<p><span style="color: #000000;"><strong>(ពោធិ៍សាត់)៖</strong> ព្រះសង្ឃ១អង្គ គង់នៅវត្តសូរិយា បានសង្ស័យអង្ករដែលញ្ញាតញោមយកទៅប្រគេនថា ជាអង្ករផ្លាស្ទីក ក៏បានបង្ហោះក្នុងបណ្តាលសង្គម Facebook បង្កឲ្យមានការភ្ញាក់ផ្អើលដល់ប្រជាពលរដ្ឋ មន្ត្រីជំនាញ និងអាជ្ញាធរខេត្តពោធិ៍សាត់។</span></p>
<p><span style="color: #000000;">ក្រោយធ្វើការពិនិត្យ និងពិសោធន៍រួចមកឃើញថា អង្ករនោះមិនមែនជាអង្ករក្លែងក្លាយ ឬជាអង្ករផ្លាស្ទីកនោះទេ ហើយបានព្រមាន និងធ្វើកិច្ចសន្យាបញ្ឈប់។ ហេតុការណ៍ខាងលើនេះ បានកើតឡើងនៅល្ងាចថ្ងៃទី២៤ ខែវិច្ឆិកា ឆ្នាំ២០១៦ នៅក្នុងវត្តសូរិយា ស្ថិតក្នុងភូមិសូរិយាលើ សង្កាត់រលាប ក្រុងពោធិ៍សាត់ ខេត្តពោធិ៍សាត់។</span></p>
<p><span style="color: #000000;">ប្រភពពីមន្ត្រីកាំកុងត្រូលម្នាក់ សុំមិនបញ្ចេញឈ្មោះ បានប្រាប់ភា្នក់ងារ Fresh News ឲ្យដឹងថា ព្រះសង្ឃ១អង្គ ដែលបង្ហោះអង្ករផ្លាស្ទីកក្នុងបណ្តាញសង្គម Facebook នោះ មានព្រះនាម ភិក្ខុធម្មធរគណ ជៀង ស៊ីថុល ព្រះជន្ម៣៦វស្សា។</span></p>
<p><span style="color: #000000;">ប្រភពបានបន្តថា ក្រោយពីបានដឹងអំពីបញ្ហានោះភ្លាម លោកបានដឹកនាំមន្ត្រីជំនាញ ចុះពិនិត្យ និងពិសោធន៍ដោយផ្ទាល់ ជាមួយព្រះសង្ឃគ្រប់អង្គ ក្នុងនោះមានការចូលរួមពីលោកស្រី ជុក សុផានី អភិបាលរងខេត្តផងដែរ ឃើញថាមិនមែនជាអង្ករក្លែងក្លាយនោះទេ។</span></p>
<p><span style="color: #000000;">មន្រ្តីកាំកុងត្រូល និងអាជ្ញាធរខេត្តដែលបានចូលរួមត្រួតពិនិត្យអង្ករនោះ បានធ្វើការព្រមានដល់ព្រះសង្ឃអង្គនោះ បើគ្មានការពិសោធន៍ណាមួយ ដូចជាដុត ឬលីងអង្ករ ដោយគ្មានការចួលរួមពីមន្ត្រីជំនាញ ក្នុងការពិសោធន៍នោះទេ សូមកុំបង្ហោះជាវីដេអូរូបភាព ឬសកម្មភាពទាក់ទងនឹងអង្ករផ្លាស្ទីក នៅក្នុងបណ្តាញសង្គម Facebook ព្រោះវាធ្វើឲ្យប៉ះពាល់ដល់កេរ្តិ៍ឈ្មោះ និងទីផ្សារអង្ករកម្ពុជា ទាំងលើទីផ្សារជាតិ និងអន្តរជាតិ។</span></p>
<p><span style="color: #000000;">ក្រោយធ្វើការព្រមានរួចមក ភិក្ខុធម្មធរគណ ជៀង ស៊ីថុល បានធ្វើកិច្ចសន្យាបញ្ឈប់សកម្មភាពនេះ ចាប់ពីថ្ងៃនេះតទៅ៕</span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-25-17-33-42-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-25-17-33-46-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-25-17-33-47-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-25-17-33-47-2.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>