<div>
<p><span style="color: #000000;"><strong>(ប៉ារីស)៖</strong> កីឡាករខ្សែប្រយុទ្ធដ៏មុតស្រួច Zlatan Ibrahimovic របស់ក្លឹប Paris Saint Germain កំពុងស្ថិតយ៉ាងប្រកៀកក្នុងការចាកចេញពីទឹកដីប្រទេសបារាំង ទៅកាន់អង់គ្លេសវិញក្នុងក្លឹប Manchester United ក្រោយពេលកិច្ច សន្យាកីឡាករស៊ុយអែតខាងលើ នឹងផុតកំណត់នៅខែមិថុនាបំណាច់រដូវកាលនេះ ។</span></p>
<p><span style="color: #000000;">សារព័ត៌មាន BBC បានផ្សាយថា កីឡាករប្រធានក្រុមជម្រើសជាតិស៊ុយអែត វ័យ៣៤ឆ្នាំខាងលើនេះ កំពុងតែមានទំនាក់ទំនងយ៉ាងជិតស្និទ្ធជាមួយនឹង Man Utd ក្រៅពីនេះ ក៏មានក្លឹបលេងនៅក្របខណ្ឌ Major League Soccer របស់អាមេរិកផងដែរ តែអាចនឹងមកបិសាចក្រហមច្រើនជាង ។</span></p>
<p><span style="color: #000000;">អតីតកីឡាករក្លឹប AC Milan របស់អ៊ីតាលីបានឲ្យដឹងថា “នៅពេលនេះ ខ្ញុំសូមប្រកាសថា ខ្ញុំនឹងមិនបន្តលេងនៅក្នុងក្លឹប PSG នារដូវកាលក្រោយទៀតទេ ដោយកិច្ចសន្យាចាស់នៅទីនេះនៅសល់តែ១ខែកន្លះទៀតប៉ុណ្ណោះ ។ ប្រសិនបើគេ ធ្វើរូបសំណាកខ្ញុំ ជំនួស Eiffel Tower ខ្ញុំនឹងនៅទីនេះបន្តទៀត តែមិនអាចទេ” ។</span></p>
<p><span style="color: #000000;">ទន្ទឹមនឹងនោះដែរ ប្រធានក្លឹបជើងឯកបារាំងលោក Nasser Al-Khelaifi បានបញ្ជាក់ដែរថា “យើងចង់បាន Zlatan បន្តលេងនៅទីនេះទៀត គាត់ជាកីឡាករដ៏អស្ចារ្យ ហើយយើងក៏មានគម្រោងពិភាក្សាជាមួយគាត់ដែរ ថាគាត់ចង់បានអ្វីពិត ប្រាកដ ដើ់ម្បីជំរុញឲ្យគាត់ព្រមនៅលេងនេះទៀត” ។</span></p>
<p><span style="color: #000000;">Zlatan ដែលស៊ុតបញ្ចូលទីបាន៤គ្រាប់ និងរកបានគ្រាប់ហ៊ែកទ្រីក កាលពីសប្តាហ៍មុនបានរកគ្រាប់បាល់ស៊ុតបញ្ចូលទីសរុបបាន២៧គ្រាប់ ពីការចូលលេងបាន២៤ប្រកួតនារដូវកាលនេះ ជាមួយនឹងជួយក្រុមការពារតំណែងជើងឯក PSG រកបាន១០២ពិន្ទុនាំមុខដាច់កំពូលតារាងតែម្តង ក្រៅពីបានជួយ Paris ឡើងទៅវគ្គ៨ក្រុមចុងក្រោយនៃ Champions League ក្រោយទម្លាក់ Chelsea ៤-២ ទាំងពីរជើងរួចមក ៕</span></p>
<p style="text-align: center;"><span style="color: #000000;"><img src="http://i.dailymail.co.uk/i/pix/2016/03/13/23/3228076F00000578-0-image-a-84_1457910813961.jpg" alt="" width="730" /></span></p>
<p style="text-align: center;"> </p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>