<p><span style="color: #000000;"><strong>(ម៉ាឌ្រីដ)៖</strong> តារាបាល់ទាត់ Cristiano Ronaldo កំពុងឈរនៅលេខ១ លំដាប់ពិភពលោក ក្នុងនាមជាកីឡាករដែលរកចំណូលបានច្រើនជាងគេទាំង១០រូបនាពេលបច្ចុប្បន្ន ពីវិស័យកីឡា នាំមុខគូប្រជែង Lionel Messi របស់ក្លឹប FC Barcelona។</span></p>
<p><span style="color: #000000;">យោងតាមគេហទំព័រ Business Insider បានចេញផ្សាយថា ប្រាក់ចំណូលប្រចាំឆ្នាំ២០១៦ នេះរបស់កីឡាករវ័យ៣១ ឆ្នាំ ជនជាតិព័រទុយហ្គាល់ Ronaldo បានកើនដល់ ៨៨លានដុល្លារ គ្រាដែលលេខ២ ជនជាតិអាហ្សង់ទីន Messi រកបានតែ ៨១.៤លានដុល្លារប៉ុណ្ណោះ និងតារាបាល់បោះ LeBron James ឈរនៅលេខ៣ មានតែ ៧៧.២លានដុល្លារ។</span></p>
<p><span style="color: #000000;">សូមបញ្ជាក់ផងដែរថា អ្វីដែលធ្វើឲ្យប្រាក់ចំណូលប្រចាំឆ្នាំ (Annual Income) របស់បុរសកូនមួយ ដែលកំពុងប្រកបអាជីពក្នុង ក្លឹបស្តេចស Real Madrid របស់អេស្ប៉ាញកើនឡើងយ៉ាងឆាប់រហ័សបែបនេះ គឺដោយសារតែរូបគេទើបតែចុះកិច្ចសន្យាផ្សាយពាណិជ្ជកម្មឲ្យក្រុមហ៊ុនផលិតសម្ភារៈកីឡាម៉ាក Nike ដែលមានទំហំទឹកប្រាក់ដល់ទៅ ១ពាន់លានដុល្លារ ($1 billion) ដោយក្នុង១ឆ្នាំ Ronaldo ទទួលបាន ១៣លានដុល្លារពីក្រុមហ៊ុនយក្សរបស់អាមេរិកមួយនេះ។</span></p>
<p><span style="color: #000000;">ប្រភពចំណូលផ្សេងទៀតរបស់ Ronaldo បានមកពីចុះកិច្ចសន្យាផ្សាយពាណិជ្ជកម្មឲ្យក្រុមហ៊ុន Tag Heuer, Berbalife, Pokerstar, សាប៊ូកក់សក់ Clear និងលក់សិទ្ធិឲ្យប្រព័ន្ធផ្សព្វផ្សាយផ្សេងៗទៀត ក្រៅពីទទួលបាន៥០លានដុល្លារពីប្រាក់ខែ និងប្រាក់លើកទឹកចិត្តពី Real Madrid។</span></p>
<p><span style="color: #000000;">តែយ៉ាងណាក៏ដោយ អតីតកីឡាករខ្សែប្រយុទ្ធក្លឹប Sporting CP (ព័រទុយហ្គាល់) និងក្លឹបអង់គ្លេស Manchester United មួយនេះ ឈរនៅលេខ២ ពិភពលោកទៅវិញ បើប្រៀបធៀបជាមួយនឹងកីឡាករបាល់បោះ Michael Jordan ក្នុងអំឡុងឆ្នាំ១៩៩០។</span></p>
<p><span style="color: #000000;"><strong>ខាងក្រោមនេះ Khmertalking សូមលើកយកកីឡាករ ១០រូប ដែលរកចំណូលបានច្រើនជាងគេ ប្រចាំឆ្នាំ២០១៦៖</strong></span><br /><span style="color: #000000;">1. Cristiano Ronaldo (បាល់ទាត់) រកបាន ៨៨លានដុល្លារ</span><br /><span style="color: #000000;">2. Lionel Messi (បាល់ទាត់) រកបាន ៨១.៤លានដុល្លារ</span><br /><span style="color: #000000;">3. LeBron James (បាល់បោះ) រកបាន ៧៧.២លានដុល្លារ</span><br /><span style="color: #000000;">4. Roger Federer (តេន្នីស) រកបាន ៦៧.៨លានដុល្លារ</span><br /><span style="color: #000000;">5. Kevin Durant (បាល់បោះ) រកបាន ៥៦.២លានដុល្លារ</span><br /><span style="color: #000000;">6. Novak Djokovic (តេន្នីស) រកបាន ៥៥.៨លានដុល្លារ</span><br /><span style="color: #000000;">7. Cam Newton (បាល់ទាត់) រកបាន៥៣.១លានដុល្លារ</span><br /><span style="color: #000000;">8. Phil Mickelson (វាយកូនហ្គោល) រកបាន ៥២.៩លានដុល្លារ</span><br /><span style="color: #000000;">9. Jordan Spieth (វាយកូនហ្គោល) រកបាន ៥២.៨លានដុល្លារ</span><br /><span style="color: #000000;">10. Kobe Bryant (បាល់បោះ) រកបាន ៥០លានដុល្លារ៕</span></p>
<p><span style="color: #000000;"><img src="http://bjstlh.com/data/images/christiano-ronaldo-images/christiano-ronaldo-images-1.jpg" alt="" width="730" /></span></p>
<p><span style="color: #000000;"><img src="https://static.independent.co.uk/s3fs-public/styles/article_small/public/thumbnails/image/2016/11/06/17/ronaldo.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>