<p><span style="color: #000000;"><strong>(ប៉េកំាង)៖</strong> ប្រធានាធិបតីហ្វីលីពីន លោក រ៉ូឌ្រីហ្គោ ឌូធើតេ (Rodrigo Duterte) បាននិយាយ ពាក្យលាគ្នាហើយជាមួយសហរដ្ឋអាមេរិក នៅក្នុងអំឡុងពេលបំពេញដំណើរទស្សនកិច្ចនៅទីក្រុងប៉េកំាង ប្រទេសចិន ដែលនេះគឺជារបត់ថ្មីមួយនៃសម្ព័ន្ធភាពរវាងទីក្រុងម៉ានីល និង វ៉ាស៊ីនតោន ខណៈរដ្ឋាភិបាលរបស់លោក ឌូធើតេ កំពុងបង្ហាញពីទំនោរងាកខ្លាំងទៅរកមហាអំណាចចិន និងរុស្ស៊ី។ នេះបើតាមការចុះផ្សាយរបស់ សារព័ត៌មាន Channel News Asia នៅព្រឹកថ្ងៃព្រហស្បតិ៍ ទី២០ ខែតុលា ឆ្នាំ២០១៦។</span></p>
<p><span style="color: #000000;"><a class="thickbox" title="" href="/FileManager/Commons/2016/10/20/17d-20-10-2016--10-20-44.jpg"><img src="/FileManager/Articles/mce/2016/10/20/17d-20-10-2016--10-20-44.jpg" alt="" /></a><br /></span></p>
<p><span style="color: #000000;">ថ្លែងទៅកាន់សហគមន៍ហ្វីលីពីនពីទីក្រុងប៉េកំាង លោក ឌូធើតេ បានអះអាងថា ហ្វីលីពីន បានទទួលផលចំណេញតិចតួចប៉ុណ្ណោះ ពីទំនាក់ទំនងដ៏យូអង្វែងជាមួយសហរដ្ឋអាមេរិក ដោយលោកបញ្ជាក់ថា «អ្នក (សហរដ្ឋអាមេរិក) បានស្ថិតនៅក្នុងប្រទេសរបស់យើងដើម្បីតែ ផលប្រយោជន៍ផ្ទាល់ខ្លួនរបស់អ្នក ដូច្នេះវាដល់ពេលនិយាយលាគ្នាហើយមិត្តសំឡាញ់!។</span></p>
<p><span style="color: #000000;">«ខ្ញុំនឹងមិនទៅសហរដ្ឋអាមេរិកទៀតនោះទេ ព្រោះថាខ្ញុំអាចនឹងត្រូវគេជេរនៅទីនោះ»។ នេះជាការលើកឡើងរបស់លោក ឌូធើតេ មុននឹងលោកនៅតែប្រើពាក្យថា « son of whore» សារជាថ្មីជូនចំពោះប្រធានាធិបតីសហរដ្ឋអាមេរិក លោក បារ៉ាក់ អូបាម៉ា។</span></p>
<p><span style="color: #000000;"><a class="thickbox" title="" href="/FileManager/Commons/2016/10/20/17c-20-10-2016--10-20-56.jpg"><img src="/FileManager/Articles/mce/2016/10/20/17c-20-10-2016--10-20-56.jpg" alt="" /></a><br /></span></p>
<p><span style="color: #000000;">គួរបញ្ជាក់ថា បន្ទាប់ពីបានចូលកាន់ដំណែងជាប្រធានាធិបតីហ្វីលីពីន លោក ឌូធើតេ ធ្លាប់បាននិយាយថា លោកនឹងផ្លាស់ប្ដូរគោលនយោបាយ ហ្វីលីពីន ដែលធ្វើតាមរបៀបវារៈ លោកខាងលិច ដោយលោកថែមទំាងបានគូសបញ្ជាក់ដែរថា «ការរក្សាគម្លាតពី ចិន កន្លងមក មិនមែនជាការសម្រេចចិត្តផ្ទាល់របស់លោកឡើយ ហើយលោកនឹងបង្កើតសម្ព័ន្ធថ្មីមួយ»។</span></p>
<p><span style="color: #000000;">សូមជំរាបថា លោក ឌូធើតេ បានទៅដល់ទីក្រុងប៉េកាំងប្រទេសចិន តាំងពីថ្ងៃអង្គារ មកម្ល៉េះហើយសម្រាប់ថ្ងៃព្រហស្បតិ៍នេះ លោកនឹងជួបពិភាក្សា ជាមួយប្រធានាធិបតីចិន លោក ស៊ី ជិនពីង ជាលើកដំបូងបំផុត ដើម្បីលើកយកប្រធានបទក្តៅៗដែលរារាំងទំនាក់ទំនងល្អរវាងប្រទេសទាំងពីរ មកពិភាក្សា និង ដោះស្រាយ ហើយលោក ឌូធើតេ នឹងត្រឡប់ទៅប្រទេសកំណើតវិញ នៅថ្ងៃសុក្រស្អែកនេះ៕</span></p>
<p><span style="color: #000000;"><a class="thickbox" title="" href="/FileManager/Commons/2016/10/20/16e-20-10-2016--10-21-10.jpg"><img src="/FileManager/Articles/mce/2016/10/20/16e-20-10-2016--10-21-10.jpg" alt="" /></a><br /><br /></span></p>
<p style="text-align: right;"><span style="color: #000000;">ប្រភព ៖ CNA</span></p>