<p><span style="color: #000000;"><strong>(ភ្នំពេញ)៖</strong> លោក រស់ សាលីន អ្នកនាំពាក្យក្រសួងអប់រំ យុវជន និងកីឡា បានប្រាប់អង្គភាព Fresh News នៅរសៀលថ្ងៃទី២២ ខែសីហា ឆ្នាំ២០១៦នេះ ថា <strong>«បេក្ខជនដែលបានមកប្រឡងសញ្ញាបត្រមធ្យមសិក្សាទុតិយភូមិ នាព្រឹកមិញនេះ នៅទូទាំងប្រទេសនោះ មានចំនួន៦នាក់ ដែលមានបញ្ហាសុខភាព ប៉ុន្ដែក្រោយពីបានសង្គ្រោះបឋមពីគ្រូពេទ្យរួចមក ក៏បានចូលប្រឡងវិញតាមធម្មតា»</strong>។</span></p>
<p><span style="color: #000000;">បន្ថែមពីនេះ លោក បានបញ្ជាក់ថា ការប្រឡងព្រឹកមិញនេះ មានដំណើរការទៅបានយ៉ាងល្អ ព្រោះតែគ្រប់ភាគីពាក់ព័ន្ធទាំងអស់ បានសហការអនុវត្តតួនាទីរបស់ខ្លួន រៀងៗខ្លួន។ លោកបន្ដថា ជាពិសេសបេក្ខជន មានការយល់ដឹងមកប្រឡងដោយពុំមានសំណៅឯកសារ ឬឧបករណ៍អេឡិចត្រូនិច នោះទេ ហើយមានតែតិចតួចបំផុត។</span></p>
<p><span style="color: #000000;">លោក បានឲ្យដឹងទៀតថា<strong> «នេះវាគូសបញ្ជាក់ឲ្យឃើញថា ដំណើរការប្រឡងនេះវិវត្តន៍ទៅមុខ ទៅរកប្រសិទ្ធិភាព គុណភាព នៃសមត្ថភាពយុវជនរបស់យើង ដែលអាចឈានទៅរកការប្រកួតប្រជែង ក្នុងការបន្ដទៅឧត្តមសិក្សា»</strong>។</span></p>
<p><span style="color: #000000;">សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា បាននិងកំពុងប្រព្រឹត្តិរយៈពេលពីរថ្ងៃ គឺថ្ងៃទី២២-២៣ ខែសីហា ឆ្នាំ២០១៦ ដែលមានថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម ក្នុងនោះបេក្ខជនប្រឡងសរុប ៩៣,៧៥២នាក់ មានមណ្ឌលប្រឡង ១៥៧ ចែកចេញជា ៣,៧៨២ បន្ទប់ នៅរាជធានី-ខេត្តទាំង ២៥៕</span></p>
<p><span style="color: #000000;"><img src="http://image.freshnewsasia.com/2016/020/fn-2016-08-22-12-07-52-3.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/020/fn-2016-08-22-12-07-52-4.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>