<div class="item-page">
<p><span style="color: #000000;"><strong>(ភ្នំពេញ)៖</strong> សហជីពធំៗពីរ តំណាងឲ្យកម្មករ៦១ម៉ឺននាក់ បានចេញមុខមកថ្កោលទោស និងអំពាវនាវឲ្យចាត់វិធានការណ៍ តាមច្បាប់លើជនខិលខូចណា ដែលបាននិងកំពុងចង់ អូសទាញកម្មករឲ្យបម្រើការងារ នយោបាយដែលផ្ទុយទៅនឹងច្បាប់រដ្ឋ។ នេះបើយោងតាមសេចក្តីថ្លែងការណ៍ ពីរដាច់ដោយឡែកពីគ្នា របស់សហជីពដែលបានផ្សព្វផ្សាយឲ្យដឹងព្រមគ្នា នៅថ្ងៃទី២៧ ខែឧសភា ឆ្នាំ២០១៦។</span></p>
<p><span style="color: #000000;">សេចក្តីថ្លែងការណ៍ របស់សហព័ន្ធសហជីពឯករាជ្យកម្ពុជា តំណាងឲ្យកម្មករសរុប២ម៉ឺននាក់ មកពីវិស័យកាត់ដេរសម្លៀកបំពាក់ និងស្បែកជើង ចំការកៅស៊ូ និងដឹកជញ្ចូន បានប្រកាសថ្កោលទោស យ៉ាងដាច់អហង្កាចំពោះ សហជីព សមាគម ជនអគតិមួយចំនួន ដែលអូសទាញកម្មករ និយោជិតឲ្យពាក់ព័ន្ធ បម្រើការងារនយោបាយ ដើម្បីផលប្រយោជន៍របស់ខ្លួន ឲ្យប្រព្រឹត្តអំពើផ្ទុយនឹងច្បាប់រដ្ឋ សូមឲ្យអាជ្ញាធរមាន សមត្ថកិច្ច មេត្តាផ្តន្ទាទោសយ៉ាងធ្ងន់ធ្ងរបំផុតទៅតាមផ្លូវច្បាប់។</span></p>
<p><span style="color: #000000;">ចំណែកសេចក្តីថ្លែងការណ៍ របស់ក្រុមប្រឹក្សាសហជីពជាតិកម្ពុជា ដែលមានសហភាពសហជីពចំនួន០៧ សហព័ន្ធសហជីពចំនួន៧៣ ជាសមាជិកក្រុមប្រឹក្សាភិបាល និងតំណាងឲ្យកម្មករ សរុប៥៩ម៉ឺននាក់ ក៏បានប្រកាសថ្កោលទោស ជាដាច់ខាតចំពោះជនណា ក្រុមណា សមាគមណា អង្គការណា សហជីពណា ដែលដឹកនាំកម្មករ និយោជិត ឲ្យប្រព្រឹត្តិអំពើផ្ទុយនឹងច្បាប់រដ្ឋ សូមឲ្យអាជ្ញាធរ មានសមត្ថកិច្ចផ្តន្ទាទោសយ៉ាងធ្ងន់ធ្ងរបំផុត ទៅតាមច្បាប់ជាធរមាន។</span></p>
<p><span style="color: #000000;">ក្រៅពីនោះ សហជីពទាំងពីរ ក៏បានអំពាវនាវដូចគ្នា ឲ្យកម្មករនិយោជិត នៅតាមរោងចក្រ សហគ្រាស រក្សាភាពស្ងប់ស្ងាត់ និងបំពេញ ការងារខ្លួនជាធម្មតា កុំឲ្យជឿតាមការឃោសនា របស់អ្នកនយោបាយមួយចំនួន ដែលអូសទាញឲ្យប្រព្រឹត្តអ្វីមួយ ដែលខុសច្បាប់។</span></p>
<p><span style="color: #000000;">ការចេញមកថ្កោលទោស និងប្រឆាំងរបស់សហជីពទាំង២នេះ បានធ្វើឡើងក្រោយពីលោក ជា មុនី ប្រធានសហជីពសេរីកម្មករកម្ពុជា បានប្រកាសឲ្យកម្មករទាំងអស់ចូលរួមធ្វើបាតុកម្ម បើសិនមានការចាប់ខ្លួនលោក កឹម សុខា ប្រធានស្តីទីគណបក្សសង្គ្រោះជាតិ។</span></p>
<p><span style="color: #000000;">កាលពីម្សិលមិញ ក្រោយការប្រកាសរបស់លោក ជា មុនី រដ្ឋមន្រ្តីក្រសួងការងារ និង បណ្តុះបណ្តាលវិជ្ជាជីវៈ លោក អ៉ិត សំហេង បានផ្តល់បទសម្ភាស៍ជាមួយអង្គភាព Fresh News ដោយអំពាវនាវដល់កម្មករ កម្មការិនី ទាំងអស់រក្សាភាពស្ងប់ស្ងាត់ និងធ្វើការងារជាប្រក្រតីភាពចៀសវាង ការបង្កចលាចលនានា តាមការអំពាវនាវរបស់លោ ក ជា មុនី ប្រធានសហជីពសេរីកម្មករកម្ពុជា ។</span></p>
<p><span style="color: #000000;">លោក អ៉ិត សំហេង បានហៅការអំពាវនាវរបស់លោក ជា មុនី ជាការធ្វើផ្ទុយពីច្បាប់ស្តីពីសហជីព ដែលទើបចូលជាធរមាន អាចប្រឈមនឹងទណ្ឌកម្ម រហូតឈានដល់ការរំលាយចោល។</span></p>
<p><span style="color: #000000;">លោក អ៉ិត សំហេង បានថ្លែងប្រាប់អង្គភាពព័ត៌មាន Fresh News ថា ការអំពាវនាវរបស់លោក ជា មុនី កំពុងធ្វើផ្ទុយពីច្បាប់ស្តីពីសហជីព ដែលមិនអនុញ្ញាតឲ្យពាក់ព័ន្ធ ជាមួយគណបក្សនយោបាយ ឬធ្វើយុទ្ធនាការណាមួយ បង្ហាញការគាំទ្រដល់ គណបក្សនយោបាយនោះឡើយ។ លោកបានបញ្ជាក់អ្វី ដែលលោក ជា មុនី កំពុងធ្វើអាចប្រឈមការអនុវត្ត តាមច្បាប់ស្តីពីសហជីព ដែលមានដូចការពិន័យ ដាក់ទណ្ឌកម្ម និងឈានដល់ការរំលាយចោល។</span></p>
<p><span style="color: #000000;">លោក អ៉ិត សំហេង បានថ្លែងដូច្នេះ «អ្វីដែលគាត់ធ្វើហ្នឹងវាមិនត្រឹមត្រូវ គឺវាផ្ទុយនិងច្បាប់ស្តីពីសហជីព ដែលទើបនឹងចូលជាធរមាននាពេលថ្មីៗនេះ។ ទង្វើរបស់គាត់អាចប្រឈមនិងការពិន័យ ដាក់ទណ្ឌកម្ម និងអាចឈានទៅដល់ការរំលាយចោល»។</span></p>
<p><span style="color: #000000;">លោករដ្ឋមន្រ្តី ក៏បានអំពាវនាវទៅដល់កម្មករ កម្មការិនី រក្សាភាពស្ងប់ស្ងាត់បម្រើការងារជាប្រក្រតី កុំធ្វើតាមការញុះញង់ ដែលនាំឲ្យប៉ះពាល់ ដល់ជីវភាពរបស់ខ្លួន។ លោករដ្ឋមន្រ្តី អ៉ិត សំហេង បានបញ្ជាក់ថា រឿងលោក កឹម សុខា គឺជាការអនុវត្តទៅច្បាប់ក្នុងសំណុំរឿងសញ្ចាកម្ម វាមិនមានអ្វីពាក់ព័ន្ធជាមួយក្រុមកម្មករនោះឡើយ៕</span></p>
<p><span style="color: #000000;"><img src="https://scontent-sit4-1.xx.fbcdn.net/v/t1.0-9/13310563_1607918456189186_176086661523115625_n.jpg?oh=18ecdfff24d08f00af7f181082bcf922&oe=57E82020" alt="" width="730" /></span></p>
<p><span style="color: #000000;"><img src="https://scontent-sit4-1.xx.fbcdn.net/v/t1.0-9/13239065_1607918192855879_8379509145103720082_n.jpg?oh=6ed877c3d1274db6d6bf5935ae48004e&oe=57C61CA2" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>
<div></div>
</div>