<div class="article-content">
<p><strong>ភ្នំពេញ ៖</strong> បេក្ខជន ប្រមាណជា៧០ភាគរយ កំពុងតែស្ថិតនៅក្នុង ស្ថានការណ៍ ព្រួយបារម្ភ ចំពោះលទ្ធផល ប្រឡងសញ្ញាបត្រទុតិយភូមិ ដែលក្រសួងអប់រំយុវជន និងកីឡា នឹងប្រកាស នៅថ្ងៃទី២៩ ខែសីហា ឆ្នាំ២០១៤ស្អែកនេះ នៅរាជធានីភ្នំពេញ និងខេត្តកណ្តាល ដោយឡែក ៣០ភាគរយទៀតកំពុង តែសប្បាយ ចិត្តនឹងលទ្ធផលវិជ្ជមាន។</p>
<p>ក្រសួងអប់រំបានរកឃើញ ព័ត៌មានជាបឋមថា សិស្សបាក់ឌុបឆ្នាំនេះ ជាប់ក្នុង រង្វង់ ៣០ភាគរយ ពីសំណាក់លោកគ្រូអ្នកគ្រូ ធ្វើកំណែលើគ្រប់មុខវិជ្ជា។</p>
<p>ការប្រឡងបាក់ឌុបឆ្នាំនេះ ស្ថិតក្រោមកំណែទម្រង់ដ៏ស៊ីជម្រៅ របស់លោក ហង់ ជូនណារ៉ុន រដ្ឋមន្រ្តី ក្រសួងអប់រំ មានការតឹងរឹងជាទី បំផុត និងដាក់វិធានការយ៉ាងម៉ឹងម៉ាត់ មិនឲ្យលួចយក កំណែតាមខ្លួន ឬលួចប្រយ៉ុង និងលួច មើលគ្នា នោះទេ ហើយក៏តាមដានត្រួតពិនិត្យ ពីអង្គភាពប្រឆាំងអំពើពុករលួយ និងអ្នក សង្កេតការណ៍ ជាច្រើននាក់ផ្សេងទៀត។</p>
<p>យុវតីឈ្មោះ វុធ លីដា ដែលរស់នៅភូមិស្វាយអាត់លើ ឃុំព្រែកតាមាក់ ស្រុកខ្សាច់កណ្តាល ដែលបាន ប្រឡងនៅមណ្ឌលហ៊ុនសែន តាខ្មៅ បានឲ្យដឹងថា កញ្ញាក៏មិន ប្រាកដចំពោះលទ្ធផល នៃការប្រឡងនេះដែរ ព្រោះមានមុខវិជ្ជាខ្លះកញ្ញាធ្វើបានច្រើន និងខ្លះទៀតមិនសូវបានទេ ដែលជាហេតុធ្វើឲ្យកញ្ញាហាក់មិន ជឿជាក់ចំពោះលទ្ធផល ប្រឡងដែលត្រូវប្រកាសនៅថ្ងៃស្អែក។</p>
<p>កញ្ញាបន្តថា កាលប្រឡងមានការរឹតបន្តឹងជាខ្លាំ ងដោយមិនហ៊ានងាកមើលអ្នកណាឡើយ ក្រៅតែពីសមត្ថភាពខ្លួនឯងទាំងអស់។ ប៉ុន្តែទោះបីជាយ៉ាងណាក៏ដោយ ក៏កញ្ញាមានមោទន ភាពលើខ្លួនឯងដែរ ដោយសារតែការប្រឡងនេះពឹងលើសមត្ថភាពផ្ទាល់ខ្លួន។</p>
<p>ដោយសារតែចំនួនអ្នកប្រឡងបាក់ឌុបមានចំនួនអ្នកធ្លាក់ច្រើនតាមការរកឃើញរបស់ក្រសួងនោះ ប្រមុខ រាជរដ្ឋាភិបាលកម្ពុជា អនុញ្ញាតផ្តល់ឱកាស ឲ្យមានការប្រឡងលើកទី២ សំរាប់ បេក្ខជនមិនជាប់ នៅថ្ងៃទី១៣ ខែតុលា ឆ្នាំ២០១៤ខាងមុខ។</p>
<p>សូមបញ្ជាក់ថា ការប្រឡងសញ្ញាបត្រមធ្យមសិក្សា ទុតិយភូមិចំណេះទូទៅ និងបំពេញវិជ្ជា បានប្រព្រឹត្តទៅកាល ពីថ្ងៃទី៤-៥ ខែ សីហា ដោយ មានបេក្ខជនប្រឡង សរុបចំនួន ៩ម៉ឺន ៣ពាន់ ៤៥៦នាក់៕</p>
<p style="text-align: center;"><a class="thickbox" title="" href="/FileManager/Commons/2014/8/28/hour-678-28-08-2014--13-34-27.jpg"><img src="/FileManager/Articles/mce/2014/8/28/hour-678-28-08-2014--13-34-27.jpg" alt="" /></a></p>
<p style="text-align: center;"><img title=" " src="http://image.dap-news.com:81/dap-news/dap-images/2014/August/id-011/Hong-0636.jpg" alt="" width="500" /></p>
</div>
<p style="text-align: right;"><a href="http://www.dap-news.com/2011-06-14-02-39-55/93892-2014-08-28-05-36-34.html" target="_blank">ផ្តល់សិទ្ធដោយ ៖ ដើមអម្ពិល</a></p>