<div class="article-content">
<p><strong>ភ្នំពេញ:</strong> ក្រសួងសេដ្ឋកិច្ច និងហិរញ្ញវត្ថុ បានធ្វើសេចក្តីប្រកាសមួយ ស្នើឲ្យ បណ្តាម្ចាស់បុរីអត់ ច្បាប់ មកសុំ អជ្ញាបណ្ណពីក្រសួង ហើយប្រាប់ កុំឲ្យប្រជាពលរដ្ឋទិញបុរីចំនួន ១៩ ដែលអត់ច្បាប់ ដែលមានទីតាំងស្ថិត នៅរាជធានីភ្នំពេញ។</p>
<p>សេចក្តីជូនដំណឹងចុះថ្ងៃទី២៧ ខែវិច្ឆិកា ឆ្នាំ២០១៣ របស់ក្រសួងសេដ្ឋកិច្ច និងហិរញ្ញវត្ថុបានឲ្យ ដឹងថា បុរីអត់ច្បាប់នោះរួមមាន ៖ ១-បុរី សូនី, ២-បុរី វារីណា,៣-បុរី រុង រឿង, ៤-បុរី គៀង ហ៊ត, ៥-បុរី សម្បួរមាស, ៦-ផ្លាទីនីម រេស៊ីដិន, ៧-បុរី អាកាសចរណ៍, ៨-ក្រុមហ៊ុន ប៊ូយ៉ុងហ្គ្រុប, ៩-បុរី EU ( កំពង់ចម្លង អរិយក្សត្រ ), ១០-ក្រុមហ៊ុន មានជ័យហ្វូដ ៩៩៩ ( គម្រោងបុរី តូក្យូ, គម្រោង មូស្គូស៊ីធី និងផ្លូវ ៣៧១ ), ១១-សំណង់ផ្ទះល្វែងទំនើប ចោមចៅ, ១២-អាផាតមិន Sonatra Grand Realty, ១៣-សំណង់ផ្ទះល្វែង លោក អ៊ីវ ឈាន ,១៤-អគារស្នាក់នៅរួម D.Y.G Co., Ltd (Noblesse), ១៥-សំណង់ផ្ទះល្វែងលោក អ៊ីវ ម៉េង និងលោក ជា លី, ១៦-សំណង់ផ្ទះល្វែង និង Link House លោក គីម យ៉ុងហាក់, ១៧-សំណង់អគារស្នាក់នៅរួម លោក ទិព្ធ ណារេន និង លោកស្រី អ៊ាក ច័ន្ទថាវី, ១៨-សំណង់អគារស្នាក់នៅរួម លោក យ៉ង់ គ្រីស្យង់ និងលោក យ៉ង់ លឹមហួត និង ១៩-សំណង់ផ្ទះល្វែង តុល លន។</p>
<p>សេចក្តីប្រកាសដដែលបន្តថា «សាធារណៈជនទាំងអស់ថា មិនគួរគប្បីទិញលំនៅដ្ឋានទាំង ឡាយណា ដែលពុំទាន់មានអាជ្ញាប័ណ្ណ អាជីវកម្មអភិវឌ្ឍលំនៅដ្ឋាន ពីក្រសួងសេដ្ឋកិច្ច និង ហិរញ្ញវត្ថុនោះឡើយ ព្រោះការទិញ លំនៅដ្ឋានពីម្ចាស់សំណង់ ឬបុរី ដែលគ្មានការអនុញ្ញាត ស្របច្បាប់អាច នឹងខាតបង់ថវិកា ឬទ្រព្យសម្បត្តិ ជាយថាហេតុ»។</p>
<p>សេចក្តីជូនដំណឹងឲ្យដឹងទៀតថា ម្ចាស់បុរីទាំងអស់ ត្រូវរួសរាន់មកដាក់ពាក្យស្នើសុំ អាជ្ញាប័ណ្ណ អាជីវកម្មអភិវឌ្ឍ លំនៅដ្ឋាន នៅអគ្គនាយកដ្ឋាន ឧស្សាហកម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ ឲ្យបានមុនថ្ងៃទី២០ ខែធ្នូ ឆ្នាំ២០១៣។ ក្នុងករណីយឺតយ៉ាវ ឬព្រងើយកន្តើយ មិនព្រមមកដាក់ ពាក្យសុំអាជ្ញាប័ណ្ណ អាជីវកម្មអភិវឌ្ឍលំនៅឋាន ក្រសួងសេដ្ឋកិច្ច និងហិរញ្ញវត្ថុ នឹងចាត់វិធានការ តាមផ្លូវច្បាប់ជាធរមាន។</p>
<p>យ៉ាងណាក៏ដោយនេះមិនមែនជាលើកទី១ទេ ដែលក្រសួងចេញសេចក្តីជូនដំណឹង ឲ្យម្ចាស់បុរី មកសុំអជ្ញាប័ណ្ណ និងប្រកាសមិនឲ្យ ប្រជាពលរដ្ឋទិញបុរីទាំងអស់ ហើយថែមទាំងដោយដាក់ កាលបរិច្ឆេទកំណត់ផងដែរ ប៉ុន្តែពួកគេ(ម្ចាស់បុរី) នៅតែមិនព្រមអនុវត្តតាមច្បាស់ ហើយ ក្រសួងសេដ្ឋកិច្ចនៅតែ មិនទាន់មានវិធានការណ៍ ច្បាស់លាស់ ណាមួយនៅឡើយ។ ប្រជាពល រដ្ឋមួយចំនួននិយាយថា ដើម្បីជាផលប្រយោជន៍ ប្រជាជនដែលចង់ទិញបុរី ហើយមិនដឹងព័ត៌ មាន អជ្ញាធរពាក់ព័ន្ធគួរតែ ចាត់វិធានការណ៍ជាបន្ទាន់៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2013/December/id-098/S_0094.jpg" alt="" width="600" /></p>
<p style="text-align: right;">ផ្តល់សិទ្ធិដោយ៖ ដើមអំពិល</p>
</div>