<div class="body">
<div class="container">
<div class="row-fluid">
<div class="item-page">
<div>
<p><span style="color: #000000;"><strong>(ភ្នំពេញ)៖</strong> «ខ្ញុំធ្វើខួបថ្ងៃនេះ មិនបានព្រៀងទុកទេបង.. វាហាក់ដូចជាប្រថុចញ៉ុចពេក បងមើលមើល៍សូម្បីតែភ្ញៀវ ក៏អញ្ជើញគ្មានសំបុត្រដែរ តែខ្ញុំហៅតិចតូចប៉ុណ្ណោះ ព្រោះប្រញាប់ពេក ណាមួយដឹងថា មិត្តភក្តិសុទ្ធតែជាប់រវល់ទាំងអស់..!»។ ខាងលើនេះ គឺការថ្លែងរបស់តារាចម្រៀង ល្បីឈ្មោះក្នុងមជ្ឈដ្ឋានសិល្បៈ កញ្ញា រតនៈ ពិសី ថ្លែងប្រាប់គេហទំព័រ Khmertalking ក្នុងពិធីខួបកំណើតរបស់នាង នាយប់ថ្ងៃទី២២ ខែមីនា ឆ្នាំ២០១៦នេះ នៅឯភោជនីយដ្ឋាន Urban ។</span></p>
<p><span style="color: #000000;">ជាការពិត បើផ្អែកតាមអ្វី ដែលបានឃើញជាក់ស្ដែង និងតាមរយៈការរៀបរាប់ប្រាប់ដោយខ្លីៗ ពីសំណាក់ម្ចាស់ខួបកំណើត កញ្ញា រតនៈ ពិសី គឺនៅយប់មិញនេះ នាងបានធ្វើខួបកំណើតជាលក្ខណៈគ្រួសារ ដោយបានអញ្ជើញអ្នកចូលរួម ប្រមាណជា៦០ ទៅ៧០នាក់ប៉ុណ្ណោះ ហើយភាគច្រើនជាមនុស្សជិតស្និទ្ធ និងសាច់ញាតិរបស់នាង។</span></p>
<p><span style="color: #000000;">តារាចម្រៀង រតនៈ ពិសី បានបញ្ជាក់ទៀតថា ឆ្នាំនេះនាងធ្វើខួប២៣ឈានចូល២៤ ឆ្នាំ តែមានលក្ខណៈទ្រង់ទ្រាយតូច ជាងឆ្នាំមុន ព្រោះជាខួបមិនបានព្រៀងទុក។ ពេលសួរថា ពេលធ្វើខួបប្រញាប់ប្រញាលបែបនេះ មានអ្នកពិសេសជួយឧប្ថម្ភ ជាកាដូជូនមែនទេ ? រតនៈ ពិសី ញញឹមរួចឆ្លើយថា « ចា៎បង...មាន..!» ។ ជាមួយគ្នានេះ រតនៈ ពិសី ក៏បានសម្ដែងអារម្មណ៍រំភើបរីករាយ និងថ្លៃងអំណរគុណទៀតថា« អរគុណខ្លាំងណាស់ បងស្រីសំឡាញ់ចិត្ដ ហើយក៏សូមអរគុណ ជាពិសេសដល់បងៗប្អូនៗ រួមទាំងមិត្ដភក្តិទាំងអស់ ដែលបានចំណាយពេលចូលរួម និង ផ្ដល់កិត្ដិយសឲ្យខ្ញុំ ចង់និយាយថា ថ្ងៃនេះខ្ញុំសប្បាយខ្លាំងណាស់ អរគុណ អ្នកម៉ាក់ខ្ញុំ នឹងលោកពូអ្នកមីងផងដែរ បានចូលរួម ..»។</span></p>
<p><span style="color: #000000;">តារាចម្រៀងក្មេងខ្ចី រាងតូចច្រឡឹង កញ្ញា រតនៈ ពិសី ត្រូវបានគេដឹងថា នាងកំពុងតែមានទំនាក់ទំនង និងស្វែងយល់ចិត្តគ្នា ជាមួយបុរសម្នាក់ ដែលមានជំនាញ ជាទន្តបណ្ឌិត(ពេទ្យធ្មេញ) និងជាមន្ត្រីយោធា ពាក់ស័ក្តិ៤កន្លះ បម្រើការងារនៅក្នុង ក្រសួងការពារជាតិ ហើយពិធីខួបកំណើតនេះ ត្រូវបាននាងបង្ហើបថា ពិតជាមានអ្នកជួយឧបត្ថម្ភមែន។ </span></p>
<p><span style="color: #000000;"><br /><a class="thickbox" title="" href="/FileManager/Commons/2016/3/24/08hj-24-03-2016--16-29-34.jpg"><img src="/FileManager/Articles/mce/2016/3/24/08hj-24-03-2016--16-29-34.jpg" alt="" /></a><br /></span></p>
<p><span style="color: #000000;">ប្រភពព័ត៌មាន ត្រូវបានទម្លាយចេញ គួរឲ្យទុកចិត្តមួយថា ការស្វែងយល់ចិត្តគ្នា រវាងស្រីស្រស់សម្រស់ឆើតឆាយ កញ្ញា រតនៈ ពិសី និងដុកទ័រ ពេទ្យធ្មេញម្នាក់នោះ បានកើតឡើងរយៈពេល ជាង១ឆ្នាំមកហើយ ដោយបុរសនោះ តែងតែព្យាយាម យកចិត្តយកថ្លើម និងជួយជ្រោមជ្រែង រាល់ការងារទាំងឡាយណា ដែលនាងកំពុងធ្វើសព្វថ្ងៃ ដើម្បីឲ្យមានដំណើរការ ទៅដោយរលូន ជាមួយនឹងការវិវឌ្ឍន៍ថ្មីៗ៕</span></p>
<div class="fb-post fb_iframe_widget" data-href="https://www.facebook.com/permalink.php?story_fbid=408946475964121&id=100005463168282" data-width="500"></div>
</div>
</div>
<div id="aside" class="span3"></div>
</div>
</div>
</div>
<div class="container">
<div class="custom">
<div id="news_detail" class="postcontainer">
<p><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>
<div><span><br /></span></div>
</div>
</div>
</div>