<p><span style="color: #000000;"><strong>(អាមេរិក)៖</strong> តើលោកអ្នកចង់ទទួលទាន អាហារថ្ងៃត្រង់ជាលក្ខណៈឯកជន ជាមួយលោក Tim Cook នាយកប្រតិបត្តិ(CEO) របស់ក្រុមហ៊ុន Apple ដែរ ឬទេ? លោកអ្នកប្រហែលជា ត្រូវចំណាយច្រើនបន្តិចហើយ ពោលគឺត្រូវចំណាយប្រាក់ប្រមាណ ២០ម៉ឺនដុល្លារអាមេរិក ទើបអាចទទួលអាហារថ្ងៃត្រង់ និងញ៉ាំកាហ្វេជាមួយលោក Tim Cook ជាលក្ខណៈឯកជនបាន។</span></p>
<p><span style="color: #000000;">ថ្មីៗនេះ គេហទំព័រ CharityBuzz បានចាប់ផ្ដើមធ្វើការដេញថ្លៃ «ទទួលទានអាហារថ្ងៃត្រង់ ជាលក្ខណៈឯកជន» ជាមួយលោក Tim Cook ដើម្បីប្រមូលប្រាក់ទាំងនោះ បរិច្ចាគទៅឲ្យអង្គការសិទ្ធិមនុស្ស ឬកុមារកំព្រា ដែលគិតត្រឹមថ្ងៃនេះ ទំហំទឹកប្រាក់នៃការចេញថ្លៃ បានកើនឡើងដល់ ១២៥,០០០ដុល្លារអាមេរិក ហើយបើតាមការប៉ាន់ប្រមាណ ទឹកប្រាក់ នៃការដេញថ្លៃអាចនឹងកើនឡើងដល់ ២០ម៉ឺនដុល្លារអាមេរិក។</span></p>
<p><span style="color: #000000;">អ្នកដែលឈ្នះក្នុងការដេញថ្លៃនេះ នឹងត្រូវទទួលបានការញ៉ាំអាហារថ្ងៃត្រង់ និងកាហ្វេ ក្នុងរយៈពេល ៣០នាទី ជាមួយ លោក Tim Cook នៅការិយាល័យកណ្ដាល របស់ក្រុមហ៊ុន Apple ក្នុងរដ្ឋកាលីហ្វ័រញ៉ា សហរដ្ឋអាមេរិក។ នៅក្នុងជំនួបអាហារនោះ អ្នកដែលឈ្នះក្នុងការដេញថ្លៃ អាចសួរនូវសំណួរផ្សេងៗមួយចំនួនបាន ប៉ុន្តែគេមិនបានបញ្ជាក់ថា អាចសួរសំណួរផ្ទាល់ខ្លួន ឬសំណួរពាក់ព័ន្ធ នឹងក្រុមហ៊ុននោះទេ។</span></p>
<p><span style="color: #000000;">គួរបញ្ជាក់ផងដែរថា កាលពីឆ្នាំមុន ទំហំទឹកប្រាក់ដែលបានមកពីការដេញថ្លៃ ទទួលទានអាហារថ្ងៃត្រង់ ជាមួយលោក Tim Cook មានរហូតដល់ ៣៣ម៉ឺនដុល្លារអាមេរិក៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/4/26/09a-26-04-2016--16-14-23.jpg"><img src="/FileManager/Articles/mce/2016/4/26/09a-26-04-2016--16-14-23.jpg" alt="" /></a><br /></span></p>
<p><span style="color: #000000;"><br /><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>