<p><span style="color: #000000;"><strong>(ភ្នំពេញ)៖</strong> សេចក្តីព្រាងអនុក្រឹត្យ ស្តីពីវិធានការហាមការជក់ ឬការបង្ហុយផ្សែងផលិតផល ថ្នាំជក់នៅកន្លែងធ្វើការ ឬកន្លែងសាធារណៈ បានកំណត់ថា សម្រាប់អ្នកជក់បារីនៅកន្លែងហាមឃាត់ នឹងពិន័យពីរម៉ឹនរៀល ខណៈដែលម្ចាស់ភោជនីយដ្ឋាន អាហារដ្ឋាន ដែលមិនព្រមបិទស្លាក់សញ្ញាហាមជក់បារី ហើយដាក់ចានគោះបារីឲ្យភ្ញៀវ នឹងត្រូវពិន័យ ៥ម៉ឺនរៀ។</span></p>
<p><span style="color: #000000;">ក្រសួងសុខាភិបាលបានរៀបចំតាក់តែងសេចក្តីព្រាងច្បាប់អនុក្រឹត្យស្តីពីវិធានការហាមឃាត់ការជក់ ឬការបង្ហុយផ្សែងផលិតផល ថ្នាំជក់នៅកន្លែងធ្វើការ ឬកន្លែងសាធារណៈ ក្នុងគោលបំណងចូលរួមការពារសុខុមាលភាពរបស់ប្រជាពលរដ្ឋ, ការពារនិងទប់ស្កាត់ ការរងផ្សែងផលិតផលថ្នាំជក់ ដែលបង្កឲ្យមានហានិភ័យសុខភាពដល់អ្នកនៅជុំវិញ និងបរិស្ថាន និងកាត់បន្ថយការប្រើប្រាស់ផលិតផលថ្នាំជក់។</span></p>
<p><span style="color: #000000;">សេចក្តីព្រាងអនុក្រឹត្យនេះ បានឆ្លងអង្គប្រជុំអន្តរក្រសួងនាថ្ងៃទី១៨ ខែមករា ឆ្នាំ២០១៦ ហើយត្រូវបានលើកយកមកពិភាក្សា និងអនុម័តរួចរាល់ហើយ នៅទីស្តីការគណៈរដ្ឋមន្រ្តីនាព្រឹកថ្ងៃទី០៤ ខែមីនា ឆ្នាំ២០១៦នេះ ដោយមានការកែសម្រួលពាក្យពេចន៍ និងខ្លឹមសារមួយចំនួន។ នេះបើតាមលោក ផៃ ស៊ីផាន អ្នកនាំពាក្យទីស្តីការគណៈរដ្ឋាមន្រ្តី បញ្ជាក់នៅលើ Facebook របស់លោក។</span></p>
<p><span style="color: #000000;">នៅក្នុងសេចក្តីព្រាងអនុក្រឹត្យនេះបានបញ្ជាក់ថា ការផាកពិន័យខាងលើ បើប្រៀបធៀបជាមួយបណ្តាប្រទេសក្នុងអាស៊ានទំហំ នៃប្រាក់ពិន័យរបស់កម្ពុជា មានលក្ខណៈអនុគ្រោះជាងគេក្នុងគោលបំណងជំរុញ ការចាប់អារម្មណ៍ និងដើម្បីអប់រំដល់ប្រជាជន អំពីគ្រោះថ្នាក់ នៃការជក់បារី។</span></p>
<p><span style="color: #000000;">យោងតាមសេចក្តីព្រាងអនុក្រឹត្យ បានឲ្យដឹងថា ប្រទេសជាច្រើនក្នុងតំប់អាស៊ានផាកពិន័យទឹកប្រាក់យ៉ាងច្រើនសម្រាប់អ្នក ជក់បារី នៅតាមទីហាមឃាត់ ដូចជា ប្រទេសម៉ាឡេស៊ី ពិន័យជាប្រាក់ចំនួន ៣,០៣០ដុល្លារ ប្រទេសឥណ្ឌូនេស៊ី ៥,៥៨៧ដុល្លារ ប្រទេសប្រ៊ុយណេ ៧៩០.៧៤ដុល្លារ ប្រទេសសឹង្ហបុរី ៧៥៦ដុល្លារ ប្រទេសមីយ៉ាន់ម៉ា ១៥៧ដុល្លារ ទៅ ៧៨០ដុល្លារ ប្រទេសហ្វីលីពីន ១១ដុល្លារទៅ ២៥៧ដុល្លារ ប្រទេសថៃ ៦ដុល្លារ ទៅ ៦៥ដុល្លារ និងប្រទេសវៀតណាម ៤ដុល្លារ ទៅ ១៤ដុល្លារ។</span></p>
<p><span style="color: #000000;">លោក ផៃ ស៊ីផាន បានបញ្ជាក់ថា ការរៀបចំសេចក្តីព្រាងអនុក្រឹត្យស្តីពីវិធានការហាមការជក់ ឬការបង្ហុយផ្សែងផលិតផលថ្នាំជក់នៅកន្លែងធ្វើការ ឬកន្លែងសាធារណៈ ក្រសួងសុខាភិបាលបានពិចារណាទៅលើតថភាពជាក់ស្តែង ក្នុងសង្គម និងលទ្ធភាព នៃការអនុវត្តអនុក្រឹត្យនេះប្រកបដោយប្រសិទ្ធភាព និងអនុលោមតាមស្តង់ដាអាស៊ានដោយនឹងកំណត់កន្លែង ហាមជក់ជាជំហានៗ នៅតាមទីតាំងមួយចំនួន តាមរយៈការចេញប្រកាសរបស់ក្រសួងសុខាភិបាល។</span></p>
<p><span style="color: #000000;">យោងតាមរបាយការណ៍របស់ក្រសួងផែនការឆ្នាំ២០១៤ បានបង្ហាញថា អ្នកមិនជក់បារី ៦០% កំពុងស្រូបផ្សែងបារីពីគេ។ ទីកន្លែងដែលប្រជាពលរដ្ឋកម្ពុជាស្រូបផ្សែងបារីពីគេខ្ពស់ជាងគេ គឺនៅភោជនីយដ្ឋាន/អាហារដ្ឋាន ៧៦% ក្នុងអគារធ្វើការរបស់រដ្ឋ ៤៩% និងនៅពេលធ្វើដំណើរការតាមមធ្យោបាយធ្វើដំណើរសាធារណៈ៣៤%។</span></p>
<p><span style="color: #000000;">បើធៀបទៅនឹងប្រទេសអាស៊ានទាំង១០ ប្រទេសកម្ពុជាមានអត្រាស្រូបផ្សែងបារីពីគេ ខ្ពស់ជាងគេនៅភោជនីយដ្ឋាន។ អត្រារងគ្រោះដោយសារស្រូវផ្សែងបារីពីគេខ្ពស់បំផុតក្នុងចំណោមអ្នកមិនជក់បារី៕</span></p>
<p><span style="color: #000000;"><a class="thickbox" title="" href="/FileManager/Commons/2016/3/4/28-04-03-2016--10-57-36.jpg"><img src="/FileManager/Articles/mce/2016/3/4/28-04-03-2016--10-57-36.jpg" alt="" /></a><br /></span></p>
<p> </p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>