<p><span style="color: #000000;"><strong>(អាមេរិក)៖</strong> លោក Harris Wofford វ័យ ៩០ឆ្នាំ ដែលជាអតីតសមាជិកព្រឹទ្ធសភា អាមេរិកមួយរូប មកពីរដ្ឋ Pennsylvania អំឡុងឆ្នាំ ១៩៩១ ដល់ ១៩៩៥នោះ បានប្រកាសថា លោកនឹងរៀបការ ជាមួយមនុស្សម្នាក់ (បុរស) ដែលមានភេទផ្ទុយនឹងភរិយា របស់លោកកាលពីមុន។ នេះបើតាមការ ចេញផ្សាយមុននេះបន្តិច ដោយសារព័ត៌មាន BBC នៅរសៀលថ្ងៃចន្ទ ទី២៥ ខែមេសា ឆ្នាំ២០១៦។</span></p>
<p><span style="color: #000000;">អតីតសមាជិកព្រឹទ្ធសភាខាងលើនេះ បានបន្តទៀតថា លោកមានអារម្មណ៍ថា ខ្លួនឯងមានសំណាង នៅពេលដែលខ្លួនអាចរៀបអាពាហ៍ពិពាហ៍ ក្នុងលក្ខណៈបែបនេះ។ លោក Wofford បញ្ជាក់ដូច្នេះថា «វាជារឿងមួយ ដែលបង្កប់ដោយស្នេហា ដ៏អស្ចារ្យចំនួនពីរ»។ អតីតប្រពន្ធរបស់លោក គឺលោកស្រី Clare បានទទួលមរណភាព កាលពីឆ្នាំ ១៩៩៦ ហើយបច្ចុប្បន្នលោកតាវ័យ ៩០ឆ្នាំទៅហើយ និងកំពុងតែសាងស្នេហាផ្អែមល្ហែម ជាមួយនឹងលោក Matthew Charlton វ័យ ៤០ឆ្នាំ។</span></p>
<p><span style="color: #000000;">លោក Wofford ហាក់មិនបានបញ្ជាក់ថា ស្នេហារបស់លោកនេះ វាខុសប្លែក ឬត្រូវបានចាត់ជាជំពូក មនុស្សក្នុងក្រុមណាមួយនោះទេ ព្រោះកាលពីមុន លោកបានទទួលសុភមង្គលពីស្ត្រី ដ៏អស្ចារ្យមួយរូបទៅហើយ ហើយនៅពេលនេះ លោកក៏បានរកឃើញ សុភមង្គលជាលើកទីពីរដែរ។</span></p>
<p><span style="color: #000000;">គួរបញ្ជាក់ថា កាលពី ខែមិថុនា ឆ្នាំ២០១៥ តុលាការកំពូលអាមេរិក បានសម្រេច អនុញ្ញាតឲ្យគ្រប់រដ្ឋទាំងអស់ របស់សហរដ្ឋអាមេរិក ធ្វើការអនុញ្ញាតច្បាប់រៀបការភេទដូចគ្នា ដោយមិនមានការហាមឃាត់ ទៀតឡើយ៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/4/25/17b-25-04-2016--16-51-52.jpg"><img src="/FileManager/Articles/mce/2016/4/25/17b-25-04-2016--16-51-52.jpg" alt="" /></a><br /></span></p>
<p><span style="color: #000000;"><br /><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>