<div class="article-content">
<p><span style="color: #000000;"><strong>ភ្នំពេញ ៖</strong> មេជាងសំណង់ អគារលក់គ្រឿង ចក្រមួយកន្លែង បានបើកលុយ ពីក្រុមហ៊ុន រួចហើយប្រើល្បិច ទៅដូរលុយរួចហើយគេចខ្លួនបាត់ ធ្វើឲ្យកម្មករសំណង់ ប្រមាណជាង៤០នាក់ គ្មានលុយបើក ហើយ អ្នកម៉ៅការ បន្តចោទថា ក្រុមហ៊ុនបើកលុយ ឲ្យមេជាងមិនប្រាប់លោក ។</span></p>
<p><span style="color: #000000;">ការចោទដាក់គ្នាទៅវិញ ទៅមកនេះ បានកើតឡើង កាលពីវេលាម៉ោង១០និង៤០នាទីថ្ងៃទី៩ ខែកញ្ញា ឆ្នាំ២០១៤ ស្ថិតនៅក្នុង ក្រុមហ៊ុនលក់គ្រឿងខាងលិច ផ្សារជម្ពូវ័ន្តភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ ។</span></p>
<p><span style="color: #000000;">បើយោងតាមលោក ចិន ចូវ អាយុ៤១ឆ្នាំ ជាជនជាតិវៀតណាម បានឲ្យដឹងថា លោកបានម៉ៅ ការបន្តពី លោក ស វ៉ាន់ថុល អាយុ៥០ឆ្នាំ ជាងជាជនជាតិវៀតណាម ដូចគ្នាដែរ ដោយម៉ៅផ្នែកខាងក្រោយ ធ្វើហើយនឹងបានហៅមេជាងឈ្មោះ ភក្តិ ហៅ ឆុន មកធ្វើការឲ្យផងដែរ ប៉ុន្តែក្រោយមក ក្រុមហ៊ុនបានហៅ មេជាងរបស់លោកឲ្យមកធ្វើផ្នែកខាងមុខ លុះដល់ថ្ងៃទី៨ខែកញ្ញា ឆ្នាំ២០១៤ ខាងក្រុមហ៊ុន បានហៅមេជាង ឈ្មោះ ឆុន នេះទៅបើកលុយចំនួន២០០០ដុល្លារ ដោយមិនបានប្រាប់លោកផងដែរ ពេលបើកបានឈ្មោះ ឆុន បានប្រើល្បិចទៅដូរ លុយរួចហើយគេចខ្លួនបាត់ បែរជាក្រុមហ៊ុនឲ្យ លោកចេញសងដោយចោទប្រកាន់ថា ឈ្មោះ ឆុន ជាកូនចៅរបស់លោក ។</span></p>
<p><span style="color: #000000;">លោកបានបន្តថា រឿងនេះលោកមិនអាចទទួលខុសត្រូវបានទេ ដោយសារក្រុមហ៊ុន ហៅមេជាងរបស់គាត់ ទៅធ្វើការមិនបានប្រាប់រូបគាត់នោះទេ ហើយបើកលុយឲ្យក៏មិនបានប្រាប់គាត់ដែរ ដូច្នេះគាត់ពុំបាន ពាក់ព័ន្ធក្នុងរឿងនេះនោះទេ ។</span></p>
<p><span style="color: #000000;">បើយោងតាមតំណាងក្រុមហ៊ុនមួយរូបបាននិយាយថា ការបើកលុយឲ្យឈ្មោះ ឆុន នោះគឺឈ្មោះ ចូវ មិនមែនមិនដឹងនោះទេ ពីព្រោះកាលពីថ្ងៃទី៨ខែកញ្ញានោះ ពេលហៅឈ្មោះ ឆុន ទៅបើកលុយនោះឈ្មោះ ចូវ ក៏បានទៅជាមួយគ្នាផងដែរ ដូច្នេះមិនអាចឆ្លើយថាមិនដឹងបាននោះទេ ។</span></p>
<p><span style="color: #000000;">ចំណែកឯកម្មករវិញបាននិយាយថា កម្មករសំណង់ធ្វើការនៅក្នុងក្រុមហ៊ុននេះមានចំនួនជាង៤០នាក់ ដោយអ្នកខ្លះត្រូវ បើកលុយ៤០ម៉ឺនក្នុង១ខែ ហើយអ្នកខ្លះក៏ ទទួលបានក្រោម៤០ម៉ឺនក្នុង ១ខែទៅការងារ របស់ពួកគេម្នាក់ ។ ហើយឥឡូវនេះមេជាងរបស់លោក ចូវ បើកលុយពីក្រុមហ៊ុន រួចហើយគេច ខ្លួនបាត់ធ្វើឲ្យពួកគេមានការលំបាក ដោយក្រុមហ៊ុនមិនបើកលុយ ឲ្យរង់ចាំការសម្របសម្រួល ជាមួយលោក ចូវ ជាអ្នកម៉ៅការបន្តសិន ពីព្រោះឈ្មោះ ឆុន ជាកូនចៅរបស់លោក ចូវ ៕</span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/September/id-011/Hong-0154.jpg" alt="" width="500" /></span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/September/id-011/Hong-0155.jpg" alt="" width="500" /></span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/September/id-011/Hong-0156.jpg" alt="" width="500" /></span></p>
</div>
<p style="text-align: right;"><a href="http://www.dap-news.com/2011-06-14-02-39-55/94786-2014-09-09-09-24-29.html" target="_blank"><span style="color: #000000;">ផ្តល់សិទ្ធដោយ ៖ ដើមអម្ពិល</span></a></p>