវែងជាង៨ម៉ែត្រ នៅមាត់កសិន្ធុអង្គរធំ ខាងកើតវត្តថ្មីដំរីសែនជ័យ ស្ថិតនៅភូមិនគរក្រៅ សង្កាត់គោកចក ក្រុងសៀមរាប ត្រូវបានជនខិលខូចលួចអារដោយរណាយន្ត នៅយប់ថ្ងៃទី០៤ ខែតុលា ឆ្នាំ២០១៦។</span></p>
<p><span style="color: #000000;">លោក ចេវ ផល ប្រធានការិយាល័យបរិស្ថាន នៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិបានឲ្យដឹងនៅរសៀលថ្ងៃទី០៦ ខែតុលានេះថា ដើមគ្រញូងខាងលើ ត្រូវបានជនខិលខូចលួចអារកាត់តាំងពីយប់ថ្ងៃទី០៤ តែមិនទាន់ដួលរលំទេ។ នៅរសៀលថ្ងៃទី៥ ខែតុលា លោកបានទទួលដំណឹងតាមរយៈលោកមេភូមិនគរក្រៅថា មានករណីលួចអារកាត់ដើមគ្រញូងនៅទីតាំងខាងលើ ទើបក្រុមការងាររបស់លោក បានទៅពិនិត្យដល់ទីតាំងផ្ទាល់ ហើយបានឃើញថា ដើមគ្រញូងនេះ ត្រូវបានជនខិលខូចលួចកាត់មែន នៅសល់តែប្រមាណ ២តឹកទៀតប៉ុណ្ណោះ ហើយជនខិលខូចបានយកបេះស្លឹកឈើញាត់ក្នុងប្រហោងដែលអារ ព្រមទាំងលាបភក់បិទពីខាងក្រៅទៀតផង។</span></p>
<p><span style="color: #000000;">ដោយពិនិត្យឃើញថា ដើមគ្រញូងនេះច្បាស់ជានឹងដួលរលំបង្កគ្រោះថ្នាក់ ដល់អ្នកធ្វើដំណើរឆ្លងកាត់ ឬចូលជ្រក និងដើម្បីយកដើមគ្រញូងនេះមករក្សាទុក ជៀសវាងជនខិលខូចលួចកាត់បន្តនៅពេលយប់ ក្រុមការងាររបស់លោក បានរាយការណ៍ជូនថ្នាក់ដឹកនាំនៃអាជ្ញាធរជាតិដើម្បីចាត់វិធានការជាបន្ទាន់។ ក្រោយទទួលបានអនុសាសន៍ពីថ្នាក់ដឹកនាំ ទើបនៅព្រឹកថ្ងៃទី៦ ខែតុលាក្រុមការងាររបស់លោកបានផ្តួលរំលំដើមគ្រញូងនោះតែម្តង ដោយមានប្រជាការពារភូមិនៅចាំមើលជាមួយផង។</span></p>
<p><span style="color: #000000;">លោក ផល បន្តថា គ្រាន់តែក្រុមការងារផ្តួលហើយភ្លាម បម្រុងនឹងដឹងយកទៅរក្សាទុកស្រាប់តែប្រជាពលរដ្ឋមួយក្រុម បានមកតវ៉ានិងហាមឃាត់មិនឲ្យដឹកចេញ ហើយបែរជាចោទប្រកាន់ក្រុមការងាររបស់លោកថា ជាអ្នកកាប់បំផ្លាញទៅវិញ ទោះជាក្រុមប្រឹក្សាសង្កាត់ មេភូមិនគរក្រៅ និងក្រុមការងារលោកពន្យល់សម្របសម្រួលយ៉ាងណា ក៏មិនព្រមស្តាប់ដែរ។ ឃើញដូច្នេះ ក្រុមការងាររបស់លោកសម្រេចធ្វើលិខិត ប្រគល់ដើមគ្រញូងនេះជូនអាជ្ញាធរភូមិឃុំ ដើម្បីរក្សាទុក និងសម្របសម្រួលជាមួយប្រជាពលរដ្ឋជាមុនសិន។</span></p>
<p><span style="color: #000000;">លោក មីក រឹទ្ធ មេភូមិនគរក្រៅបានឲ្យដឹងថា នៅថ្ងៃទី៥ កន្លងទៅនេះប៉ុស្តិ៍រដ្ឋបាលភូមិមួយរូប ដែលបានទៅស្ទូចត្រីនៅមាត់កសិន្ធុ បានឃើញស្នាមអារដើមគ្រញូងខាងលើ ក៏បានទូរសព្ទមកប្រាប់លោក។ លោកក៏បានទៅពិនិត្យមើលឃើញជាក់ស្តែងក៏បានរាយការណ៍ទៅក្រុមប្រឹក្សាសង្កាត់គោកចក និងរាយការណ៍ទៅក្រុមការងារព្រៃឈើនៃអាជ្ញាធរជាតិអប្សរា ដើម្បីចាត់វិធានការយ៉ាងណាកុំឲ្យមានគ្រោះថ្នាក់។</span></p>
<p><span style="color: #000000;">ចំពោះករណីប្រជាពលរដ្ឋមកតវ៉ា លោកមេភូមិរៀបរាប់ថា មុននឹងផ្តួលដើមគ្រញូងនេះ លោកក៏បានប្រាប់ដល់ប្រជាពលរដ្ឋដឹងមុនខ្លះដែរ តែមិនបានទាំងអស់ទេ។ លុះពេលផ្តួលដួលហើយ ក៏ស្រាប់តែមានប្រជាជនប្រមាណជា៩នាក់ មកស្រែកតវ៉ាហាម ឃាត់មិនឲ្យដឹកចេញ។ នៅព្រឹកថ្ងៃទី០៦នេះ លោកបានពន្យល់ និងសម្របសម្រួលជាមួយប្រជាពលរដ្ឋទាំងនោះម្តងហើយ តែពួកគាត់នៅតែព្រមដដែល។ លោកនឹងសហការជាមួយក្រុមប្រឹក្សាសង្កាត់ដើម្បីធ្វើការងារនេះបន្តទៀត ហើយលោកនឹងចាត់ក្រុមប្រជាការពារភូមិដើម្បីយាមដើមគ្រញូងនេះ មិនឲ្យមានជនខិលខូចមកលួចដឹកចេញនៅពេលយប់។</span></p>
<p><span style="color: #000000;">លោក និន ចាន់សាមៀន ប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌និងបរិស្ថាននៃអាជ្ញាធរជាតិអប្សរា បានថ្លែងថា ឥឡូវនេះក្រុមការងាររបស់លោកកំពុងធ្វើការជាមួយ ឧទ្យាននុរក្សនៃក្រសួងបរិស្ថាន ដើម្បីកំណត់អត្តសញ្ញាណជនល្មើស និងឈានទៅចាត់វិធានការផ្លូវច្បាប់៕</span></p>
<p><span style="color: #000000;"><img src="http://image.freshnewsasia.com/2016/011/fn-2016-11-06-17-51-49-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/011/fn-2016-11-06-17-51-49-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/011/fn-2016-11-06-17-51-49-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/011/fn-2016-11-06-17-51-49-3.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/011/fn-2016-11-06-17-51-49-4.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/011/fn-2016-11-06-17-51-49-5.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/011/fn-2016-11-06-17-51-49-6.jpg" alt="" width="730" /></span></p>
</div>
<div id="system-message-container">
<div id="system-message" style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span><br /><br /></div>
</div>
</div>
</div>
</div>
</div>