<p><span style="color: #000000;"><strong> ភ្នំពេញ ៖</strong> សាលាដំបូងរាជធានីភ្នំពេញ កាលពីថ្ងៃទី៦ ខែឧសភា ឆ្នាំ២០១៥ បានបើក សវនាការ ជំនុំជម្រះ និងកាត់ទោសជនជាប់ចោទ ម្នាក់ដែលជាអនុប្រធាន សមាគមវៀតណាមប្រចាំខេត្ដកំពង់ឆ្នាំង ក្រោមការចោទប្រកាន់ ពីបទ« រំលោភលើទំនុកចិត្ដ» ជាប់ពាក់ព័ន្ធនឹងករណីឆបោក ពីពាណិជ្ជករ ជនជាតិវៀតណាមម្នាក់ ចំនួនជាង១០ម៉ឺនដុល្លារប្រព្រឹត្ត កាលពីអំឡុងឆ្នាំ២០១២ និង២០១៣។</span></p>
<p><span style="color: #000000;">លោក គឹម រ័ត្នណារិន ចៅក្រមជំនុំជម្រះ នៃ សាលាដំបូង រាជធានីភ្នំពេញ បានឲ្យដឹង នៅក្នុងអង្គសវនាការថា ជនជាប់ចោទរូបនេះ មានឈ្មោះ ផាំ យុំាងម៉េន អាយុ៥៨ឆ្នាំ មានតួនាទី មុនចាប់ខ្លួន ជាអនុប្រធានសមាគមវៀតណាម ប្រចាំខេត្ដកំពង់ឆ្នាំង រស់នៅក្នុង ខេត្តកំពង់ឆ្នាំង។</span></p>
<p><span style="color: #000000;">ជនជាប់ចោទឈ្មោះ ផាំ យុំាងម៉េន ត្រូវបានចោទប្រកាន់ពីបទ « រំលោភលើទំនុកចិត្ដ» និងត្រូវបានចាប់ឃាត់ខ្លួន ដោយ នគរបាលព្រហ្មទណ្ឌ ក្រសួងមហាផ្ទៃ កាលពីថ្ងៃទី១៩ ខែតុលា ឆ្នាំ២០១៤ ។</span></p>
<p><span style="color: #000000;">ចំណែកឯ ភាគីដើម បណ្តឹងនៅ ក្នុងរឿងក្តីនេះ មានឈ្មោះ ឡេង ហ្វាងឌៀប ភេទប្រុស អាយុ៣៥ឆ្នាំ រស់នៅសង្កាត់ភីថុង ក្រុងកាត់យ៉ា ខេត្ដគាងយ៉ាង ប្រទេសវៀតណាម។ លោក ទូច សារិទ្ធ មេធាវីឲ្យភាគីដើមបណ្តឹង បានថ្លែងថា នៅក្នុងរឿងក្តីនេះ កូនក្តីរបស់លោក បានប្តឹង ទាមទារប្រាក់ ថ្លៃប្រាក់ដើម ចំនួន១០ម៉ឺន២ពាន់ដុល្លារ និងទាមទារប្រាក់ជម្ងឺចិត្តចំនួន១១ ម៉ឺនដុល្លារទៀតពី ឈ្មោះ ផាំ យុំាងម៉េន ។</span></p>
<p><span style="color: #000000;">សាលាដំបូងរាជធានីភ្នំពេញ នឹងប្រកាសសាលក្រមនៃ សំណុំរឿងក្តីនេះ នៅរសៀលថ្ងៃ ទី២២ ខែឧសភា ឆ្នាំ២០១៥ខាងមុខនេះ៕</span></p>
<p><span style="color: #000000;"><a class="thickbox" title="" href="/FileManager/Commons/2015/5/7/90-07-05-2015--16-05-07.jpg"><img src="/FileManager/Articles/mce/2015/5/7/90-07-05-2015--16-05-07.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ដើមអម្ពិល</span></p>