<div class="item-page">
<p><span style="color: #000000;"><strong>(កំពង់ធំ)៖</strong> អ្នកបើករថយន្ត Land Cruiser ពណ៌ទឹកប្រាក់ ពាក់ស្លាកលេខ នគរបាល2.6556 បានបុកជាមួយរថយន្ត Vigo បណ្តាលរងការខូចខាតយ៉ាងដំណំ ប៉ុន្តែអ្វីដែលហួសចិត្តនោះ គឺអ្នកបើករថយន្ត Land Cruiser មិនបានចូលខ្លួនមកដោះស្រាយ បែរជាគេចខ្លួនបាត់ ហើយហៅបក្ខពួករបស់ខ្លួនមកដោះស្លាកលេខរថយន្ត យកទៅបាត់ទៀត ក្នុងគោលបំណងមិនឲ្យសមត្ថកិច្ចដឹង និងអ្នកកាសែតថតបានយកទៅចុះផ្សាយ ជាពិសេសនោះ គឺមានបំណងលាក់អត្តសញ្ញាណ របស់ខ្លួនតែម្តង។</span></p>
<p><span style="color: #000000;">ហេតុការណ៌គ្រោះថ្នាក់ចរាចរណ៍ខាងលើនេះ បានកើតឡើងនៅថ្ងៃទី១៦ ខែមេសា ឆ្នាំ២០១៦ ស្ថិតនៅលើចំណុចផ្លូវវាងក្រុងថ្មី ក្នុងភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ។</span></p>
<p><span style="color: #000000;">ភ្នាក់ងារ Fresh News ប្រចាំខេត្តកំពង់ធំ បានឲ្យដឹងថា មុនពេលកើតហេតុគេឃើញរថយន្ត Land Cruiser ពណ៌ទឹកប្រាក់ពាក់ស្លាកលេខនគរបាល2. 6556 បើកបរក្នុងល្បឿងយ៉ាងលឿនឆ្លងថ្នល់វៀងកុងពីកើតទៅលិច លុះមកជិតដល់ចំណុចផ្លូវម្ខាងទៀតហើយនោះ ក៏បានវាក់អើជាមួយនិងម៉ូតូ១គ្រឿងទៀត។ ពេលនោះ អ្នកបើករថយន្ត Land Cruiser ក៏ជាន់ហ្វ្រាំងគាប់ជួនរថយន្តវីហ្គោពណ៌ទឹកប្រាក់ពាក់ស្លាកលេខភ្នំពេញ 2I.7336 បើកបរពីជើងទៅត្បូង ក៏បុកគ្នាយ៉ាងពេញ ទំហឹងបណ្តាលឲ្យរថយន្ត Land Cruiser ក្រឡាប់ជាច្រើនត្រឡប់ធ្លាក់ពីលើផ្លូវជាតិ ផ្ទុះពោងសុវត្ថិភាពទាំងអស់ក្នុងរថយន្ត។</span></p>
<p><span style="color: #000000;">រថយន្តត្រូវខូចខាតយ៉ាងដំណំ តែសំណាងល្អមិនបណ្តាលឲ្យមានមនុស្សស្លាប់នោះទេ ពីព្រោះនៅក្នុងរថយន្តសេរីទំនើបមួយនេះ មានតែអ្នកបើកបរម្នាក់ ហើយបានពោងសុវត្ថិភាពជួយ។</span></p>
<p><span style="color: #000000;">ក្រោយពេលកើតហេតុភាគីខាងរថយន្តវីហ្គោឈ្មោះ ខាំ សំ ភេទប្រុសអាយុ៣៩ រស់នៅភូមិក្បាលស្ពាន សង្កាត់អូរជ្រៅ ក្រុងប៉ោយប៉ែត បានចូលខ្លួនមកដោះស្រាយនៅចំពោះមុខសមត្ថកិច្ច តែចំណែកភាគីខាងរថយន្ត Land Cruiser បានព្យាយាមគេចខ្លួន ពីកន្លែងកើតហេតុ និងខិតខំលាក់បាំងអត្តសញ្ញាណ ហើយបានទូរស័ព្ទឲ្យបងប្អូនដោះស្លាកលេខរថយន្តយកទៅលាក់ទុក ដោយមិនប្រាប់ការពិតថា ម្ចាស់រថយន្តឈ្មោះអ្វី ហើយមានឋានៈធំប៉ុនណានោះទេ គេគ្រាន់តែដឹងថា ម្ចាស់រថយន្ត គឺជាមន្ត្រីនគរបាលម្នាក់។</span></p>
<p><span style="color: #000000;">លោកវរសេនីយ៏ឯក កែវ ហួ ស្នងការរងនគរបាលខេត្តកំពង់ធំ និងជាប្រធានការិយាល័យកណ្តាល សណ្តាប់ធ្នាប់ចរាចរណ៍ផ្លូវគោក បានប្រាប់នៅរសៀលថ្ងៃទី១៧ ខែមេសា ឆ្នាំ២០១៦នេះថា ករណីខាងលើនេះ បើតាមច្បាប់ចរាចរណ៏ផ្លូវគោក ប្រសិនមិនមានគ្រោះថ្នាក់ធំដំុទេនោះ គឺភាគីទាំងសងខាងធ្វើការចចារគ្នាទៅ បើមិនត្រូវគ្នាទេ មានតែចងក្រងសំណុំរឿងបញ្ជូនទៅតុលាការ តែរហូតមកដល់ពេលនេះខាងភាគីរថយន្ត Land Cruiser នៅមិនទាន់ចូលមកសប្រមសម្រួលនៅឡើយទេ។</span></p>
<p><span style="color: #000000;">លោកថា បើតាមច្បាប់គឺមានកំហុសម្ខាងម្នាក់ខាងរថយន្តឡង់គ្រីស័រ បើកឆ្លងថ្នល់មិនមានការប្រុងប្រយ័ត្ន រីឯខាងរថយន្តវីហ្គោវិញបើកលឿនខ្វះការប្រុងប្រយ័ត្ន ហើយផ្លូវវាងក្រុងនេះទើបតែសាងសង់រួច នៅមិនទាន់បានដាក់ស្លាកសញ្ញាចរាចរណ៍នៅឡើយ ទើបបណ្តាលឲ្យកើតមានគ្រោះថ្នាក់ចរាចរណ៍ជាញ៉ឹកញាប់ នៅចំណុចខាងលើនេះ៕</span></p>
<p><span style="color: #000000;"><img src="https://scontent-hkg3-1.xx.fbcdn.net/hphotos-xaf1/v/t1.0-9/13012701_1589177651396600_1270093087368345525_n.jpg?oh=2912ff674505a6dbd4c82cd9249b470f&oe=57774FD4" alt="" width="730" /></span></p>
<p><span style="color: #000000;"><img src="https://scontent-hkg3-1.xx.fbcdn.net/hphotos-xap1/v/t1.0-9/13012765_1589177658063266_7143012885928839242_n.jpg?oh=a35795cd2bce63d89d10bd619913e345&oe=57B6B794" alt="" width="730" /></span></p>
<p><span style="color: #000000;"><img src="https://scontent-hkg3-1.xx.fbcdn.net/hphotos-xpt1/v/t1.0-9/12974424_1589177644729934_1800685425469091350_n.jpg?oh=012aee3543b52b6265aa86c3e92a15b7&oe=57A95A73" alt="" width="730" /></span></p>
<p><span style="color: #000000;"><img src="https://scontent-hkg3-1.xx.fbcdn.net/hphotos-xap1/v/t1.0-9/12987202_1589177761396589_8845906666232093961_n.jpg?oh=3ca5a47d110b2633aaf4c698afaaa948&oe=57A9023F" alt="" width="730" /></span></p>
<p><span style="color: #000000;"><img src="https://scontent-hkg3-1.xx.fbcdn.net/hphotos-xfp1/v/t1.0-9/12987063_1589177771396588_8679701182241170871_n.jpg?oh=8f711b8da3aed4920b8ac5ec585624b6&oe=577819C2" alt="" width="730" /></span></p>
<p><span style="color: #000000;"><img src="https://scontent-hkg3-1.xx.fbcdn.net/hphotos-xtp1/v/t1.0-9/13015681_1589177774729921_1790974734646850797_n.jpg?oh=ab6f512224985e8ea660b4bb69a7c562&oe=57798704" alt="" width="730" /></span></p>
<p><span style="color: #000000;"><img src="https://scontent-hkg3-1.xx.fbcdn.net/hphotos-xpf1/v/t1.0-9/11219065_1589177841396581_4978604042595543281_n.jpg?oh=f157b9b45e30fa7d84d78552a8e67d1d&oe=57B7C918" alt="" width="730" /></span></p>
<p><span style="color: #000000;"><img src="https://scontent-hkg3-1.xx.fbcdn.net/hphotos-xaf1/v/t1.0-9/13055466_1589177844729914_3479825646652639344_n.jpg?oh=47af75bbeba2a3355176a3f11e926fd9&oe=577FEAF8" alt="" width="730" /></span></p>
<p> </p>
<div id="news_detail" class="postcontainer">
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
<div><span style="color: #000000;"><br /></span></div>
</div>
<div></div>
</div>